科學
出自維基百科，自由嘅百科全書
科學（來自日文翻譯。英文：science，源自拉丁文 scientia）係指有系統咁得到知識。佢係基於體驗、實驗、方法同自然。科學亦都引伸到所有由研究得來，有文有路嘅人類知識。中文之前係譯格致，來自格物致知。
科學家堅持科學研究一定要跟足科學方法。科學方法就係一個獲取同埋評估知識嘅過程。佢假設咗一切出於自然嘅嘢都可重覆驗證。科學唔理任何唔可重覆驗證嘅嘢，而叫呢啲嘢做超自然。無咁嚴格咁講，科學係用來描畫所有有系統嘅研究。專門一科用上面方法嘅都可以叫科學。呢度集中講科學嘅定義。
科學各門可以分為兩大類：
- 自然科學，研究大自然現象，包括生物。
- 社會科學，有系統咁研究人類行為同社會。
數學同其他科學有同有唔同。有人會分佢出來，叫形式科學。數學同其他科學一樣咁嚴格，咁有結構。主題都係講數量，結構，空間同變化。但係，佢搵結果嘅方法就好唔同。科學唔可以無咗數學，數學甚至引發其他科學有重大突破。科學上嘅發現，過程講解，社會科學裏面人係點想點做，為呢啲整假說，理論，定律都無可避免要用到數學。
上面講嘅科學有時會叫做純科學，而研究點畀人用嘅叫應用科學。
[編輯] 語原
英文叫科學做 science，來自拉丁文 scientia「知識」、「學問」。拉丁文有一句 scientia potentia est，就係『知識就是力量』咁解。佢傳到中國叫格致，來自格物致知。康有為由日本引入科學一詞。
要知道一直到啟蒙時代，拉丁文 scientia（同佢響其他文變化）都係有系統或有記錄嘅知識。個意思係好廣泛。有啲話都一直保留呢個意思。
公元1600年到1800年，科學叫自然哲學 (natural philosophy)，以別於研究人嘅行為同互動嘅道德哲學 (moral philosophy)。到1800年就讓位畀自然科學。之後自然科學就縮到家下嘅範圍，即係包括物理科學同生物科學。而道德哲學就變咗做社會科學，家下因為佢都跟科學方法，都邊歸埋入科學。而今時今日嘅道德哲學，就係哲學一支，專講道德 (ethics)。
