Trois-Rivières
vanuit Wikipedia, die vrye ensiklopedie.
Trois-Rivières is 'n nywerheidsentrum in die sogenaamde Cœur-du-Québec ("die Hart van Québec") van die provinsie Québec, Kanada, aan die noordoewer van die Sint-Laurensrivier en by die monding van die Saint-Mauricerivier. Die naam "Drie Riviere" gaan terug op die optiese illusie wat die mondingsgebied van die Saint-Mauricegebied gee en word sedert die einde van die sewentiende eeu gebruik. Die inwoners word dikwels die "Trifluviens" genoem.
Dit is op een na die oudste stad in die provinsie wat reeds in 1634 deur 'n Ursulieneklooster gestig is en die belangrikste stad tussen Montréal en Québec (stad). Trois-Rivières is ook die hoofstad van die Mauricie-gebied. Die huidige stad Trois-Rivières ontstaan in 2002 met die samesmelting van die stede Cap-de-la-Madeleine, Sainte-Marthe-du-Cap, Saint-Louis-de-France, Trois-Rivières-Ouest en Pointe-du-Lac met die oorspronklike Trois-Rivières.
Trois-Rivières beskik oor 'n bekoorlike ou stadskern met talle geboue uit die 18de eeu. Die Manoir Boucher-de-Niverville is in 1729 vir die eerste Seigneur van die stad opgerig en bied naas 'n inligtingskantoor vir toeriste 'n klein versameling Frans-Kanadese meubels uit die 18de eeu. Die Musée des Ursulines maak deel uit van die Ursulieneklooster en vertoon 'n versameling van historiese boeke, klere, skulpture en godsdienstige voorwerpe. Die kloostertuin is 'n gewilde uitkykplek wat 'n goeie oorsig oor die Sint-Laurensrivier bied.
Die koerantpapiervervaardiging en die ontginning van waterkrag by die Saint-Mauricerivier vorm die ekonomiese basis van die stad. Die Metropolitaanse gebied het 137 000 inwoners (2001), die stad self 122 000.
