Web - Amazon

We provide Linux to the World


We support WINRAR [What is this] - [Download .exe file(s) for Windows]

CLASSICISTRANIERI HOME PAGE - YOUTUBE CHANNEL
SITEMAP
Audiobooks by Valerio Di Stefano: Single Download - Complete Download [TAR] [WIM] [ZIP] [RAR] - Alphabetical Download  [TAR] [WIM] [ZIP] [RAR] - Download Instructions

Make a donation: IBAN: IT36M0708677020000000008016 - BIC/SWIFT:  ICRAITRRU60 - VALERIO DI STEFANO or
Privacy Policy Cookie Policy Terms and Conditions
Wolfgang Amadeus Mozart - Wikipedia

Wolfgang Amadeus Mozart

Van Wikipedia

Dit artikel is gesjreve in 't Mestreechs. 't Weurt gewaardeerd óm in dit artikel woe meugelik 't Mestreechs aan te hawte.

Wolfgang Amadeus Mozart
Vergroete
Wolfgang Amadeus Mozart

Wolfgang Amadeus Mozart (Salzburg 27 januari 1756 - Wene 5 december 1791) waor 'nen Oosteriekse componis. Nao in zien jäög es "woonderkeend" furoor te höbbe gemaak vervolgde heer zien loupbaan es klaveervirtuoos en gelegeheidscomponis, woebij heer in bekaans eder genre excelleerde. Zie werk behuurt tot 't meis gespeulde en bes gewaordeerde vaan de klassieke muziek. Heer sjreef in bekaans alle meugelike muziekgenres. Zien genialtiteit is sprèkwäördelik.

Inhawd

[bewirk] Leve

[bewirk] Ierste levesjaore

Joannes Chrysostomus Wolfgangus Theophilus Mozart woort op 27 januari 1754 gebore es twiede in leve gebleve keend vaan de Salzburgse componis en internationaol bekinde viooldocint Leopold Mozart. Mèt zjus vief jaor leerde heer klaveer speule, en heer maakde enorm vorderinge. Ouch begós al bekaans vaanaof 't ierste memint te componere: korte gemekeleke stökskes veur kleveer. Dit oetzunderlik talint woort daan ouch door pa Mozart geëxploiteerd: Op 1 september 1761 leet heer 'm veur 't iers in 't opebaar optrejje. Dao-op volgde reize nao München (1762) en Wene en Linz (1762-1763), woebij 't kinneke same mèt zöster Maria Anna 'Nannerl' Mozart, ouch al hendeg begaof op 't klaveer, veur alderlei publiek moot speule.

[bewirk] De groete reize vaan 1763 tot 1766

In juni 1763 begós pa Mozart mèt zien kinder aon 'n toch door gans Wes-Europa, veur zoe väöl meugelik lui te bereike mèt zien fenomenaol kinder. Nao e tiedsje in Beiere te höbbe roondgetrokke goon ze wijer nao Hesse, 't Rienland en de Zuidelike Nederlen um oetindelik in november in Paries aon te koume. Dao publiceert de kleine Mozart zien allerierste werke, 'ne set vioolsonates in zuver rococo-idioom, en späölt 'r ouch veur keuning Lowie XV.

In april 1764 verlaote de Mozarts Paries en via Calais goon ze nao Londe. Dao oontmoot de familie Johann Christian Bach, 'ne zoon vaan Johann Sebastian Bach. Ziene muziek zal veur de oontwikkeling vaan de jónge Mozart belangrieker zien es dee vaan welken andere componis daan ouch. Heer begint in Londe ouch zelf symfonieë te componere, hielemaol in de stiel vaan Bach. Ouch weurt 'n aontal sonates veur viool en klaveer - Mozart liert vaan z'ne pa ouch viool en altviool speule - gecomponeerd, die later zalle weure oetgegeve. Later, dat is in de Noordelike Nederlen, woe de familie in 1765 opaon geit. Nao aonvenkelike weigering vaan pa Mozart (heer vint de Hollenders "e bitteke lómp") geit 't daan toch via Gent en Rotterdam nao D'n Haog. In D'n Haog loupe bei kinder boektyfus op, wat ze, mèt door de zörg vaan de prinses vaan Oranje, zjus euverleve. In maart 1766 weurt Stadhawwer Wöllem V geïnstalleerd, en Mozart speult op zien installatie. Bovedeen geit ouch e werk, de Galimathias musicum vaan häöm in premièr. Ouch concertere ze in Amsterdam en Utrei, daonao geit de reis via Antwerpe, Breusel en Paries nao Dijon. Via Zwitserland en München geit de reis oetindelik trök nao Salzburg.

[bewirk] Volwasseweuring en ontwikkeling in stiel tot 1773

In de jaore die koume reis Mozart nog inkel kiere nao versjèllende hover, ein geit 'r ummer langer werke componere. Zoe kump op elfjäöregen leeftied mèt 'n oratorium en zien ierste opera en e jaor later mèt zien ierste mès. Heer sjrijf veur de deens vaan d'n aartsbisjop in Salzburg 'n aontal kèrksonates. Vaanaof 1770 nump de intensiteit vaan zie componere verbaozingwekkend touw en de haand vaan z'ne pa verdwijnt gans oet ziene muziek. In 1769 weurt heer oonbetaold kapelmeister aon 't hof vaan d'n aartsbisjop; aon 't ind vaan 'tzelfde jaor geit de familie nao Italië, woe ze oonder andere de componiste Niccolò Jommelli en Piccini opzeuke. Veural Jommeli is volges sommege vaan belang gewees veur Mozart ziene kèrkelike muziek. In Italië weure 'n aontal opera's en e paar motette, boe-oonder Exsultate, jubilate, gesjreve en mèt väöl succes oetgeveurd. In 1772 weurt Mozart, bij verstek nog, door Colloredo e salair touwgekind. In 1773 perbeert Wolfgang in Wene 'n betrèkking te kriege aon d'n hoof, wat mislök.

[bewirk] Oonder aartsbisjop Colloredo in Salzburg

Mèt 18 jaore is Mozart al 'ne gerespecteerde componis mèt werke die good gewaordeerd weure. Vaanaof deen tied begint zien stiel evels laanksem oorspronkeliker te weure, minder wie 't rococo (of evegood de Sturm und Drang) vaan zien tiedgenote. De symfonieë nómmer 25 en 26 (KV 183 resp. 184) zien dao gooj veurbilde vaan, wie ouch 't klaveerconcert no. 9 (KV 271). Mozart sjrijf es kapelmeister in Salzburg 'n aardeg aontal werke, meh de sobere Colloredo beknot häöm nogal in zien artistieke vrijheid: heer eis vaan häöm korte no-nonsensemèsse (Missae breves), wat Mozart irriteert. Ouch klaog heer dreuver tot heer bij de lunch mèt 't personeel vaan d'n aartsbisjop moot ete. Daorum maak Mozart gere oetstepkes nao ander stei, woe heer dèks opdrachte tot nui composities oontvingk. In Paries, woe heer o.m. zien Pariese Symfonie en e paar pianowerke sjrijf, störf zien ma, wat häöm hendeg trif. Ouch zien oonbeantwoorde leefde veur de zengeres Aloysa Weber deit 'm leid.

In 1779 slut heer e nui contrak mèt Colloredo, wat häöm e hoeger salair en mie verpliechtinge (wie koerjónges oonderwieze) opbringk. Oondertösse verslechtert de baand mèt Colloredo ummer mie. In 1781, 't jaor boe-in zienen opera Idomeneo, re di Creta in München in premièr geit, zien zoewel Mozart es Colloredo in Wene. De lèste vräög Wolfgang um e concert te verzörge op dezelfden daag tot Mozart al 'n ander opdrach heet gekrege. Noe provoceert heer bij d'n opperkamerhier zien oontslaag; Mozart weurt letterlik de deur oetgetramp.

[bewirk] De Weense jaore 1781-1791

In Wene vesteg Mozart ziech es vrij kunsteneer, wat veur deen tied - zeker bij componiste - hiel oongewoen waor. Heer verdeent zien geld mèt klaveeroptredes en losse opdrachte veur composities. Allewel tot 'r väöl vaan zoe'n opdrachte oontvingk zit heer dèks in financieel probleme, door slech financieel beleid en 't deur leve in Wene (Mozart wèlt per se bij de Weense elite hure).

Op 4 augustus 1782 trojt heer mèt Constanze Weber, zöster vaan Aloysa, oondanks èrnstege bezwoere vaan pa Mozart, wat häöm 'nen tiedelike breuk mèt z'ne pa oplevert. Later zal dit verbetere, es vader Mozart in 1785, e jaor nao ziene zoon, bij de Vrijmètseleers geit. In 1787 störf Leopold Mozart op 67-jäöregen leeftied.

In Wene liert Mozart väöl componiste en ander muziekpersuunlikhede kinne. Baron Gottfried van Swieten bringk häöm in aonraking mèt de werke vaan Johann Sebastian Bach en Georg Friedrich Händel, woedoor heer zelf fuga's en ander contrapunctische werke geit sjrieve en trèkke vaan die aw stiel in ziene muziek verwerk. Met Joseph Haydn, Johann Baptist Vanhal en Karl Ditters von Dittersdorf speult heer kwartet en de kamermuziekstiel vaan Haydn, in de ierste plaots vaan dee zien striekkwartette, beïnvleujt 'm deepgoond. Euveregens waordeert Haydn Mozarts zes striekkwarette (KV 387, 421, 428, 458, 464 en 465, in 1785 door Artaria oetegegeve es Opus X.) zoe good tot heer zelf daodoor beïnvlood raak. Mèt de symfonie doen Haydn en Mozart get saortglieks; de symfonieë no. 38-41, zien leste veer, höbbe bekaans vaanaof 't begin rippertoir gehawwe en gelle es meisterstökke.

'n Samewèrking mèt d'n oontheve preester Lorenzo da Ponte levert drei monumentaol opera's op: Le nozze di Figaro, Don Giovanni en Così fan tutte. Don Giovanni weurt in oktober 1787 in Praag opgeveurd, en verwek e groet succes. Dees drei opera's zien 'n geslaogde synthese vaan alderlei komische opera-genres.

In 1784 trejt Mozart op veurdrach vaan inkel vaan zien vrun touw tot de Vriemètselerij, tot de loge 'Zur Wohlthätigkeit'. Voor zien breurs vrijmètseleers zal heer nog väöl werke componere, woe-oonder de Meistermusik/Maurische Trauermusik, en in 1791 't Singspiel Die Zauberflöte.

In de leste jaore vaan zie leve componeert Mozart 'n aontal kamermuziekwerke veur oongebrukelike combinaties, en begint zien stiel ouch inhajdelik te verandere: ze geit de kant vaan de vreuge romantiek op. Evels is ein vaan zien allerleste werke, 't Klarinetconcert in A (KV 622), opvallend awwerwèts en rococo-echteg vaan stiel, zoetot 't besjrieve vaan deen tendens lesteg is. Zien allerleste werk is 't Requiem in d (KV 626), wat neet voltoejd weurt. Op 5 december störf 'r aon hoeg koortse, symptome vaan 'n tot op d'n daag vaan vaandaog oonbekinde krenkde. De mythe tot heer vergifteg zouw zien (wat heer zelf in opwellinge vaan paranoia meinde), beveurbild door concurrint Antonio Salieri, weurt door geine weitesjapper mie geluif, meh deit 't nog ummer good in de fictie en de populair cultuur. Väöl lui vinde 't 'n boejende gedachte wie Mozart ziech zouw oontwikkeld höbbe es 'r waor blieve leve.

Mozart leet twie kinder nao: Carl Thomas Mozart, dee amteneer woort, en Franz Xaver Mozart, dee ouch woonderkeend woort en es vreug-romantisch componis oonder mie Frédéric Chopin beïnvleujd heet.

[bewirk] Aspekte vaan zie werk

[bewirk] Invlode vaan ander componiste

Mozart greujden op in 't rococo-muziekklimaot wat nao 't ind vaan de barok euveral in Europa hiersde. Sterk opkoumende genres waore de symfonie, 't soloconcert en de solosonate veur pianoforte (e nui modieus instrumint). In dees genres excelleerde Johann Christian Bach, 'ne componis deen Mozart in 1764 in Londe trof (zuug bove). Same mèt vader Leopold Mozart is heer de allerbelangriekste beïnvleujer vaan Mozart gewees. Leopold is veural belangriek veur Mozart zien visie op muziek; bei componiste hadde 'n veurkäör veur humor en oonverwachte wendinge.

Later invlode kaome vaan Joseph Haydn en vaan de laank gestorve Johann Sebastian Bach. Mozart zie Weens werk kint väöl oongebrukelike polyfoon passages, die dudelik verband liekene te hawwe mèt dezen awwe meister, mèt ween Mozart door Baron van Swieten (zuug bove) en 'n reis nao Leipzig (woe Bach 25 jaor gewoend en gewèrk had) kinnes maakde. Bij 't zien vaan 'n partituur vaan e Bachmotet zouw heer gezag höbbe "Dat is noe get boe-oet me nog get kin liere!"

[bewirk] Oontwikkelingsfases

'ne Kunsteneer dee daarteg jaor aon de loupende band väöl kuns produceert kin neet vaan d'n einen op d'n anderen daag vaan stiel verandere. Bovedeen sjreef Mozart in väöl versjèllende genres, die allemaol hun eige stielkinmerke en -conventies hadde; boedoor e striekkwartet dudelik in 'ne andere stiel is gesjreve es 'n symfonie of 'ne opera. Toch kint me, wie globaol ouch, de volgende periodes in zie werk oondersjeie:

  • 'ne Begintied, vaan de allerierste werke oet 1761 tot aon oongeveer 1774. Dit is d'n tied woe-in Mozart 't componere in versjèllende genres liert, en ziech dao ummer mier in verfient. Me zouw dit tiedvak kinne opdeile in de jaore 1761-1767, 'ne tied woe-in heer liert, en de jaore 1767-1774, 'nen tied boe-in heer conventioneel werke sjrijf;
  • 'n Vreug bleuj, vaan 1775 tot aon 1780, woe-in heer ziech ummer mie losmaak vaan de conventies en zien voorbeelde, en woe-in heer geniaol werke begint te producere;
  • De Gawwe jaore, vaanaof zie vertrek nao Wene in 1781 tot aon 1788. In dees jaore sjrijf heer oongeluifelik väöl muziek, dewijl de kwaliteit allein mer hoeger sjijnt te weure;
  • De Indjaore, vaan 1789 tot aon zienen doed in 1791. Mozart geit in die jaore door mèt väöl te componere, meh zien stiel liek ziech laanksemaon te modernisere. Dit tiedvak zouw volges sommege oonderzeukers es Mozart waor blieve leve 'n euvergankstiedperk zien gewees; heer zouw op 't punt gestoon höbbe vreugromantisch te goon componere. 't Allerdudelikste veurbild is 't requiem, ouch de later striekkwartette, de pianokwartette en gedeiltes oet Die Zauberflöte weure in dat verband geneump.

[bewirk] Symfonische muziek

't Groet aontal symfonieë wat Mozart gesjreve heet steit neet gans in verhajding mèt hun belang. Mozarts ierste ca. 20 symfonieë aoseme dudelik de sfeer vaan Joh. Chr. Bach oet: kort, in drei deile zoonder menuet, allegro 4/4 - andante - allegro 6/8. Later kump, veural oonder invlood vaan Haydn, 't menuet debij. De bes gewoardeerde symfonieë zien de veer lèste: de 38e (Praagse) symfonie kint 'n boejende laanksem indeiling, en de 40e is door 't gebruuk vaan polyfoon structure hendeg innovatief.

In zien concerte liet Mozart al snelder get vaan zien eige talent zien. Es klaveerspeuler sjreef heer 27 concerte (of 23, zuug oonder), veurnaomelik veur eige gebruuk, die, oondanks veurgangers wie J.S. Bach, Handel, C.Ph.E. Bach en alweer J.Chr. Bach hendeg op ziechzelf stoon. Feitelik is 't Mozart zien verdeenste gewees tot 't klaveerconcert belangrieker woort es 't vioolconcert. Neettemin heet Mozart ouch vief vioolconcerte gesjreve, die allemaol rippertoir gehawwe höbbe. Vaan zien blaozersconcerte kin gezag weure tot ze good zien oetgerös op de meugelikhede vaan de versjèllende instruminte en hun bespeulers. Zoe wèt heer perceis de beperkde meugelikhede vaan de hore in zienen tied gebruuk te make, en es iemes ins e speciaol instrumint mèt extra meugelikhede heet weure die mètein oetgebuut.

In de meiste divertimenti en serenades blijf Mozart de beginsele vaan dit genre - muziek veur amusemint en neet veur artistieke expressie - trouw. Ouch zien bekindste werk in dit genre - Eine kleine Nachtmusik (KV 525) deit dit, al zit 't meisterlik inein. De Haffner-serenaad (KV 250) geit mie de kant op vaan zien symfonieë.

[bewirk] Kamermuziek

Mozart zien striekkwartette zien in twie periodes te verdeile: pre-Haydn en post-Haydn. De ierste kwartette (t/m KV 173) zien veural werke die in de conventie vaan d'n tied passe. De later werke zien sterk geïnspireerd door de Striekkwartette opus 33 vaan Joseph Haydn, die in Wene 'n echte revolutie teweegbrachte en Mozart zelf tot 'n serie vaan oetindelik zes striekkwartette inspireerde. Zelf neumde heer die "die Frucht einer langen und mühsamen Arbeit", en inderdaod doorde hun oontstoonshistorie drei jaor. Veural de laanksem inleiing vaan 't Dissonantekwartet (KV 465) is oongeluifelik oongewoen en experimenteel; dit waor typisch muziek veur 'ne kleine kèrn vaan avant-gardeleefhöbbers. Daoneve is Mozart d'n ierste serjeuze vertegewäördeger vaan 't striekkwintet, boe-in twie altviole veurkoume (Mozart speulde zelf altviool, dit zal häöm dao mèt touw gebrach höbbe). E striektrio en 'n aontal duette veur viool en altviool zien ouch good doorwèrk, meh weure neet väöl gespeuld.

Mozart is ouch d'n oteur vaan 'n aontal geïsoleerde kamermuziekstökker in oongebrukelike bezèttinge. Typerend is tot die zjus tot zien bezoonderste werke hure. Mozart oonderkinde dat zelf ouch. Vaan zien Kwintet veur klaveer, hobo, klarinet, hore en fagot (KV 452) zeet heer tot 't 't beste werk is wat 'r oets gesjreve heet. Ouch opmerkelik zien 't Kegelbaontrio veur klaveer, altviool en klarinet (KV 498), 't Klarinetkwintet (KV 581) en zeker 't Kwintet veur hore, viool twie altviole en cello (KV 407), gans uniek in zien bezètting. 't Hobokwartet in F weurt ouch good gewaordeerd. De veer door Mozart gesjreve fluitkwartette kinne die waordering neet ewegdraoge.

Zienen harmoniemuziek umvat neet bezoonder väöl werke, meh oet de meiste vaan die werke bliek zien leefde veur blaosinstruminte en veural de klarinet, en de wèl um 't obstakel vaan de versjèllende stumminge (alle blaozerinstruminte zien vals, en allemaol op 'n gans ander meneer) te euverbrögke. De bekindste en monumentaolste veurbilde zien de Gran partita veur daartien instruminte (KV 361) en de èrnstege Serenaad in c (KV 388); oondanks de naom serenaad bij bei stökker, die amusemintsmuziek suggereert, zien dat gans serjeus werke.

Mozart sjreef ouch sonates, väöl veur klaveer en viool en pianotrio's, die neet zoe invloodriek of vernuiend zien es zien ander kamermuziekwerke. De twie door häöm gesjreve pianokwartette zien dat weer wel; 't Pianokwartet in g (KV 478), gesjreve in opdrach vaan muziekoetgever Hoffmeister, woort door zien veuroetsrevende structuur neet verkoch.

De muziek veur klaveer solo umvat 18 sonates, 'n aontal variatiereekse en nog get korter werke. De klaveersonates kinne väöl lui vaan de pianolesse, en de meiste zien door Mozart tijens zien eige concerte gebruuk (dèks geïmproviseerd en later opgesjreve). Bezoonder is veural de leste sonate (KV 576); bekind is wijers veural de elfde sonate (KV 331). De variatiereekse waore veural modieus en populistisch werke.

[bewirk] Opera

De vreug opera's vaan Mozart beliechame dudelik ziene "liertied": heer naom laanksemaon de trends vaan 't internationaol operaleve euver. Zie verblief in Italië heet 'm wat dat betrif good gedoon. Oonderzeukers zien 't gemeinlik dreuver eins tot pas bij Idomeneo, rè di Creta (KV 366) zie theatergenie tot uting kump; Die Entführung aus dem Serail (KV 384) is 't ierste geniaol Singspiel. Dit genre zouw in Mozarts hen pretentieuzer en beter gewaordeerd weure (die waordering kaom zeker ouch nao zienen doed op: umtot Mozart ziech zoe serjeus mèt 't genre had bezeggehawwe begós me de Duitse opera hoeger aon te sloon). Nao Der Schauspieldirektor (KV 486) koume de drei groete Da-Ponte-opera's (zuug bove). Hei-in smèlte versjèllende genres same. In Don Giovanni (KV 527) versmilte zelfs opera seria en opera buffa. Die Zauberflöte (KV 620), 'nen opera bekind um de vrijmètseleerssymbole, vraog nege maond veurbereiing. Euver zienen allerletste opera, La clemenza di Tito (KV 621), zien de meininge verdeild: heer weurt weineg oetgeveurd en väöl lui meine tot 't haoswerk is gewees vaan Mozart, dee dao gaaroet geine zin in had.

[bewirk] Geistelike muziek

Mozart sjreef 'n aontal mèsse, veural korte, wie dat Colloredo ziech wunsde, woe-in 't vreug-klassiek idioom gehandhaaf weurt. De geijkde mèsteks weurt neet op dramatische meneer tot muzikaol oetbilding gebrach. Oetzunderinge zien de Mès in c (KV 427) en 't losstoond Kyrie in d (KV 341). 't Requiem (KV 626) is vaan dezelfde klasse, meh muzikaol nog geavveceerder. Hei maak Mozart gebruuk vaan oongewoen harmonieë, väölvöldege polyfonie (wie 'n dóbbelfuga in 't kyrie) en sterke bilder opropende muziek.

Wijers heet Mozart 'n aontal motette gesjreve, woevaan sommege nog dèks gehuurd weure.

[bewirk] Euverege muziek

De res vaan zien äövre weurt minder hoeg gesjat. Zien leder zien meistal prentieloes werkskes, die snel ineingezat woorte. 't Leed waor in Mozart zienen tied daan ouch nog laank neet de hoegaongesloge kunsvörm dee 't sins Franz Schubert is. E bitteke 'tzelde gelt veur zien canons en ander vocaol ensembles - die woorte meistal veur binneshoes gebruuk gemaak, inkel veur de spas. Beröch zien de canons mèt tekste wie Leck mich im Arsch en O du eselhafter Martin.

[bewirk] Invlood op ander componiste

Hiel väöl componiste höbbe ziech door Mozart laote inspirere, meh zienen direkten invlood vint me veural in de generatie zjus nao häöm, en soms al bij zien tiedgenoete. Heibove woort al d'n invlood vaan Mozarts kwartette op die vaan Haydn besjreve. Ludwig van Beethoven, dee al veur 1800 titels mètkraog wie "d'n opvolger vaan Haydn/Mozart", leet ziech deepgoond door allebei inspirere. zien symfonieë en striekkwarette lieke in de ierste plaots geriech op Haydn, meh in zien klaveerconcerte kump Mozart merkbaar nao veure. Soms kint me die verbinding tot op specifieke concerte concretisere: zoe liek 't Daarde Pianoconcert vaan Beethoven dudelik geriech op 't Klaveerconcert nr. 24 in c (KV 491).

Groeter es op Beethove waor d'n invlood op de generatie jóng romantici nao häöm, beveurbild op Ludwig Spohr en Carl Maria von Weber. Bij die raak 't idioom laanksemaon oonder invlood vaan de expressie, wat te koste vaan de bij Mozart nog strènge vörm geit.

[bewirk] Mozart de mins

Vaan Mozart zien oetgebreide breefwèsselinge bewoerd gebalove, wat neet allein 't sjrieve vaan zien biografie vergemekelik heet meh ouch 'ne blik in zien gedachte en karakter beit. Bovedeen zien väöl getugenisse vaan tiedgenote euvergeleverd.

E bild wat vaan Mozart besteit is tot heer altied mèt muziek bezeg waor - op ziech natuurlik logisch veur 'ne componis - en tot heer 'n oetzunderlik vermoge had ziech veur emotioneel impulse aof te sjeie es heer mèt e belangriek werk bezeg waor. Volges Karoline Pichler praotden 'r daan oonsamehangend en gedroog 'r ziech oonbehuurlik. Wie zien ierste keend gebore woort zaot heer volges breve in 't kemerke deneve aon e klaveertrio te wèrke. Muziekfysiologe vermeuje tot Mozart de gaaf had mèt zien twie heersehelfde gesjeie te wèrke: dewijl in de ein helf gecomponeerd woort gebruukde heer de ander helf veur zien umgeving.

Dao is väöl gezag euver 't banaol karakter vaan Mozart: oet väöl vaan zien breve (aon Maria Anna Thekla 'Bäsle' Mozart) en e paar composities bliek zien dudelike veurkäör veur poep-en-pishumor. In de negentiende iew zaote väöl lui daomèt verlege, umtot ze vaan Mozart lever 't oonaonraakbaar perfek genie maakde. Evels moot me bij dit gedraag opmèrke tot dit zien awwers ouch neet vreemp waor. Väöl anekdotes, en ouch wel bronne vaan Mozart zelf, oondersjrieve 't bild vaan iemes dee dèks 'n saort vaan practical jokes maakde; de partiture vaan de horeconcerte, alleveer gesjreve veur Joseph Leutgeb, stoon vol mèt merkwierdege, hatelike opmèrkinge veur d'n horenis.

Mozart sjrijf neet väöl euver bildende kuns in zien breve, aanders es ziene pa. Wel hoolt 'r väöl vaan theater, zoewel vaan muziektheater es gesproke theater. In Wene heet 'r hoonderde veurstèllinge bezoch.

De Weense Mozart weurt dèks in verband gebrach mèt de Verleechting, zeker ouch umtot 'r ziech aonsloot bij de Vrijmètselerij. Dit zaot evels neet zien opvattinge euver 't geluif in de weeg: oet wat 'r ziene pa en e paar andere kort nao d'n doed vaan zien ma sjrijf kump dit dudelik nao veure. Ouch zeet 'r vaan de familie Wendling: Freunde die keine Religion haben sind von keiner Dauer.

[bewirk] Oonderzeuk nao Mozart

[bewirk] Citaote vaan en euver Mozart

[bewirk] Euverziech vaan zien werke

Veur e gans gedetailleerd euverziech mèt KV-nómmere zuug Lies van werke van Wolfgang Amadeus Mozart

[bewirk] Orkesmuziek

[bewirk] Symfonieë

54 mèt zekerheid of groete waorsjijnlik aon Mozart touwgesjreve. Tradioneel 41 gerekend; no. 2, 3 en 7 gelle es oondergesjove.

[bewirk] Concerte

  • 23 klaveerconcerte, traditioneel 27 geteld. De eerste veer zien bewèrkinge vaan aandermans sonatedeile. Met twie concerte veur twie klavere en eint veur drei
  • 5 vioolconcerte
  • 2 fluitconcerte
  • 4 horeconcerte, nao later onderzeuk oetwees verkierd genómmerd
  • Hoboconcert, klarinètconcert en fagotconcert
  • Dubbelconcerte veur twie viole, veur viool en altviool, veur fluit en harp

[bewirk] Serenades e.d.

Versjèllende werke mèt de titels "Nachtmusik", "serenaad", "divertimento" of "Kassation". Wijers e groet aontal losse marse, menuette, Duitse danse etc, 'n striekersfuga mèt inleiing en 'n potpourri (Galimathias musicum)

[bewirk] Losse stökker

  • Laankseme inleiing G-groet veur symfonie vaan Michael Haydn
  • Rondo in A veur klaveer en orkes, mesjiens oorsprunkelik e deil vaan klaveerconcert nr. 12
  • Adagio in E, rondo in Bes en rondo in C, veur viool en orkes, ierste twie mesjiens es vervanging vaan bestoonde deile oet vioolconcerte
  • Andante in C veur fluit en orkes
  • Begindeil hoboconcert, neet aof
  • Allegro in Es, rondo in Es, allegro in E veur hore en orkes, alle drei neet aof
  • Begindeil concert veur viool en klaveer, veur viool, altviool en cello, bei neet aof

[bewirk] Kamermuziek

[bewirk] Striekkwintette

5 complete kwintette, wijers onaofgemaakde begindeile in Bes en a.

[bewirk] Striekkwartette

23 of 26 complete kwartette (hingk aof vaan de definitie). Wijers nog 'ne canon veur striekkwartet.

[bewirk] Striektrio's en -duette

  • Ei trio veur viool, altviool en cello; eint veur twie viole en bas; Triodeil in G (neet aof).
  • Twie sonates veur viool en bas, twie duo's veur viool en altviool.

[bewirk] Klaveer en striekers

  • 26 sonates veur viool en klaveer, twie reekse variaties veur viool en klaveer; daoneve e paar sjètse;
  • 12 trio's veur viool en klaveer, woevaan zes mèt de titel sonate en eint mèt de titel divertimento. Nog e trio in d, wat neet aof is meh in gecompleteerde vörm later toch oetgegeve.
  • 2 pianokwartette

[bewirk] Blaosmuziek

8 stökker mèt de naom divertimento, 3 mèt de naom serenaad, sonate, twie adagio's, 25 losse stökker, 12 duette (kegelduette).

[bewirk] Striekers en blaozers

  • 4 fluitkwartette;
  • Hobokwartet;
  • Horekwintet;
  • Klarinetkwintet; daoneve nog drei neet-voltoejde kwintetdeile

[bewirk] Klaveer en blaozers

  • Kwintet veur klaveer, hobo, klarinet, hore en fagot, KV 452

[bewirk] Klaveer, striekers en blaozers

  • Trio veur klarinet, altviool en klaveer, KV 498 (Kegelbaontrio)

[bewirk] Klaveersonates (twie- en veerhendeg)

  • 18 aofgemaakde sonates veur klaveer twiehendeg (vreuger neet in de zjuste chronologie bekind); twie oonvoltoejde ierste deile, in Bes en in g;
  • 5 sonates veur klaveer veerhendeg aon ein instrumint (allerierste vreuger neet bekind)
  • 1 sonate twie klavere.

[bewirk] Ander klaveerwerke (idem)

  • 16 variatiereekse veur klaveer twiehendeg, 3 fantasieë, väöl losse werke (boe-oonder zien allerierste composities); daoneve e groet aontal fragminte;
  • 1 variatiereeks veur klaveer veerhendeg aon ein instrumint; twie oonvoltoejde sonatedeile
  • Fuga veur twie klavere; gans voltoejd ierste deil vaan 'n sonate; oonaofgemaak larghetto-allegro

[bewirk] Euverege kamermuziek

  • 17 epistelsonates veur striekers en örgel, soms ouch mèt blaozers
  • 3 stökker veur mechanisch örgel;
  • Adagio en rondo veur galsharmonica, fluit, hobo, altviool en violoncello;
  • Adagio veur glasharmonica solo

[bewirk] Vocaole muziek

[bewirk] Opera's en losse aria's

  • 1 Latienstaolege opera
  • 14 Italiaanse opera's
  • 6 Singspiele
  • Inkel tientalle losse aria's (veural Italiaans), drei losse duette, ei trio, ei kwartet, wijers nog 'n oonvlotoejd kwartet (KV 571a)

[bewirk] Cantates en oratoria

  • Vief cantates;
  • Ei Duitstaoleg gewijd Singspiel (KV 35);
  • Twie wereldlike Italiaanse oratoria

[bewirk] Mèsse, mèsdeile en requiem

  • 17 mèsse (soms mèt 't epitethon longa, brevis of solemnis);
  • Requiem (neet voltoejd, aofgemaak en later oetgegeve door ziene lierling Frans Xaver Süssmayr)
  • 2 losse kyries

[bewirk] Motette e.d.

  • 21 motette, antifone en ander religieus werke.

[bewirk] Leder

  • 29 leder, meistal veur stum en kleveer, mèt nog 'n oonvoltoejd leed.

[bewirk] Werke veur vocaol ensemble

  • 35 canons, die zoonder teks mètgerekend;
  • 8 neet-canonische vocaol werke, sommege mèt begeleiing

[bewirk] Bewèrkinge

  • Veer klaveerconcerte, traditioneel genómmerd 1 t/m 4 (zuug bove), nao klaveersonates vaan versjèllende componiste; daoneve ouch drei zoe'n concerte nao volledege sonates vaan Johann Christian Bach;
  • Zes preludes en fuga's veur striektrio; preludia mesjiens orzjineel, fuga's meis vaan Johann Sebastian Bach
  • Vief fuga's veur striekkwartet, nao klaveerfuga's vaan J. S. Bach; fragmint vaan 'n zesde
  • Herorkestraties vaan Ode for Saint Caecilia's Day, Acis and Galathea, Alexander's Feast en de Messiah vaan Georg Friedrich Händel

[bewirk] (Waorsjijnlik) oondergesjove

  • 'n Aontal symfonieë, veural jäögwerke. Sommege zien vaan Leopold Mozart.
  • Veer vioolconcerte, daovaan twie later vervalsinge;
  • Sinfonia concertante veur veer blaosinstruminte en orkes (mesjiens vaan Mozart meh door andere aongepas)
  • Ouverture in Bes;
  • E groet aontal divertimenti veur blaozers, väöl daovaan nog weineg bestudeerd;
  • E groet aontal danse, idem
  • 10 Striekkwartette, 6 oonzeker en 4 dudelik neet authentiek;
  • 6 vioolsonates
  • Minstes 12 mèsse, woevaan 'rs twie (KV 140 en KV Anh. 232) väöl weure oetgeveurd.
  • 'n Aontal klein religieus werke;
  • Oratorium Abramo ed Isacco, in wèrkelikheid vaan Joseph Mysliveček;

[bewirk] Verlore gegoon

N.B. Vaan de meiste werke is oondudelik of ze wel bestoon höbbe.

  • Maximaol vief symfonieë;
  • Celloconcert, trompötconcert, andante veur cello en orkes, drei fagotconcerte;
  • 'n Aontal divertimenti en aofzunderlike danse;
  • inkel klaveerwèrke.

[bewirk] Bibliografie

[bewirk] Extern linke

! Aan dit artikel weurt de kómmende tied nog doorgewèrk. Tot daen tied kan d'n inhaud van dit artikel veurnaam informatie misse of nog neet good in zie verbandj ligke.
Aafkomstig van Wikipedia, de Vriej Encyclopedie. "http://li.wikipedia.org../../../w/o/l/Wolfgang_Amadeus_Mozart_a085.html"
Our "Network":

Project Gutenberg
https://gutenberg.classicistranieri.com

Encyclopaedia Britannica 1911
https://encyclopaediabritannica.classicistranieri.com

Librivox Audiobooks
https://librivox.classicistranieri.com

Linux Distributions
https://old.classicistranieri.com

Magnatune (MP3 Music)
https://magnatune.classicistranieri.com

Static Wikipedia (June 2008)
https://wikipedia.classicistranieri.com

Static Wikipedia (March 2008)
https://wikipedia2007.classicistranieri.com/mar2008/

Static Wikipedia (2007)
https://wikipedia2007.classicistranieri.com

Static Wikipedia (2006)
https://wikipedia2006.classicistranieri.com

Liber Liber
https://liberliber.classicistranieri.com

ZIM Files for Kiwix
https://zim.classicistranieri.com


Other Websites:

Bach - Goldberg Variations
https://www.goldbergvariations.org

Lazarillo de Tormes
https://www.lazarillodetormes.org

Madame Bovary
https://www.madamebovary.org

Il Fu Mattia Pascal
https://www.mattiapascal.it

The Voice in the Desert
https://www.thevoiceinthedesert.org

Confessione d'un amore fascista
https://www.amorefascista.it

Malinverno
https://www.malinverno.org

Debito formativo
https://www.debitoformativo.it

Adina Spire
https://www.adinaspire.com