Ensjedee

Van Wikipedia

Ensjedee (Nederlands Enschede, Nedersaksisch Eanske) is 'n stad in 't ooste vaan Euveriesel, in de streek Twente. De gemeinte Ensjedee had op 1 januari 2005 153.640 inwoeners, boemèt de stad de ierste vaan Euveriesel is. Ander kèrne zien Boekelo, Glanerbrug, Lonneker en Usselo.

[bewirk] Stadsfuncties

Ensjedee is verzörgingscintrum vaan Twente en 't aonpalend Duits gebeed. Mèt Hengelo, Borne en 't Duits Gronau vörmp de stad 'n agglomeratie mèt bekaans 400.000 einwoeners. Ensjedee zie beteikenis es industriestad is aofgenome nao 't verdwijne vaan de textielindustrie. Allewijl is dao 'n technische universiteit gevesteg, zoewie e conservatorium en 'n hoegesjaol. Bij Ensjedee ligk ouch de Vleegbasis Twente, die evels in e paar jaor gesloete zal weure.

[bewirk] Stadsbild

Ensjedee heet e modèrn stadsbild, mèt door de brand vaan 1862 dee zoe good wie al bebouwing in de as lègkde. De meiste febrikke zien gesloop en vervange door woeninge of bedriefsgebouwe. De väöl aw arbeiderswieke geve de stad e typisch Interbellum-aonziech.

[bewirk] Historie

Ensjedee moot roontelum 'n donjon oontstoon zien. Roond 1300 kraog 't stadsrechte, die in 1325 door de bisjop vaan Utrei bekrachteg woorte. De stad blaof oonbelangriek tot eind achtiende ieuw de textielindustrie opkaom; wie 't industrieel dommenant Bèlsj ziech in 1830 aofsjeide kós 't oetgreuje tot textielcintrum vaan Nederland. In 1862 góng door 'ne groete brand al bebouwing verlore.

In de jaore zesteg en zeventeg góng de textielindustrie verlore door concurrentie oet lieg-kejzjemlen, boenao intensief revitaliseringsprojekte nujeg waore, vergliekbaar met die in Heerle. In de jaore negenteg zaoge planne veur 'n fusie mèt Hengelo en Borne tot Twentestad 't leech, die evels in 2000 aofgebloze woorte wegens teväöl oonwèl bij de bevölking. In datzelfde jaor explodeerde in de wiek Roombeek e veurwèrkfebrik, boebij 22 doeje vele.