Казань

Материал из Wikipedia.

Казань — Россия Федерациысь кар, Татарстан Республикалэн шоркарез, вузкаронъя, транспортъя, наукая, религияя но промышленностья центр.

Улӥсьёсыз:(2005):

1,110 млн. адями (карлэн границаосаз) (Россиетӥ 8-тӥ интыын),
1,161 млн. адями (муниципальной образованилэн границаосаз) (Россиетӥ 6-тӥ интыын),
1,360 млн. адями агломерациын (Россиетӥ 9-тӥ интыын).

[Тупатыны] Нимыз но историез

Та карлэн вашкала удмурт нимыз (али вакытэ со пумозяз вунэмын ӧвӧл на) — Кузон, бигер кылын — Казан. Со нимлэн кытысь потэмез пумысен учёнойёс огкылэ вуэмын ӧвӧл. Тужгес оскымын луэ таӵе версия, кудӥз Казаньлэсь нимзэ Булгарын 1367-1370 аръёсын кивалтыса пукем Хасан-ханлэн нимыныз герӟа.

Казаньлэн кылдон дырыз пумысен но споръяськонъёс мыно. Бигер археологъёс оскыто, Казань 1005 аръёсы волга булгаръёслэн карзы луыса кылдытэмын вал. Мукет учёнойёс талы уг оско, Казань, пе, XIII даурлэсь вазьгес кылдыны уг быгаты вал, шуо. Кызьы ваньмыз со зэмзэ вал, шуг вераны.

Котьма ке но, XIII-XIV дауръёсы Казань Зарни Ордалэн вузкаронъя но политикая центръёсыз пӧлысь бадӟым рользэ шудэ. 1408 аре Казаньысь кивалтӥсьёс асьсэлэсь коньдонзэс поттыны кутскизы. 1438 арысен Кузон ханстволэн шоркарез луэ.

1552 арысен Казань Россие пыре. Со аре Россиысь эксэйлэн Иван Грознойлэн ожгарчиосыз басьтӥзы но быдэс Кузон ханствоез киултыны кутскизы (ӧжыт бергес Россие лымшор удмуртъёс но пыриллям). 1708 арысен Казань — Казан губернялэн центрез. 1919 аре со луиз огъя Бигер-Башкорт АССР-лэн шоркарез, нош 1920 арысен со нимаз Бигер АССР-лэн шоркарез луэ ини. 1990 арысен со — Татарстан Республикалэн шоркарез.

[Тупатыны] Казаньлэн ролез историын

Уно аръёс ӵоже Казаньын пукиллям лымшор удмуртъёслэн кивалтӥсьёссы — нырысьсэ бигеръёс, собере ӟучъёс. Отысь быдэс Волга-Урал регионэтӥ паськыт вӧлмыны кутскиз христиан оскон. Казаньысь университет калыкез югдытонъя туж бадӟым рользэ шудӥз. Университетлэн типографияз печатламын вал нырысетӥ удмурт книгаос (1847). Казаньын ик дасямын вал нырысетӥ удмурт грамматика (1775). Отын ик нырысьсэ малпамын вал нимысьтыз удмурт алфавит (Ильминскилэн алфавитэз; 1870-тӥ аръёсы). Революцилэсь азьвыл Казаньын дасямын но поттэмын вал уно удмурт книгаос.