İlham Heydər oğlu Əliyev
Vikipediya, açıq ensiklopediya - ویکیپدیا ، آچیق انسایکلوپدیا
İlham Əliyev, Azərbaycan Respublikasının Prezidenti.
İlham Heydər oğlu Əliyev 1961-ci il 24 Dekabr-da Bakı şəhərində anadan olmuşdur. Orta məktəbi 1977-ci ildə Bakı şəhərində bitirmişdir. Orta məktəbi bitirdikdən sonra həmin il Moskva Dövlət Beynəlxalq Əlaqələr İnstitutuna daxil olmuşdur.
1985-ci ildə disertasiya müdafiə edərək Tarix elmləri namizədi dərəcəsini almışdır. Elə həmin ildən Moskva Dövlət Beynəlxalq Əlaqələr İnstitutunda müəllim kimi fəaliyyət göstərmişdir.
1991-ci ildən başlayaraq şəxsi biznes sahəsində çalışmışdır.
1994-2003 cü illərdə Azərbaycan Respublikası Dövlət Neft Şirkətinin vitse-prezidenti, bir müddət sonra isə I vitse-prezidenti olmuşdur.
1997-ci ildən Milli Olimpiya Komitəsinin prezidenti kimi fəaliyyət göstərir.
1995 və 2000-ci illərdə Azərbaycan Respublikasının Milli Məclisinə keçirilən seçkilərdə Qaradağ rayonundan deputat seçilmişdir. 2003-cü ildə Baş Nazir seçilməsi ilə əlaqədar olaraq Milli Məclisdə onun deputat kimi fəaliyyətinə xitam verilmişdir.
2001-2003-cü illərdə Avropa Şurası Parlament Assambleyasında (AŞPA) Azərbaycan Respublikası Milli Məclisinin nümayəndə heyətinin rəhbəri olmuşdur.
2003-cü ilin yanvarında Avropa Şurası Parlament Assambleyası sədrinin müavini, AŞPA-nın Büro üzvü seçilmişdir.
2003-cü il 15 Oktyabr-da Azərbaycan Republikasının Prezidenti seçilmişdir. Prezident seçkilərində seçicilərin 76%-dən çoxu İlham Əliyevin lehinə səs vermişdir. 2003-cü il 31 Oktyabr-da vəzifəsinin icrasına başlamışdır.
Azərbaycan, Rus, İngilis, Fransız və Türk dillərini mükəmməl bilir.
Evlidir. Üç övladı var.
