آئی آئی چندریگر روڈ
وکیپیڈیا سے
ابراہیم اسماعیل چندریگر روڈ یا آئی آئی چندریگر روڈ پاکستان کی "وال اسٹریٹ" سمجھی جاتی ہے۔ یہ شاہراہ کراچی کے قلب میں واقع ہے۔ برطانوی راج کے دوران یہ میکلوڈ روڈ کے نام سے جانی جاتی تھی لیکن آزادی کے بعد اسے پاکستان کے سابق وزیراعظم ابراہیم اسماعیل چندریگر کے نام سے منسوب کردیا گیا۔
پاکستان کے اکثر مالی اداروں کے صدر دفاتر آئی آئی چندریگر روڈ پر ہی قائم ہیں جن میں اسٹیٹ بینک، حبیب بینک پلازہ، ایم سی بی ٹاور، نیشنل بینک، بینک الفلاح، اسٹینڈرڈ چارٹرڈ بینک اور سٹی بینک وغیرہ شامل ہیں۔
پاکستان کے سب سے زیادہ فروخت ہونے والے اخبار جنگ اور پاکستان کے سب سے بڑے نجی ٹیلی وژن چینل جیو کا دفتر بھی اسی شاہراہ پر ہے۔ اس کے علاوہ کئی اخبارات اور ٹی وی چینلوں کے دفاتر یہاں قائم ہیں۔
آئی آئی چندریگر روڈ کراچی کی معاشی سرگرمیوں کا مرکز ہے۔ کراچی اسٹاک ایکسچینج اور کراچی کاٹن ایکسچینج سمیت کئی مالی و کاروباری اداروں کے دفاتر یہاں موجود ہیں۔
اس شاہراہ پر کراچی کی کئی خوبصورت قدیم عمارات بھی قائم ہیں۔
