Islandia

From Wikipedia

L'Islandia.

L'Islandia (Ísland, n islandisi) è n'isula e nu statu di l'Europa sittintriunali, nta l'Oceanu Atlanticu sittintriunali, situata ntrâ Groenlandia (200 chm) e a Gran Britagna, a nordovest di li isuli Faroe. Idda fu colonizzata dî Norveggisi e dî Celti (Scozzisi e Irlandisi) ntra u IX e u X seculu e ospita lu Althing (AlÞing n islandisi), u parlamentu cchiù anticu dû munnu, istituitu ntô 930. A capitali islandisi è Reykjavík.

[cancia] Storia

L'Islandia fu abbitata ô nizziu dî monaci irlandisi celti (scozzisi irlandisi) nta l'VIII seculu. Li monaci cunsidiraru l'isula comu un eremu nzinu a lu principiu dû IX seculu, quannu fu colonizzata dî Vichinghi norviggisi e dî coloni di àutri paisi scandinavi chi, ntô 930, funnaru l'Althing chi è, nzemmula ccû Løgting di li isuli Faroe, l'assemblea parlamentari cchiù antica d'Europa. L'Islandia rimasi ndipinnenti ppi tri seculi, vinennu poi conquistata dâ Norveggia prima (ntô 1262) e dâ Danimarca poi ntô 1380 (ppi effettu di l'unioni ntra regnu di Norveggia e regnu di Danimarca, suttâ direzzioni di chist'urtimu). A l'Islandia vìnniru ricanusciuti putiri limitati ntô 1874 e ntô 1918 na ndipinnenza simili a un prutetturatu ccu suvranitati supra materii locali, mentri li relazzioni ccu l'èstiru e a difisa rimasiru ntê putiri di l'autoritati danisi e u suvranu danisi rimasi capu di statu nzinu a lu 1944 quannu fu funnata a ripubblica. A paci di Kiel cunsacràu ntô 1814 ulteriormenti a sovranitati danisi, mentri u paisi di origgini (a Norveggia), macari sutta cuntrollu dâ Svezzia, attruvàu na via a l'indipinnenza. Ntô 1874, ppi arricurdari li vecchi tradizzioni, vìnniru celebbrati li 1000 anni dâ colonizzazzioni. Lu 17 di giugnu 1944, duranti a secunna guerra munniali, vinni proclamata a Ripubblica d'Islandia. L'Islandia è membru funnaturi (4 di aprili 1949) dâ NATO, ccâ cunnizzioni di nun èssiri custretta a participari a cunflitti armati (macari picchì, ppi sô scelta, l'Islandia nun havi na forza militari propia). Fa parti di l'Associazzioni europea di lìbbiru scanciu (EFTA) e dû 25 di marzu 2001 dû spazziu Schengen macari.

[cancia] Pulitica

U parlamentu islandisi Althing havi 63 membra eliggiuti dâ pupulazzioni ogni quattru anni. U capu dû guvernu è u primu ministru chi havi a parti esecutiva dû guvernu. U primu ministru è eliggiutu dû capu dû statu (prisidenti dâ ripubblica), iddu macari eliggiutu pi quattru anni. L'Islandia nun fa parti di l'Unioni Europea.

[cancia] Giografìa

N Islandia ci sunnu 23 pruvinci e 104 cumuni. U paisi è situatu supra la frattura gioluggica dû mediu atlanticu. Ci sunnu assai vurcani attivi, p'asempiu l'Hekla, e circa lu 10% dâ superfici islandisi è arraccupunatu di ghiacciu. L'isula havi geyser (chi è na palora islandisi) e fiordi. Li principali citati sunnu a capitali Reykjavík, Keflavík (unni s'attrova l'ariuportu) e Akureyri. L'isula di Grímsey, supra lu cìrculu àrticu, è a citati abbitata cchiù sittintriunali d'Islandia. Ô cuntrariu dâ Groenlandia, l'Islandia è cunsidirata paisi d'Europa e nun dâ Merica dû Nord. È a secunna ìsula cchiù granni d'Europa doppu a Gran Britagna e prima di l'Irlanda, e è macari a diciottèsima ìsula cchiù granni ô munnu.