Erna Hennicot-Schoepges

Vu Wikipedia, der fräier Enzyklopedie.

D'Erna Hennicot-Schoepges (*24. Juli 1941 zu Diddeleng) ass eng Lëtzebuerger Politikerin.

Si fänkt hir berufflech Carrière als Musiksprofessesch um Conservatoire vun der Stad Lëtzebuerg (si ass Pianistin) an ënnert dem Pseudonym "Colette" als Mataarbéchterin vu Radio Lëtzebuerg un. Vun 1976 bis 1987 ass si am Gemengerot vu Walfer a gëtt 1988 Buergemeeschtesch vun deer Uertschaft (bis Januar 1995).

1979 gëtt si fir d’éischte Kéier op der Lëscht vun der CSV an d’Chamber gewielt an duer zanterhir all Kéiers erëmgewielt.

Tëscht Juli 1989 a Januar 1995 ass si Presidentin vun der Chamber.

Niewent der Chamber ass si och Member vun aneren Assembléeën: 1984-1989 vum Europarot, 1989-1995 vum Conseil parlementaire interrégional, wouvunner se Vizepresidentin, da Presidentin ass, an 1991-1995 vun der Assemblée parlementaire vun der Organisatioun fir Secherheet an Zesummenaarbecht an Europa.

Vum Januar 1995 bis 1999 ass si an der Regierung Juncker-Poos Kultur- an Erzéiungsministesch, a gëtt, no de Wahle vun 1999, Ministesch fir Kultur, Erzéiung a Fuerschung an ëffentlech Aarbéchten an der Regierung Juncker-Polfer.

Vun 1979 bis 1988 ass d’Erna Hennicot-Schoepges Presidentin vun de Chrëschtlech-Soziale Fraen a vum Februar 1995 bis am Januar 2003 ass se Presidentin vun der CSV.

Zanter 2004 ass d'Erna Hennicot-Schoepges Deputéiert vum Europäesche Parlament.

D'Erna Hennicot-Schoepges ass Éirendokter vun der Sacred Heart University Lëtzebuerg an dem Miami University John E. Dolibois European Center.

Si ass bestuet a Mamm vun dräi Kanner.