Guerra de Independentia del Statos Unite
De Wikipedia, le encyclopedia libere
Le Guerra de Independentia del Statos Unite (1775-1783) es le guerra inter Grande Britannia e le colonias que se converterea posteriormente in le Statos Unite de America. Iste guerra fundamental in le historia del Statos Unite resultava in le independentia de illos.
Ante le initio del guerra, le differentias inter le diverse colonias, specialmente in le aspecto economic, esseva multo grande. Le Nord esseva un area con commerciantes e parve fermeros, durante que le economia del Sud se definiva per plantationes de tabaco, de ris e de coton, le quales dependeva del sclavitude. A causa del inimico commun francese in Canada, le duo regiones initialmente collaborava, resultante in 1763 in le conquesta de Canada post le si-nominate guerra franco-indigena. Sed le lucta esseva multo costose al pais materne, e pro replenar le cassa se imponeva al colonias taxas de plus in plus grave. Grande Britannia se effortiava etiam a impedir le processamento de materias prime in le colonias.
Le resistentia contra isto non retardava (le Boston Tea Party de 1773) e culminava in un guerra de independentia. In 1775 succedeva un combatto, e le 2 de julio 1776, le patriotas american declarava le independentia, acceptante le 4 de julio le Declaration de Independentia scribite per Thomas Jefferson. Le Guerra de Independentia durarea usque a 1783; le 19 de april de ille anno, le britannos acceptava lor disfacta al Pace de Versailles e se retraheva del Statos Unite; le republica american esseva un facto. Francia e Nederlandia esseva le prime duo paises que recognosceva le 'Statos Unite de America' (1782).
Sed le sperantia que le dece-tres colonias tanto differente sia de facto unite, se manifestava utopic. Le sol cosa in commun esseva le Articulos de Confederation, un typo de constitution que affirmava totevia principalmente le character independente del colonias. In ultra il existeva solmente un singule organo commun, le Congresso Continental, le qual se assemblava solmente alcun vices per anno. Iste alliantia laxe de statos iva curve sub le peso de grande debitas de guerra, de commercio declinante e del manco de autoritate central. Le si-nominate Federalistas propugnava un autoritate plus forte e un constitution melior.
In effecto, in 1787 esseva acceptate un nove Constitution, un processo difficile que non se completava usque se addeva al Constitution un si-nominate Bill of Rights. Iste "lege de derectos" consisteva de dece articulos continente le derectos fundamental human. Acceptante le nove constitution, le dece-tres colonias continuava como un Union de Statos Unite. George Washington deveniva in 1789 le prime presidente, un heroe ex le guerra contra le britannos.
Le prime dece-tres colonias que ratificava le constitution esseva:
- Delaware, le 7 de decembre 1787
- Pennsylvania, le 12 de decembre 1787
- New Jersey, le 18 de decembre 1787
- Georgia, le 2 de januario 1788
- Connecticut, le 9 de januario 1788
- Massachusetts, le 6 de februario 1788
- Maryland, le 28 de april 1788
- South Carolina, le 23 de maio 1788
- New Hampshire, le 21 de junio 1788
- Virginia, le 25 de junio 1788
- New York, le 26 de junio 1788
- North Carolina, le 21 de novembre 1788
- Rhode Island, le 29 de maio 1790
