Blouaap
vanuit Wikipedia, die vrye ensiklopedie.
| Blouaap | ||||||||||||||
|---|---|---|---|---|---|---|---|---|---|---|---|---|---|---|
 |
||||||||||||||
| Wetenskaplike klassifikasie | ||||||||||||||
|
||||||||||||||
| Binomiale naam | ||||||||||||||
| C. aethiops | ||||||||||||||
Die blouaap is 'n primaat van gemiddelde grootte. Die spesie word slegs gevind in Afrika suid van die Sahara. 'n Klein bevolking blouape wat saam met die slawe van Afrika as troeteldiere gereis het, is tans gevestig op eilande – veral Barbados en Sint Kitts – in die Karibiese see.
Inhoud |
[wysig] Identifikasie
Mannetjie:
- gemiddelde lengte 115cm,
- gemiddelde stertlengte 68cm,
- gemiddelde massa 5,5 kg.
Wyfie:
- gemiddelde lengte 105cm,
- gemiddelde stertlengte 57cm,
- gemiddelde massa 4,1kg.
Die spesie het die tipiese aapvoorkoms. Hulle is skraal gebou, met lang arms en bene. Die pels op die lyf is liggrys, maar die penspels en die binnekante van die ledemate is roomkleurig tot wit. Die gesiggie is swart, maar omkring met 'n wit band pels wat dwarsoor die voorkop strek en met die wange af. Volwasse mannetjies se skrotum is helderblou, en die penis skarlaken.
[wysig] Verspreiding
Hulle word in die noorde en ooste van Suider-Afrika aangetref, en langs die suidelike kus tot so ver wes as Mosselbaai. Hulle leef ook in anders onherbergsame areas langs riviere, insluitende die Oranjerivier tot so ver wes as sy monding, en beboste lope diep in die Karoo. Hulle is wyd verspreid deur sentraal- en Oos-Afrika, behalwe in die oerwoudareas naby die ewenaar.
[wysig] Habitat
Blouape kan 'n wye verskeidenheid van leefplek hanteer, veral bebosde en graslandgebied, maar kom ook in voorstede voor. Die beskikbaarheid van drinkwater is ook noodsaaklik.
[wysig] Gedrag
Lees ook die artikel aap.
Hulle is aktief gedurende die dag en slaap snags in bome of op kranse.
Die blouaap woon in nou-verweefde sosiale groepe saam. Die tropsamehang is rondom 'n dominante wyfie. Tropgrootte is tussen 20 tot 30 lede. Wyfies bly in hulle trop. Mannetjies emigreer ten tye van die aanvang van puberteit, en trek dan van trop tot trop, en spandeer omtrent drie jaar in 'n trop voordat hulle weer aanbeweeg. Mannetjies en wyfies se hiërargie is verskillend; slegs die mannetjies van hoër rang het toegang tot bronstige wyfies. Sosiale hegtheid gebeur deur middel van onderlinge versorging van mekaar se pelse. Troppe het goed-gedefinieerde groepsgebiede met duidelike grense.
Die lewensverwagting kan tot 20 jaar wees.
Hulle word gevang deur kroonarende, breëkoparende, luiperds en luislange.
[wysig] Geluide
Blouape het 'n groot reeks geluide. Hulle het drie verskillende waarskuwingsroepe vir landsroofdiere, slange en voëls. Die kenmerkende 'nkau'-roep van die volwasse mannetjie is die bron van die aap se Zoeloenaam.
[wysig] Kos
Hulle is omnivore, maar eet veral 'n verskeidenheid groente. Hulle is ook lief vir klein insekte, klein gewerwelde diere en voëleiers. Hulle spandeer heelwat tyd op die grond aan't eet, en kan groot skade in vrugteboorde, landerye en tuine veroorsaak.
[wysig] Voortplanting
Daar is nie sigbare tekens dat die wyfie gereed is vir voortplanting nie. Gewoonlik word 'n enkele apie gebore na 210 dae van dragtigheid, en geboortes vind plaas van September tot Desember. Tweelinggeboortes is raar. Spening vind plaas teen ongeveer vier maande.
[wysig] Spoor en veldtekens
Agtergeblewe stukke kos, en doppe en oneetbare skille gee gewoonlik 'n aanduding dat blouape in die omgewing was. Die mis is klonterig en rond, met fragmente van onverteerde plantmateriaal daarin.
[wysig] Galery
 |
 |
 |
[wysig] Sien ook
- Lys van Suider-Afrikaanse soogdiere
- Lys van Suider-Afrikaanse soogdiere volgens wetenskaplike name
- Suider-Afrikaanse soogdiere en hul ordes
[wysig] Bronne
- 'Smither's Mammals of Southern Africa. A field guide'. Redakteur Peter Apps. Derde uitgawe, 2000.
- 'Veldgids tot die soogdiere van Suider-Afrika'. Chris en Tilde Stuart. Eerste uitgawe, 1988.
