Mwanzo (Biblia)
From Wikipedia
Kitabu cha Mwanzo ni kitabu cha kwanza katika Agano la Kale au Biblia ya Kiebrania. Kwa asili kimeandikwa katika lugha ya Kiebrania, na katika lugha hiyo kinaitwa Bereshit, maana yake “mwanzoni”.
Pia ni kitabu cha kwanza cha Torati (au: Torah), maana yake sheria ya kidini ya Wayahudi, yaani vitabu vitano vya kwanza vya Agano la Kale. Wengine wanaviita vitabu vitano vya Mose (au Musa) kwa vile inafikiriwa kuwa Mose ni mwandishi wa vitabu hivyo.
Biblia ya Kiebrania ilipotafsiriwa katika lugha ya Kigiriki au Kiyunani, iliitwa Septuaginta, maana yake “sabini” kwa vile inafikiriwa kuwa wataalamu sabini walifanya tafsiri hiyo. Katika tafsiri hiyo, kitabu cha Mwanzo kinaitwa Genesis, maana yake “asili” au “uumbaji”. Vitabu vitano vya kwanza vinaitwa kwa Kigiriki Pentateuko, maana yake “Kitabu katika sehemu tano”.
Kitabu cha Mwanzo kina sura hamsini. Katika sura 1 hadi 11, historia ya awali ya kale juu ya binadamu inasimuliwa. Sura 12 hadi 50 inahusu historia ya kale ya Wayahudi au Waisraeli. Hasa zinataja hadithi juu ya wazee au mababu wa Waisraeli, kama Abrahamu, Isaka, Yakobo na Yosefu.
