Herman Finkers

Van Wikipedie

Herman Finkers

Hermenegildus Felix Victor Maria (Herman) Finkers (sprek oet: Herman Feenkers) (Almelo, 9 december 1954) is nen Tweantsn grapnmaker, den bekeand is vanweage zien dreugn humor. Seend at hee in 2000 te heurn kreag dat e leukemie hef, hef e genne vuurstellingn meer gevn.

[bewark] Kabaretkarrière

Hermänken wördn geboorn en optrökn in t Tweantse Almelo, woar e noar school gung en woar e ok de HBS duurleep. Ziene grapnmakeriejkarrière begun ongewoon as e zien stottern töt zien haandelsmeark promoveern. Zien eerste program hetn Op Zwart Zangzaad (Op Zwart Zangzoad), noar de Grönningse studeantnhumorvereaniging woarvan zien breur Wilfried Finkers oprichter en vuurzitter was.

In 1979 wonn Finkers n tweedn pries op t Dealftse Camarettenfestivaal, as ok n publieks- en n persoonlikheidspries. Töt t eand van de joarn neegntig har e völ sukses met t ene program noa t aandere. Vanof 1987 döa zien breur Wilfried met met t bedeankn van materiaal en met t weark achter de schearmn. Wilfried kwam of en too zölf ok de bönne op, steavaste as steuntelign döl.

In 2000 höaldn Herman tiedelik op met vuurstellingn geavn, doo ziene gezoondhead t m nich langer tooleut doarmet duur te goan. Toch is e in 2005 wier begonn met t vuurbereidn van ne nieje sjoo.

Herman Finkers is nen echtn dreugn in ziene vuurstellingn. A'j m vergliekt met aandere grapnmakers van vandaag-an-n-dag, is zien tempo traag te neumn, mer dat wördt kompenseerd duur ne perfekte timing vuur elke grap, woarbiej e zien vreandelike, licht keenderlike oetstroaling voloet broekt. De humor lig biej Finkers in zien oetgedachte weurdgrapn, umgekeerde logika en visuele gräpkes. Doarbiej geet e nich in op datgennige wat in t niejs is.

In zien beginjoarn bestunn zien sjoos vuural oet losse geschichtn, niejsberichtn, tilfoongesprekn en zoogeneumde one-man-sketches en maakn hee hoast nich gebroek van t decor: een rood gordien was zien enige achtergroond. In latere sjoos wördn de decors oetgebreider en wördn doar aait visuele grapn met oethaald. Hee wearkn n eankeldn keer met Brigitte Kaandorp saamn, umdat eer kabaretsjoos wat betreft stiel te geliekn bunt biej de sjoos van Herman Finkers. In zien program Geen spatader veranderd (de Neerlaandse oetvoering van Gen spatoader aans) zung e biejvuurbeeld met eer n eroties duët in ne, alleen in naam, rechtstreekse verbeending.

[bewark] Aandere aktiviteitn

Nöast grapnmakeriej höaldt Finkers zik bezig met de Tweantse taal. Zo hef e zien eign spelling vuur t Tweants ontwikkeld, ne kombinoasie van de Standaard Schriefwieze en de Kreenk vuur de Twentse sproak, wat e Eigenwies hef neumd. Zien letste twee vuurstellingn gaf e ok in t Tweants. Ok wearkt hee met an de kampanje Twents doar is niks mis met van t Van Deinse Instituut in Eanske. In de Neerlaandse tilvisieserie Baantjer spöaln hee ne moal n boer oet Weersel. Hee bleaf dan gewoon plat proatn.

Op 2 oktober 2005 kwam de in t Tweants sprökne zeepriege Van Jonge Leu en Oale Groond van regisseur Johan Nijenhuis vuur t eerst op tilvisie biej RTV Oost. Finkers was doarbiej kreatief roadgeaver, vuural duur t in t good Tweants vertaaln van alle dialoogn. Ook spöaln hee ne kleane rol in de riege.

Finkers is arg rooms optrökn en ook vandaag-an-n-dag döt e völ vuur zien geloof. Dat t roomse geloof arg belangriek vuur m is wördn dudelik as e in Een Engelhart in Rome met nen gehandicaptn neave noar Room gung um biej n paus op audiënsie te goan. Begin 2006 begunn hee zich hard te maakn vuur behoud van de Plechelmusbasiliek in Oldenzel.

Op 29 april 2003 wördn Finkers beneumd töt Ridder in de Orde van de Nederlandse Leeuw.

[bewark] Oaverzicht van theatervuurstellingn

Op Zwart Zangzaad (Op Zwart Zangzoad) (1979)
De terugkeer van Joop Huizinga (t Wierkomn van Joop Huizinga) (1982)
De Diana Ros Show (De Diana Ros Sjoo) (1983)
EHBO is mijn lust en mijn leven (EHBO is leefhebberieje) (1985)
Het Meisje van de Slijterij (t Meaken van de Slieterieje) (1987)
De zon gaat zinloos onder, morgen moet zij toch weer op (De zunne geet zinloos oonder, morn möt ze toch wier op) (1990)
Dat heeft zo'n jongen toch niet nodig (Dat hef zon jong toch nich neudig) (1992)
Geen spatader veranderd (Gen spatoare aans) (1995) (Ok in t Tweants oetvoerd oonder n titel Gen spatoader aans)
Kalm aan en rap een beetje (Heandig an en rap wat) (1998) (Ok in het Tweants oetvoerd oonder n titel Heanig an en rap wat)

[bewark] Oaverzicht van elpees/ceedees

Vinger in de bips (Vinger in n eers)
Als gezonde jongen zijnde (De terugkeer van Joop Huizinga) (As gezoond jong (t Wierkomn van Joop Huizinga)
Van zijn elpee (Van zien elpee)
EHBO is mijn lust en mijn leven (EHBO is leefhebberieje)
Het Meisje van de Slijterij (t Meaken van de Slieterieje)
De zon gaat zinloos onder, morgen moet zij toch weer op (De zunne geet zinloos oonder, morn möt ze toch wier op)
Carnaval der Dieren (Karnaval van de Deers)
Dat heeft zo'n jongen toch niet nodig (Dat hef zon jong toch nich neudig)
Geen spatader veranderd (Gen spatoare aans)
Kalm aan en rap een beetje (Heandig an en rap wat)

[bewark] Oaverzicht van deeveedees

EHBO is mijn lust en mijn leven (EHBO is leefhebberieje)
Het Meisje van de Slijterij (t Meaken van de Slieterieje)
De zon gaat zinloos onder, morgen moet zij toch weer op (De zunne geet zinloos oonder, morn möt ze toch wier op)
Carnaval der Dieren / Sint Joris Mis (Karnaval van de Deers/Seent Joaris Mis)
Kroamschudd'n in Mariaparochie / Macbeth (Kroamschudn in Mariaparochie/Macbeth: twee animoasiefilms)
Dat heeft zo'n jongen toch niet nodig (Dat hef zon jong toch nich neudig)
Geen spatader veranderd (Gen spatoare aans)
Kalm aan en rap een beetje (Heandig an en rap wat)
Een engelhart in Rome (Een diepzinnige Herman Finkers in het Vaticaan op audiëntie) (n Engelharte in Room (n deepzinnign Herman Finkers in t Vatikaan op audiënsie))