The Rolling Stones
Frå Wikipedia – det frie oppslagsverket
The Rolling Stones vart danna i 1962 i London av Brian Jones (gitar), Mick Jagger (vokal), Keith Richards (gitar), Ian Stewart (piano), Bill Wyman (bass) og Charlie Watts (trommer).
Navnet fann gruppa i ein song av Muddy Waters. Brian Jones slutta i gruppa like før han døde i juli 1969. Han vart erstatta med Mick Taylor, som i 1975 igjen vart erstatta med Ron Wood (Jeff Beck Group og The Faces). Ian Stewart slutta offisielt i gruppa allereie i 1963, men var med som musikar og turneleiar heilt til sin død i 1985. Bill Wyman forlet gruppa i 1994. Han fekk ingen offisiell etterfølgar, men Darryl Jones har sidan erstatta han som fast, innleigd bassist på innspelingar og turné, med unnatak av på albumet Bridges to Babylon, der Doug Wimbish spelte bass.
Som ein del av den britiske invasjonen i 1960-åra gjorde bandet inntrykk frå starten av med rå musikk, snerrande gloser frå Jagger, langt hår og provoserande framferd. I alle høve vart dei marknadsført slik av dåverande manager Andrew Oldham. Eit resultat av dette var at The Rolling Stones ofte vart sett som kontrasten til The Beatles.
Gruppa sitt store internasjonale gjennombrudd var med «(I Can't Get No) Satisfaction» i 1965, som nådde fyrsteplass på hitlistene både i Sambandsstatane og Storbritannia. Andre viktige innspelingar frå bandet si meir enn 40 år lange karriere er «Jumpin' Jack Flash» (1968), «Honky Tonk Women» (1969), «Brown Sugar» (1971), «Start Me Up» (1981) og LP-platene Beggars Banquet (1968), Let It Bleed (1969), Sticky Fingers (1971), Exile on Main Street (1972) og Some Girls (1978).
Etter at medlemene i bandet nytta 1980–åra til krangling i pressa og til ulike soloprosjekt, kom gruppa attende i 1989 med Steel Wheels og ein påfylgjande turne som slo alle dåverande rekordar i høve publikumstilstrøyming og økonomisk utbytte. Sidan har gruppa gjennomført rekordstore verdsturnear både i 1995, 1998 og 2003. Dei framstår endå som ei livskraftig einig - med planar om nye innspelingar og turnear, endå fleirtalet av medlemene er over 60 år.
