Bonobo
Van Wikipedia
- Dit artikel is gesjreve in 't Mestreechs. 't Weurt gewaardeerd óm in dit artikel woe meugelik 't Mestreechs aan te hawte.
De bonobo of Dwergsjimpansee (Pan paniscus) is 'ne kleine saort sjimpansee, èng verwant aon en oeterlik koelik te oondersjeie vaan de Gewoene sjimpansee en bekind um zien intelligentie en minselik gedraag. Wie de gewoene sjimpansees deile ze oongevier 98,4% vaan hun DNA mèt de mins. De bonobo's leve bij de Congo-revier en weure in häör veurbestoon bedreig.
[bewirk] Fysieke kinmèrke
De bonobo is kleiner es de gewoene sjimpansee. Zien gaank is rechop, neet gebuk, wie zien verwant. De bonobo's zien in preciep vegetarisch, meh neet strik: ouch insekte weure soms gegete.
[bewirk] Gedraag
De bonobo is e groopsdier en de grope weure matriarchaal besteurd. De bieste zien dèks in verglieking mèt gewoen sjimpansees getes en haolde meistes beter rizzeltaote. Zoe kinne ze mèt behölp vaan e pleetsjesbook communicere en häör eige in de spegel herkinne. Sommeg oonderzeukers meine tot de diere ouch 'n taol höbbe - ze communicere in eder geval mèt geluud.
De bonobo is bekind geweure um de groete rol die seksualiteit in hun gemeinsjappe speult. Neet allein mèt 't oug op veurtplanting tijens 'ne paartied, meh 't gaans jaor door, ouch es oontspanning of conflikoplossing, en zoewel hetero- en homoseksueel. De seksualiteit liekent dèks op die vaan minse. Bonobo's goon gein lang relaties aon.
