Guld'nspoornslag
From Wikipedia
Kort achter de Brugse Mett'n woster up 11 juli 1302 de Guld'nspoornslag. Doa versloeg’n de Vloamingen, in under strid vôor onafanklikeid van Frankrik, ’t Frans ridderleger ip de Groeniengekouter bie Kortrik.
[bewerk'n] De Guld'nspoornslag: 11 juli 1302
’t Vlams leger was tussen de 8500 en de 11000 man, woaronder mo 350 te peirde. Doavan moen der tussen de 2600 en 3700 van Brugge zelve gewist ein, woaronder 350 kruusboogschutters. Dedeze werden angevoerd deur Willem van Gulik. De Bruggeliengen pakten de rechterkant voar under rekenienge. Up de lienkerkant stond er een evengrôote groep van soldoaten ut Oudenoarde, Olst en Kortrik, me nog ekêe 700 Gentenoars angevoerd deur Jan Borluut. In ’t midden de mannen van ’t Brugse Vrieje en der was ton oak nog een groep van 500 striders ut Ieper die der vôren moest zorgen dat er niemand koste utbreken ut kastêel bie Kortrik. Jan van Renesse, die den algemênen anvoerder was, oad oak nog ekêe 500 man in reserve in de twêede linie.
De Franse woaren met ongeveer 2700 ridders te peirde en 4000 man te voete, woaronder 1000 kruusboogschutters. In dien tid rekenden ze da êene man te peirde ongeveer even sterk was of tiene te voete, woadeure da ’t Frans leger eigenlik vele sterker was. En da makte den anvoerder van de Franse, Robert van Artois, veel t' overmoedig. Je peisde dat ie de Vloamingen me ze ridders geweune onder de voet kost lôpen.
Volgens de Belgische geschiedenisboekstjes en de Vlamingen gewonnen deurdan de Franse da nie gezien an dat ter doar un beke was woadan ze nie over kosten springen met under peirden. De Belgische geschiedenisboekstjes ent eigenlik oltid nogoal moeilik get met ’t feit dan die zogezeide Vlamsche boertjes doar in 1302 de finefleur van Frankriek kunnen versloan ein.
In ’t echt woaren der buten de gesteldheid van ’t pling nog een poar factoren die voa d’overwinnienge gezorgd en:
- Ten êeste woaren de Vlamingen tènn: ze woaren ’t stroentebeu en moegetergd tot en met, woadeure dan ze stif fanatiek woaren.
- Ten twêede aan ze un woapen, den fameuzen goeiendag (kiekt rechts), un sôorte knots van ne meet'r nolf lang met un izeren punt olboven, woamee dan ze deur de bepantserienge van de Franse kosten steek'n. (Dus nie un stok met nen izeren keten en un bol mè pinnen up lik da je soms in de boekstjes ziet (kiekt lienks)).
- En ten derde voagden z’under voeten an de regels die der normoal in zôon veldslagen woaren: normaal was 't de bedoelienge da je probeerde ridders gevangen te pakken en da je der ton un losgeld vô kost vragen. De Vlamingen woaren ’t zo beu dan ze de Franse ter platse dôodsloegen (lik dan de Franse ôok met de deze die gin ridder woaren zoen gedoan en).
In dien tide mocht mo juste den oogsten adel goedene spoaren dragen. Achter de slag ein ze 800 spôor'n ipgerapt, wa da toch wel beweesd wafer slachtienge dan de Vlamingen doar aangericht en.
En dat gêen klêen veldslachstje wos bewist oak dan ze drekt ulder bode noa de paus in Rome steurden die em ut zun bedde oalde vô te vertellen dan de Vlamingen de Franse verslegen aan.
