Roazekrans
Van Wikipedia
- Dit artikel is gesjreve in 't Valkebergs. 't Weurt gewaardeerd óm in dit artikel woe meugelik 't Valkebergs aan te hawte.
'ne Roazekrans ies bie de Katholieke de naam van 'n gebed en van 'n biehuèrend baesjnoor. Diet (tèl)sjnoor besjteit oet vieftièn of vief kièr tièn kralle. Um de tièn kralle ziet 'n diekker kral. Aan 't oeting hingk 'n kruuske. De roazekrans weurt gebruuk um daomèt 150 (15 kièr tièn) weesgegroetjes te baeje ter ière van de heilige maag Maria. Op de diekke kral, volg 't gebed van Oze vader. Ónder 't baeje weurt herinnerd aan 'n gebeurtenis oet 't leve van Jezus of Maria, zoawie dat in de evangelies weurt besjreve.
Me maak daobie 'n keus tösje de Bliej, Dreuvige en Glorievol geheime.
Inhawd |
[bewirk] De Bliej geheime
De Bliej geheime houte in: de annunciatie of de boodsjap van de aartsingel Gabriël aan Maria; de visitatie of 't bezeuk van Maria aan häör niesje Elisabeth; de geboorte van Jezus in Bethlehem; Jezus in de tempel.
[bewirk] De Dreuvige geheime
De Dreuvige geheime goon euver 't leve van Jezus: de doadsangs in de hof van olieve; 't geisele; de kroaning mèt 'n kroan van deun; 't drage van 't kruus en de kruusdoad.
[bewirk] De Glorievol geheime
De Glorievol geheime besjtoon oet de Verriesenis (Paosje), de Hemelvaart, Pinkstere, de opnumming van Jezus in de hemel en de kroaning van Maria in de hemel.
[bewirk] Roazeheudsje
'n Roazeheudsje ies 1/3 deil van 'ne roazekrans. 't Baesjnoor tèlt vief maol tièn krelkes aafgewiesseld mèt groater kralle. De naam kump van 't krenske roaze dat Maria of ander heilige maagde es 'n kruèntsje op de kop drage.
[bewirk] Gebruuk
De roazekrans woort vreuger, in katholieke gezinne, in de mariamaonde mei en oktober ederen daag thoes of in de kèrk gebaejd. Ouch allewiel weurt in de kèrke nog reigelmaotig de roazekrans gebaejd. De roazekransbroedergemeinsjappe höbbe 't gebruuk gesjtimuleerd en euver de waereld versjpreid. De bekèndste broedersjap ies die oet Kölle in Duutsjland, opgeriech in 1475.
