Carta, Forficia e Petra

From Wikipedia

La tabella di Carta, Forficia e Petra; ammustrannu (pi ngrisi) ca la petra batti la forficia chi batti la carta chi batti la petra. Putemu vidiri li formi dî manu e zoccu rapprisentanu.

Carta, Forficia e Petra (o dittu pi qualunchi ordini, e quarchi vota canusciutu p'autri lingui comu Rock, paper, scissors, Roshambo, Rochambeau, Row-Sham-Bow, Ick-Ack-Ock, Janken, Mora, Morra Cinese, Gawi-Bawi-Bo, JanKenPon, Ca-Chi-Pun, Farkle, Ken Ken Pa, or Kai Bai Bo) è nu jocu di manu pupulari, spissu jucatu di piciriddi. Tanti voti veni usatu ô postu di lanzari na munita nta l'aria, jittari li dadi o tirari a sorti pi scartari cu avissi a jiri primu pi qual'è gghie. Ma cuntrariu ê scelti ammuzzu, stu jocu si pò jucari cu tecnica, picchì assirvannu lu tò rivali, unu pò addunarisi dî soi dibulizzi chi ponnu essiri sfruttati.

[cancia] Comu si joca


Dâ manu manca â manu dritta: petra, carta e forficia) ognunu batti l'autri dui.

Ogni jucaturi fa la forma dûn pugnu câ sò manu. Nzemmula cuntanu "1 ... 2 ... 3 ... Vai!" (voldiri, "facemulu ora!"), o dicinu "Carta... Forficia... Petra... Joca!", o "Carta... Forficia e Petra!", ecetra, p'ogni palora ditta, li jucatura fannu finta a puntari lu sò pugnu a ciascunu. Subbutu ca l'urtima palora veni abbanniata, p'asempiu "Vai", "Joca", o "Petra", ogni jucaturi havi a fari la forma câ sò manu d'una di l'asempî chi sunnu pussibbili:

Carta: la manu aperta, cu tutti li jita stinnuti.
Forficia: l'ìnnici e jitu mediu stinnuti e siparati, facennu la forma di na "V", assummigghiannu la mossa di na forficia.
Petra: s'arresta pi forma dûn pugnu.

L'obbiettivu è bàttiri lu tò rivali scartannu na forma chi è cchiù forti di chidda dû tò rivali sicunnu a sti reuli:

La carta cummigghia la petra (la carta vinci)
La forficia tagghia la carta (la forficia vinci)
La petra spunta la forficia (la petra vinci)

Siddu tutti dui jucatura scègghinu la stissa forma, la partita finisci comu nu pareggiu, e jocanu nautra vota.

Tanti voti, stu jocu cuntinua, p'asempiu, finu ca unu o l'autru vinci dui di tri partiti, o tri di cincu partiti, o puru quattru di setti partiti, accussì vincennu lu campiunatu.

L'Australiani jocanu pi stu modu: "forficia, carta, petra!" o "carta, forcicia, petra!" (comu l'ordini sicilianu), gridannu sulu tri palori (mmeci di quattru) e suttaliniari l'urtima palora chi è puru signali pi fari li formi dû jocu. Ovviamenti stu tipu di jocu va cchiù currennu e cci voli menu tempu pi jucarilu, o si pô jucari lu campiunatu cumprinnennu tanti partiti.

Li Brasiliani accumenzanu lu jocu ntôn modu simili di chiddu australianu, gridannu li palori pi giappunisi pû fattu dâ nfluenza di migranti giappunisi.

Nta Taiwan, nun fannu la mussa chî manu mentri ca cuntanu. Tutti dui jucatura, ô stissu tempu, fannu li soi formi chî manu doppu cuntari finu a tri, senza moviri li manu mentri ca cuntanu. St'abbitudini pò cunfunniri li furasteri, arristannu cû pugnu quannu nfatti lu jocu havi accuminzatu pi veru. Pi chissu, li taiwanisi spissu accumenzanu câ carta jucannu li furasteri, spirannu di battiri la petra di lu furasteri.

[cancia] Stratigìa

La stratigìa di stu jocu addipenni suprô usu di psicoluggia pi nzirtari o nfluinzari lu cumpurtamentu dû tò rivali. Veni cunziddiratu accitabbili parrari ntôn modu ngannusu o babbalunaru pi ntrappulari o illùdiri lu tò rivali. P'asempiu: "Ju fazzu sempri la petra", o "nenti è cchiù forti dâ forficia!" o "carta? ma cu usa la carta comu arma d'affisa?", ecetra.

Matimaticamenti lu jocu ottimu si tratta simpricimenti di scegghiri ammuzzu, e dunca si pò cunchiudiri ca si tratta dûn jocu di nenti quannu veni eliminatu l'usu di psicoluggia (p'asempiu, jucannu contra nu computer). Ma siddu lu rivali è umanu o nu prugramma di computer chi nun joca ammuzzu, certamenti joca suttaottima e cu na stratigìa di cui unu cci pò appruffitarisi.

[cancia] Storia

Comu Go e Mahjong, Carta, Forficia e Petra era mmintatu dî cinisi. Sicunnu ôn libbru ntitulatu Wǔzázǔ (五雜俎 or 五雜組) scrittu di Xiè Zhàozhì (謝肇淛) nta l'ebbica tarda di Ming, li surdati di vintura jucavanu nu jocu chiamatu shǒushìlìng (手勢令), e si cridi c'avissi a essiri Carta, Forficia e Petra.

Nun avemu ducumenti di Carta, Forficia e Petra nta l'ovest prima dî rapporti ufficiali cu l'Asia. Li scritturi dû punenti dâ fini dû seculu XIX sulu ammuntuaru ca era nu jocu asiaticu. Li cinisi e coriani usanu Tissutu nzemmula cu petra e forficia, addimentri li giappunisi l'hannu richiamatu carta. Si pò cunchiudiri di sti fatti ca li miricani pigghiaru stu jocu dû Giappuni duranti lu seculu XIX.

[cancia] Rifirimenti

Sogawa, Tsuneo (2000). "Janken". Monthly Sinica, Vol.11, No.5. (giappunisi)
Culin, Stewart. (1895). Korean Games, With Notes on the Corresponding Games at China and Japan. (pi ngrisi - provi ca facirmenti stu jocu nun si canuscìa nta lu punenti a ddu tempu)
Gomme, Alice Bertha. (1894, 1898). The traditional games of England, Scotland, and Ireland, 2 vols. (pi ngrisi - cchiù provi ca nun asistia)