Return to Castle Wolfenstein
Vu Wikipedia, der fräier Enzyklopedie.
Return to Castle Wolfenstein (ofgekierzt RtCW) ass en Ego-Shooter vun id Software, deen op der Quake-3-Engine baséiert. En ass 2001 op de Moart komm a gëllt als Remake vun engem vun deenen éischten Ego-Shooter, Wolfenstein 3D, och wann déi graphesch Fortschrëtter an déi haaptsächlech op anere Plaze wéi dem Schlass selwer lokaliséiert Geschicht just nach ganz wäitleefeg un d'Original erënneren.
D'Spill ass an der Zäit vum Zweete Weltkrich ugesidelt, mee et fëscht och ganz staark am surreale Rayon. Den alliéierten Agent B.J. Blazkowicz gouf mam Agent One an Däitschland geschéckt fir Rumeuren nozegoen iwwert e perséinleche Projet vum Heinrich Himmler, der SS Paranormal Divisioun, déi anscheinend Recherchë mécht iwwert d'Operstoe vun Doudeger, biotechnesch verännert Iwwerzaldoten a geheim Superwaffen. Déi zwéin Agente ginn awer erwëscht an am Schlass Wolfenstein gefaange gehalen. De Spiller iwwerhëlt d'Roll vum Blaskowicz a muss kucke fir aus dem Schlass ze entwëschen an da seng Missioun zu Enn ze bréngen. Um Wee vu Level zu Level begéint een Nazien, Zombien a Mutanten an esou verschiddenen Dekore wéi Norwegen, enger mysteriéiser Kierch, enger Stealth-Missoun, engem Duerf mat Resistenzler, de geheime Laboe vun der SS Paranormal Divisioun, etc., bis datt een zum Schluss virum ondoudege Sachseprënz Heinrich I. steet, der gréisster Gefor fir d'fräit Europa...
An Däitschland huet d'Spill Kultstatus erreecht, wuel wéinst den op Europäer karikaturhaft wierkende Protagonisten an der Handlung op vëlleg onrealisteschen Uerten, mee sécher och duerch de Reiz vum Verbuedenem: déi englesch Originalversioun ass an Däitschland wéinst den Nazisymboler verbueden an déi däitsch entschärfte Versioun ass indizéiert (zu Lëtzebuerg gëtt et wéi an deene meeschte Länner keen esou e Verbuet).
Nieft der Singleplayer Campaign huet d'Spill och nach e Multiplayer Modus, wou verschidde Charaktere mat ënnerschiddleche Fähegkeeten (Lieutenant, Medic, Engineer an Zaldot) zesumme musse schaffe fir ze gewannen (Fändele rafen oder Objeten dynamitéieren). Et gëtt eng Hellewull vu Kaarten, déi ee sech och selwer programméieren an op e Server eropluede kann.
Eng komplementär Singleplayer Campaign ass Return to Castle Wolfenstein: Diversant (éischter seelen ze fannen) an als Nofolger vum Multiplayer Modus gëtt et gratis fir ze downloade Wolfenstein: Enemy Territory (staark verännert Konzept, och wann d'Iddi vum Team erhale blouf).
