Белае піва
Зьвесткі зь Вікіпэдыі — вольнай энцыкляпэдыі.
«Бе́лае» пі́ва — традыцыйная еўрапейская назва гатункаў піва, якія вараць пераважна ці ў значнай ступені з пшанічнага соладу.
Назва паходзіць ад белаватай смугі ад дражджэй — пераважная большасць гатункаў пшанічнага піва спажываецца ў нефільтраваным выглядзе, а таксама ад сугучнасці слоў «белы» і «пшаніца» ў германскіх мовах. Класічнае пшанічнае піва — абавязкова верхавога браджэння. Адрозніваюць 3 асноўныя стылі: баварскае Weissbier, фламандскае Witbier і берлінскае Berliner Weisse.
Баварскае Weissbier, са шчыльнасцю 11 – 14 % і мацункам каля 5,5 %, варыцца пераважна з пшанічнага (не менш за 50 %), а таксама ячменнага соладу. Прыкметна саладзейшае за большасць звыклых ячменных гатункаў. У нямецкамоўных краінах пашыранае азначэнне нефільтраванага варыянту гэтага стылю як Hefeweizen («дрожджы–пшаніца»), ёсць і гатункі, якія адмыслова фільтруюць (Kristall). Бутэлечны Hefeweizen звычайна разліваюць крыху недабрадзіўшым. Фламандскае Witbier вараць з сумесі ячменнага соладу і несаладжонай пшаніцы, часам з дадаткам невялікай колькасці пшанічнага соладу і аўсу дзеля мяккасці. Хмелю дадаецца зусім крыху, але затое шчодра ўжываюцца розныя іншыя араматызатары — каляндра, імбір, духмяныя перцы, нават сушаныя апельсінавыя лупіны. Berliner Weisse, даўкае, падсалоджанае піва, асабліва папулярнае ў ваколіцах германскай сталіцы, жаўнеры Напалеона калісьці ахрысцілі «шампанскім поўначы».
Пасля Другой сусветнай вайны пшанічнае піва амаль знікла з ужытку па ўсім свеце. Вяртанне папулярнасці «белага» піва, якое стала відавочнай у канцы XX стагоддзя, звязваюць з высілкамі баварца Вернэра Бромбаха і фламандца Пьера Сэліса. У Сярэднявеччы піва з пшаніцы не было рэдкасцю і ў Беларусі. Кісла-салодкае, яно найлепш адпавядала ўлюбёнай тагачаснай смакавай гаме. Як правіла, яго называлі проста «пшанічным», але сустракалася і еўрапейскае азначэнне «белага» піва: «Устава нового и старого мыта, з скарбу выданая месту Могилеву» (1629) усталёўвала мытны збор за «белае» піва ў памеры 1 грош за бочку віленскую. Пшанічнае піва, агульнаеўрапейскі сімвал багацця і дабрабыту, часта згадваецца ў беларускіх народных песнях, асабліва вясельных і жніўных:
- А дзіва ж нам, дзіва,
- Што пшоннае піва.
- Чаго таму дзівіціся,
- Што можна напіціся?
- Артыкул створаны з дапамогай матар'ялаў з: Алесь Белы, праект «Наша Ежа»