Almere

Van Wikipedia

Dit artikel is gesjreve in 't Mestreechs. 't Weurt gewaardeerd óm in dit artikel woe meugelik 't Mestreechs aan te hawte.

Almere (in de moond vaan Limburgers zouw deze naom in Almaere kinne verandere) is 'n stad en gemeinte in 't zuidweste vaan de provincie Flevoland, in de polder Zuidelik Flevoland. Börgemeister is Annemarie Jorritsma (VVD). 't Groondgebeed beslaot 130,47 km²; mèt 174.822 inwoeners op 1 januari 2005 is 't inmiddels de achste stad vaan Nederland; 't moot oeteindelik de vijfde weure. 't Is ouch de joongste stad, gestiech in 1976. De stad ligk aon de rieksweeg A6 en aon 't spoor vaan Lelystad nao Amsterdam. Ze besteit oet veer houfkèrne: Almere-Haven, Almere-Stad, Almere-Buiten en Almeerderhout.

Almere is geneump nao de glieknaomege binnezie, die de vreugmiddelieuwse veurluiper waor vaan de laoter Zuiderzie.

[bewirk] Stadsfuncties

De stad is gein houfstad vaan Flevoland en is veural es euverloupgebeed vaan en slaopstad veur Amsterdam in gebroek - 't dialek vaan Almere is daan ouch gliek aon dat vaan Amsterdam. In recènte tije zien poginge gedoon - soms mèt meender, daan mèt mie succès - veur 't publiek leve vaan Almere te verlevendege, beveurbild door 't Metropole-theater en e supporteringsplan veur nui kaffees. In 2005 zal de vootbalclub FC Omniworld in de Ierste Devisie vaan 't betaold vootbal goon oetkoume.

[bewirk] Stadsbild

Almere heet es nui stad nog gein echte monuminte. In 't cintrum en in Almere-Haven weurt al eint en aandert gesloop, wat twinteg jaor geleje nog es ideaal gold. Markante gebouwe zien 't Metropole-theater (in de volksmoond De Roestbak geneump) en 'ne stellaazj op de Merret, dee es mobiel podium deensdeit. In Almere-Buiten, 't nuier diel, zien de markantste hoezer te veende: zoe höbbe in de Regenboogbuurt al hoezer de kläör vaan de betreffende straotnaom. Me streef denao in de touwkums mie leech onconventioneel bebouwing nier te zette.

Door zie ligking aon 't Ieselmeer aon de wes- en zuidzij speult waoter 'n groete rol in de stad en lègke väöl jachte dao aon.

[bewirk] Historie

In de jaore viefteg, wie mèt 't werk aon Zuidelik Flevoland begonne woort, plende me veur 't iers 'n stad in de polder, die de veurloupege naom Zuidweststad kraog. Laoter woort de naom Almere bedach. In 1976 woorte de ierste hoezer opgeleverd, en wel in Almere-Haven. De stad waor daan veural 'n euverloupgebeed veur Amsterdam. In 1980 kaome de ierste bewoeners in Almere-Stad en laoter nog Almere-Buiten. Vaanaof 1984 vörmp de stad 'n zelfstandeg gemeinte. In de bebouwing vèlt 'nen trend te zien vaan sociaal nao mie exclusief bebouwing: in de jaore tachteg en negenteg zien mie hoezer veur rieker lui gebouwd. In 1987 woort de stad op 't spoorwegenet aongeslote.