Herodotu
De Uiquipedia
Herodotu (-484 a.C. - -425 a.C.) foi un historiador griegu, pá de la historiografía
Orixinariu d'Halicarnaso, anguaño Bodrum, Turquía. Tres de la so participación nuna revuelta escontra'l tiranu Ligdamis tuvo que marchar al esiliu na islla de Samos, y dedicose a viaxar, viaxes que-y llevaron a Exiptu, llegando a la primera catarata del Nilu, a Babilonia, a Siria, a Libia, a Italia y a Sicilia. Vivió n'Atenas, au recoyió les tradiciones orales de les principales families, especialmente de los Alcmaeonidae.
Herodotu escribió la historia de la invasión persa de Grecia, conocida como Les histories d'Herodotu, considerada la primer obra de historia. Hasta entós, rexistrábense los acontecemientos históricos en cróniques y épiques, pero Herodotu foi el primeru en tratar el pasáu como un problema filosóficu, que permitía conocer el comportamientu humanu. Y foi el primeru en recoyer testimoños presentes nos fechos que describía, y en preocupase pola oxetividá, con abondes referencies etnográfiques. Magar que la so obra nun foi apreciada na antigüedá, (Aristóteles califícala de mitóloga), a partir del Renacimientu entamó a ser valorada.
Les histories publicose ente'l 430 a.C. y el 424 a. C., divídense en nueve llibros, que reciben el nome de les muses. Los seis primeros traten del xorrecimientu del Imperiu Persa y de la so influyencia en Grecia. Los trés últimos describen los intentos del rei Xerxes por vengar la batalla de Maratón y absorber Grecia en dientro'l Imperiu Persa.
Herodotu describe na so obra los confines de la tierra, nese contestu entiéndese la primer referencia a les islles Casitérides nel llibru terceru, anque namás pa afirmar que nun sabe d'elles nin res.
