حجاج بن یوسف
وکیپیڈیا سے
پیدائش: 41ھ/661ء
انتقال: 96ھ ۔714ء
بنو امیہ کا ایک جرنیل۔ پورا نام حجاج بن یوسف الثقیفی ۔ طائف ’’حجاز‘‘ کے ایک گمنام گھرانے میں پیدا ہوا۔ خلیفہ عبدالملک بن مروان کے ایک درباری امیر روح بن زنباع الجدامی نے اس کی زہانت دیکھ کر اسے اپنی پولیس میں شامل کر لیا۔ خلیفہ نے اس کو سپہ سالار افواج بنا دیا۔ حجاج کی قیادت میں سب سے پہلی لشکر کشی حضرت عبداللہ بن زیبر کے خلاف ہوئی جو حجاز میں خلافت کے دعویدار تھے۔ حجاج نے ان کا مکہ میں محاصرہ کیا اور انھیں شہید کرکے ان کی خلافت کا خاتمہ کر دیا۔ اس نے کعبہ پر پہلے منجنیقوں سے پتھر برسائے اور پھر آگ لگا دی جس سے کعبہ کی دیواریں شق ہو گئیں۔ اور حجر اسود کے تین ٹکڑے ہو گئے۔ عبد اللہ بن زبیر کی شکست کے بعد خلیفہ عبدالملک بن مروان کی اہلیت اور صلاحیت کا گرویدہ ہوگیا۔ اب اس نے حجاج کو عراق کا گورنر مقرر کیا جو خوارج اور اہل تشیع کی آماجگاہ تھا۔ حجاج نے تھوڑے عرصے بعد اپنی سخت گیر پالیسی کے ذریعے عراق میں امن و امان قائم کردیا۔ مالک بن دینار کا کہنا ہے کہ حجاج نے عراق میں ایک لاکھ سے زیادہ انسانوں کو موت کے گھاٹ اتارا اور جب مرا تو اس وقت جیل میں پچاس ہزار مرد اور تیس ہزار عورتیں قید تھیں۔
حجاج بن یوسف عرب کے چند نامور خطیبوں شمار ہوتے ہیں۔ اس کے علمی کارناموں میں عربی زبان پر اعراب کی ایجاد ہے جس کی بدولت قرآن تلفظ کی غلطیوں سے محفوظ ہوگیا۔ غیر عرب علاقوں میں عربی زبان کو دفتری زبان کی حیثیت سے رائج کرنا حجاج کی سیاسی دوراندیشی تھی۔ محمد بن قاسم نے سندھ پر لشکر کشی اسی کی زیر ہدایت کی تھی۔ واسط کے مقام پر وفات پائی۔
