Däitsch-Lëtzebuerger Naturpark
Vu Wikipedia, der fräier Enzyklopedie.
Den Däitsch-Lëtzebuerger Naturpark ass en Naturpark iwwer d'Grenzen ewech, deen de 17. Abrëll 1964 duerch e Staatsvertrag tëscht dem däitsche Bundesland Rheinland-Pfalz a Lëtzebuerg geschafe gouf. Et wor deemools deen éischte grenziwwerschreidenden Naturpark a Westeuropa.
Den Naturpark huet eng Surface vu 789 km², dovunner leien der eng 350 km² a Lëtzebuerg a 440 km² a Rheinland-Pfalz. Deeler vun der Äifel a vum Éislek op béide Säite vun der Sauer an der Our gehéieren derzou. Nërdlech stéisst en un den Däitsch-Belsche Naturpark Héicht Venn-Äifel.
1990 sinn 2 national Ënnerstrukture geschafe ginn, fir d'Verwaltung méi efficace ze maachen:
- den Naturpark Südeifel op der däitscher Säit
- den Naturpark Our op Lëtzebuerger Säit.
Déi national Naturparke schaffen am Kader vun INTERREG-Projeten zesummen, z.B. beim Projet Nat’OUR fir d'Our ze renaturéieren.