Eldoret
From Wikipedia
Eldoret ni mji wa Kenya ya magharibi. Iko kwenye barabara kuu Nairobi - Kampala takriban 300 km kutoka Nairobi katika nyanda za juu kwenye kimo cha 2100 m - 2700 m juu ya UB. Ikiwa na wakazi 218,472 (mwaka 2005) ni mji mkubwa wa tanu Kenya na makao makuu ya wilaya ya Uasin Gishu.
Eneo la Eldoret ni nyumbani ya Wamassai na Wakalenjin hasa kabila la Wanandi. Mji mwenyewe ulianzishwa wakati wa ukoloni mwaka 1910 kwa kufungua kituo cha posta mahali ambako reli ya Mombasa-Uganda ilitakiwa kupita baadaye. Wakati ule makaburu kadhaa kutoka Afrika Kusini walihamia Kenya wakitafuta mashamba mapya baada ya kushindwa na Waingereza vitani. Uingereza ilitaka kupatanisha makaburu na hali ya kulazimishwa kuwepo chini yake kwa kuwafungulia milango katika maeneo yake mengine. Mashamba ya walowezi wale katika nyanda za juu za Uasin Gishu yalikuwa msingi wa kiuchumi kwa maendeleo ya mji mchanga ulioitwa Eldoret kuanzia mwaka 1912.
Tangu 1924 Eldoret iliunganishwa na njia ya reli, 1928 mji ulipata maji ya bomba na tangu 1933 palikuwa na umeme. Siku hizi Eldoret ni mji wa Kneya unaokua haraka. Rais Daniel Arap Moi alianzisha miradi mingi katika mji wakati wa utawala wake kama vile Chuo Kikuu na kiwanja cha ndege cha kimataifa kikubwa kushinda mahitaji ya mji.
Eldoret ni nyumbani kwa wakimbiaji mashuhuri wa Kenya kama Kipchoge Keino. Kimo cha juu ni mazingira ya kufaa kwa mazoezi ya kukimbia kwa sababu mkimbiaji aliyezoea hapa huongeza uwezo wa mapafu yake atakuwa na faida akishindana baadaye kwa kimo cha chini.
