دراوڑ
وکیپیڈیا سے
Dravidians
2500 قبل مسیح کے قریب ہندوستان پر آریہ نسل کے لوگوں نے حملہ کیا۔ یہ لوگ قد آور ، سفید فام اور خوش اندام تھے۔ برعکس ان کے شمالی ہندوستان پر اس وقت ایسے لوگوں کا تسلط تھا جن کے بارے میں آریاؤں کی کتابوں سے پتا چلتا ہے کہ ان کا رنگ سیاہ اور چہرے کے نقوش بد نما تھے۔ آریاؤں نے یہاں تک لکھا کہ ان لوگوں کو ناک بھی نہیں تھی۔ نسل کے لحاظ سے ان کو دراوڑ کہا جاتا ہے۔ آرایاؤں کو جنوب کی جانب دھکیل دیا اور انھوں نے وہاں اپنی بستیاں بسالیں ۔ یہ لوگ بہت سے قبائل میں منقسم ہیں۔ ہر ایک کی اپنی اپنی زبان ہے۔ لیکن بنیاد مشترک ہے۔
دراوڑ اپنے زمانے کی مہذب اقوام میں شمار ہوتے تھے۔ انھوں نے تقریباً چھ ہزار سال قبل مسیح زمین سے گیہوں ، جو کپاس ، گنا اگانے اور روئی سے دھاگا بنا کر کپڑا تیار کرنے کا راز معلوم کر لیا تھا۔ جب کہ یونان ، سمیریا اور روم کے لوگ سوتی پارچہ بافی سے قطعاً نا آشنا تھے۔ یہ لوگ تانبے اور کانسی کے اوزار بناتے تھے۔ لوہے کا استعمال انھوں نے آریاؤں سے سیکھا۔ آریاؤں نے لنگ پوجا، دھرتی پوجا ، بھوت پریت ، اور خبیث اروح کا تصور انھی سے لیا، اور ان کے بہت سے دیوی دیوتاؤں کو اپنا لیا۔ مورخین کے بموجب کرشن جی بھی دراوڑ ہی تھے۔ کیونکہ ان کو سیاہ فام بتایا گیا ہے۔ جب کہ آریا سفید فام تھے۔
دراوڑی تمدن کوہستان شوالک سے دریائے تاپتی اور نربدا تک ، اور کوئٹہ سے بیکانیر اور کاٹھیا واڑ تک پھیلا ہوا تھا۔ اسے ہڑپائی تمدن بھی کہتے ہیں کیونکہ اس کے دو مرکزی شہروں میں موہنجو دڑو کے علاوہ ہڑپہ بھی تھا۔ بعض علما آثار قدیمہ نے دراوڑی تمدن کے زمانے کا تعین ’’2500 ق م اور بعض نے 3250 ۔۔۔1750 ق م کیا ہے۔ گویا دراوڑی تمدن مصر اور سمیریا کا معاصر تھا۔
