Eanske

Van Wikipedie

Satellietfoto: Eanske vanoet de ruumte

t Elderinkshoes in Eanske

Eanske (Nederlaands: Enschede) is ne gemeente in Tweante in de Nederlaandse proveensie Oaveriessel. Eanske is de greutste stad van t heel Tukkerlaand en ok van heel Oaveriessel. De stad lig zuudoostelik van Hengel en har in 2005 139.494 inwonners. De gemeente Eanske hef ne öppervlakte van 142,75 veerkaante kilometer en har op n eerstn meert 2006 154.448 inwonners. Dat gef ne bevölkingsdichtheid van 1094 inwonners per veerkaante kilometer. Nöast de stad Eanske zölf heurn ok de döarpe Bokel, de Glanerbrug, Lönnker en Ossel töt de gemeente, net as de landelike gebeedn Twekkel en Goorseveald. De gemeente greanst in t oostn aan de Duutse gemeente Gronau (Borken, Noordrien-Westfoaln). In t zuudwestn lig Hoksebarge, in t westn Hengel, in t noordwestn Deenkellaand, in t noordn Oldenzel en in t noordoostn Loster.

[bewark] Geschiedenis

Eanske kreag roondum 1300 stadsrechtn, dee in 1325 duur n bisschop van Uutrech wördn bevestigd. De stad steln nich völ vuur tötdat in de 18e eeuw t linngoodbedrief opkwam. Noadat Belgie in 1830 onofhaankelik van Nederlaand wördn, wördn disse industrie in Tweante duur t riek subsidieerd. Eanske wördn doarbiej de heufdplaats van t linngood. In 1862 braandn de stad noa-an heelmoals of, woarnoa de ontwikkeling van de tekstielindustrie nog völ sneller gung. In de joarn zestig en zeuvntig van de 20e eeuw gungn völle fabriekn falliet, in de joarn zeuvntig en tachntig voalgn de ofbroak van de gebouwn. Eankel n deel van t kompleks van Jannink wördn n museum. In de joarn neegntig kwam der n plan um Boorn, Hengel en Eanske biej mekaar te trekn as Tweantestad. In 2000 wördn dit plan daal smetn. Now vörmt Eanske saamn met Hengel, Boorn en t Duutse De Gronau ne agglomeroasie met kortan 400.000 inwonners.

Op zoaterdag 13 mei 2000, nen mooin meijndag, pleern ne veurwearkopslagplaats oet mekaar. Biej disse veurwearkraamp, woarbiej de hele buurt Roombeek wördn vortvaagd, kwamn 23 leu oet de tied en raakn biejnoa doeznd leu gewoond.

Vandaag-an-n-dag hef Eanske ne universiteit (Universiteit Tweante), ne conservatorium, ne keunstakademie, ne heugeschool, wat museums (woaroonder t rieksmuseum Twenthe) en n vleegveald (Enschede Airport Twente). De voetbalklup FC Twente kump oet in de eredivisie en spölt in t Arke Stadion.