Wikipedia
From Wikipedia
Wikipedia è n'enciclopedìa lìbbira, scritta nta tanti lingui e funziona senza scopu di lucru.
Fu criata ntô jinnaru dû 2001 ntâ lingua ngrisa, a sìquitu di cuntatti tra Larry Sanger e Ben Kovitz, e videmma grazzî ô mpegnu di Jimbo Wales (Bomis Inc.), chi mittìu a dispusizzioni li server nicissari pî spirimenti.
La storia di Wikipedia, ntô ngrisi, si pò lèggiri nta sta pàggina. La virsioni siciliana di Wikipedia, chi stai liggennu accamora, è supranumminata scn.wiki.
Wikipedia usa software lìbbiru, zoè spiratu dî riflissioni di Richard Stallman, funnaturi dâ Free Software Foundation, lu quali fu prubbabbilmenti lu primu a tiurizzari l'esiggenza d'aviri macari n'enciclopedìa cumpritamenti lìbbira (viditi artìculu sternu).
Puru vuàutri putiti cullabburari! Scummigghiati comu supra la guida essinziali.
Storia di scn.wiki
Scn.wiki nascìu ntâ sècunna mitati dû 2004 (nta l'uttùviru) [1] chî nizziatura dû forum a linguasiciliana.org.
Scn.Wiki veni uspitata supra lu stissu server di l'àutri wikipedî.
Unn'è Wikipedia?
Li server di wikipedia sunnu abbastanti nichi: na dicina di computer (dui database e quarchi server web), ca s'attròvanu nta na stanza c'òspita li server di Bomis.com (nfurmazzioni ccà).
Lu pruggettu veni finanziatu principalmenti di na pirsuna, cchiù li dunazzioni vuluntarî, avìa esattamenti n'addipinnenti pû primu annu (e doppu nuddu), e li server sunnu gistuti di na pirsuna part-time, puru chista supra la basa vuluntaria.
Comu si prununza Wikipedia
Nun asisti na prununza ufficiali, ma quarchi pussibbilitati sunnu:
- uichipìdia
- uichipidìa
- uichipèdia
Cirtamenti, usamu «enciclopedìa» ntâ Wikipedia siciliana.
