Indland

Úr Wikipediu, frjálsa alfræðiritinu

**Republic of India**
**भारत गणराज्य**
**Bhārat Ganarājya**

Fáni Indlands

Kjörorð ríkisins: Satyamēva Jayatē (sanskrít: Sannleikurinn einn sigrar)

Opinbert tungumál	Hindí, enska og 21 annað tungumál.
Höfuðborg	Nýja Delhi
Forseti	APJ Abdul Kalam
Forsætisráðherra	Manmohan Singh
Flatarmál - Samtals - % vatn	7. sæti 3.287.590 km² 9,5%
Fólksfjöldi - Samtals (2006) - Þéttleiki byggðar	2. sæti 1.091.351.995 332/km²
Gjaldmiðill	Indversk rúpía
Tímabelti	IST (UTC +5:30)
Þjóðsöngur	Jana Gana Mana
Rótarlén	.in
Alþjóðlegur símakóði	91

Lýðveldið Indland er annað fjölmennasta land jarðarinnar og það sjöunda stærsta að flatarmáli. Þar býr rétt yfir einn milljarður manns. Á síðustu 20 árum hefur Indland vaxið mikið bæði hvað varðar fólksfjölda og áhrif á svæðinu. Í dag er indverska hagkerfið það fjórða stærsta í heiminum, ef verg þjóðarframleiðsla er mæld út frá kaupmáttarjafnvægi, hagvöxtur þar var sá annar hæsti í heiminum árið 2003. Indland er langfjölmennasta lýðræðisríki heimsins og vaxandi hernaðarveldi, það hefur yfir að ráða kjarnorkuvopnum og einum stærsta herafla heimsins.

Landið er í Suður-Asíu með 7000 km langa strandlengju við Indlandshaf. Indland á landamæri að Pakistan, Kína, Mjanmar (áður Búrma), Bangladess, Nepal, Bútan og Afganistan. Srí Lanka, Maldíveyjar og Indónesía eru nærliggjandi eyríki í Indlandshafi. Indland hefur verið heimili margra elstu siðmenninga veraldar og hefur fætt af sér fjögur af stærstu trúarbrögðum nútímans: hindúisma, búddhisma, jainisma og sikhisma. Landið var hluti af Breska heimsveldinu fram til 1947, þegar það hlaut sjálfstæði.