Pohjola
From Wikipedia
| A Duomu dû celu. B La stidda dû Nord C La culonna dû celu |
D Kinahmi, lu Giru E Pohjola, la riggiuni dû nord F Lu munnu d'abbitanti |
G Lintukoto ô stremu dû munnu H La terra dî morti, Tuonela, facirmenti sutta supra |
Pohjola è un postu a cui fa rifirimentu la mituluggìa fìnnica, idintificannu cu Pohja (ca significa "Nord") lu centru dâ terra dû Nord, la riggiuni pulari, e ntô regnu dû Kaleva, la terra dî Sami.
Ntô munnu attuali Pohjola cumprenni tirritorî dâ Lapponia e di l'anticu Kainuu'. Pohjola pò essiri puru ntinnuta simpricimenti comu un postu mìticu, figurativamenti l'urìggini dû Mali, na luntana terra dû Nord, c'un friddu tirrìbbili, dunni vennu li malatìi e lu jelu. Pohjola è nimica di Väinölä — la terra di Kelava.
Ntâ mituluggìa, la Signura di Pohjola è Louhi, na maara tinta cu granni putiri. Lu gran firraru Seppo Ilmarinen cria Sampo câ sò magia e cci la duna comu pagamentu pi maritarisi a sò figghia. Sampo è na macina maggica d'abbunnanza (comu la Cornucopia), chi pruduci abbunnanza pâ genti di Pohjola, ma lu sò cuperchiu rapprisenta la cappa cilestri, trapuntata di stiddi, chi firria ntunnu a la culonna cintrali dû munnu. Autri pirsunaggi di Kalevala circaru di maritarisi chi figghi fimmini di Pohjola. Chissi foru l'avvintureru Lemminkäinen e lu granni saggiu Väinämöinen. Louhi vulia d'iddi miracoli simili a chiddu chi fici Sampo, p'asempiu comu vinciri lu Cignu di Tuonela. Quannu un pritinnenti arrinescia âviri na figghia, si facìanu matrimoni e festi granni ntô saluni di Pohjola.
Lu funnamentu di la culonna dû munnu, voli diri, li ràdichi di stu "arvulu dû munnu", si truvàvanu, secunnu la mituluggìa fìnnica, ntôn puntu appena appena passatu l'urizzonti sittintriunali, ntô Pohjola. La criazzioni di Sampo e lu sfruttamentu dâ sò abbunnanza dâ maara Louhi, ntô nternu di na granni muntagna ntâ zona cchiù scura di Pohjola; la lotta e la guerra dî genti dû sud pi libbirari Sampo e usarila pî propî bisogni, e la cunsiquenti ruttura di Sampo e la perduta di ddu mpurtanti cuperchiu (ca significa la ruttura di l'arvulu dû munnu ô polu nord) custituiscinu nzemmula lu nucleu di lu matiriali dû Kalevala.
Rifirimenti:
