Frankfurt am Main

De Wikipedia, le encyclopedia libere

Panorama de Frankfurt

Frankfurt in Germania

Frankfurt am Main es le urbe le plus grande in le stato Hessen in Germania, e le quinte in Germania integre. Le urbe es situate al ripa dextere del fluvio Main e ha circa 660 000 habitantes (le agglomeration ha quasi 2 milliones). Le blason de Frankfurt es un aquila blanc super un fundo rubie.

Le citate es le centro financiari principal de Germania: le Bundesbank e le bursa german es situate ibi, assi como le Banca Central Europee, rendente Frankfurt tanto prominente como London in le financias de Europa. Frankfurt ha etiam un aeroporto importante. Le urbe es cognoscite como le del expositiones, specialmente a causa del Buchmesse, le exposition annual del casas editorial. Un del jornales autoritative de Germania, le Frankfurter Zeitung, ha su sede hic.

Un characteristica de Frankfurt rar in Europa es le aspecto urban moderne dominate per grattacelos, supernominante lo Mainhattan. Specialmente le officios central del grande bancas (Commerzbank, Dresdner Bank en Deutsche Bank) e del Federation German de Football salta al oculo.

Frankfurt es hodie un metropole 'juvene', grande e moderne, e es decime in le lista de citates mundial.

[modificar] Historia

Le centro historic del crescimento del citate esseva le Dominsel, un insuletta inter duo brancas del riviera Main, jam occupate desde le Neolithico. Post inhabitation per celtas, romanos e alemannos, le loco deveniva circa 600 un corte regal del merovingianos franc. Es como iste que Franconofurd ("le vado del francos") esseva nominate pro le prime vice in un scriptura del imperator Carolo Magne del anno 794. Le imperator del Sacre Imperio Roman Ludovico le Germanico seligeva Frankfurt como su residentia. In 1220 le urbe recipeva le rango de libere citate imperial e desde 1356 esseva permittite in virtute del Bulla de Auro le election de principes-electores. Desde 1562 le urbe esseva etiam le citate de coronation del imperatores german.

Frankfurt esseva inter 1816 e 1866 le sede del Bundestag. In 1848 le prime parlamento german se assemblava in le Ecclesia de Paulo. Prussia incorporava in 1866 Frankfurt. In le Secunde Guerra Mundial, Frankfurt suffreva bombardamentos grave. Le citate esseva proponite post le guerra, a causa de su historia e de su location central, como capital de Germania del West, sed finalmente Bonn recipeva ille honor. Frankfurt se satisfaceva ergo de devenir le capital economic del Germania postbellic, e lo remane usque hodie.