Tweants
Van Wikipedie
Tweants is n dialekt van t Neersassies. Neersassies is een van de twee anerkende strektaaln in Nederlaand. De aandere is t Limbörgs. Wieders hef t Freesk al n stoatus van tweede officiële taal in Nederlaand. t Tweants wördt stöarig meender sprökn, umdat de oalders vandaag-an-n-dag meesttieds dervuur kiest um de keender in t Nederlaands groot te brengn. In de dree steedn Eanske, Hengel en Almelo is de verslatering van t dialekt völle greuter as op t plattelaand.
Tweants wördt sprökn in de meeste Tweantse gemeentn, mer nich oaveral: de meest westelike plaatsn (oonder aandere Heldern en Nijverdal) hebt un Sallaands dialekt. Der is ok gen sproake van een zölfde dialekt in de rest van 't gebeed. Weurde en oetdrukkingn könt in alle döarpe of steedn verscheln. t Meest wik t Vreeznvens of, dat völle Sallaandserieje kent, mer eignlik nich biej t Tweants en nich biej t Sallaands kan wördn indeeld. Het Vreeznvens hef wat metkregn van t Freesk van Freeske immigraantn. De meest oostelike plaatsn (Deankaamp, Oldnzel, en zoo wieder) kent nog doe as persoonlik vuurnaamwoord vuur de tweede persoon eankelvoald, woar ze in de rest van Tweante iej broekt.
t Van Deinse Instituut höald zik gangs met t now en t verledn van Tweante. Dit instituut in Eanske richt zik op de strekkultuur, de volkskönde, strektaal, kultuurgeschiedenis en t laandschop van Tweante. De Kreek vuur de Twentse Sproak höald zik bezig met ne standaardspelling van t Tweants, as ok met ne Tweantse biebelbookvertaling. De Kreenk vuur de Twentse Sproak wik lichte of van de Standaard Schriefwieze van Goaitsen van der Vliet. De Kreenk hef ne adviseernde rolle vuur de media, woaroonder RTV Oost. Dit televisiestation kwam in 2005 met ne succesvolle Tweante soapriege op televisie, Van Jonge Leu en Oale Groond. Hieran wearkn oonder aandere Herman Finkers met, den al eer twee van ziene kabaretvuurstellingn in t Tweants vertaaln.
