Emile Krieps
Vu Wikipedia, der fräier Enzyklopedie.
Den Emile Krieps, gebuer de 4. Januar 1920 zu Déifferdeng, gestuerwen den 30. September 1998 an der Stad, war e lëtzebuergesche Schoulmeeschter, Resistenzler, Berufsoffizéier an DP- Politiker.
No senge Studien ass den Emile Krieps nach virum Zweete Weltkrich Schoulmeeschter zu Déierbech ginn.
Zesumme mam Josy Goerres vun Déifferdeng huet hien d'Resistenzorganisatioun "Service d'Action et de Renseignement des Patriotes Indépendants" (SAR-PI-MEN) gegrënnt. Hier Missioun war et, Lëztebuerger a Krichsgrfangener iwwert d'franséisch ze schleisen a se do a Sëcherheet ze brengen.
Den 19. November 1941 ass hie vun der Gestapo wéinst aktiver Resistenz verhaft ginn a koum op Hinzert. No sechs Méint ass hie krankheetsbedéngt do rausgelooss ginn. Seng Plaz als Schoulmeeschter hat hien awer verluer. Hien ass direkt a Frankräich an duerno iwwert d'Pyrenäen a Spuenien geflücht. Do ass hien vun der Franco-Polizei verhaft ginn, konnt sech awwer derduerch maachen an huet London erreecht, wou hien sech de Norichtendengschter vu den Alliéierten zur Verfügung gestallt huet. Mat enger Spezialmissioun beopdragt, gouf hien de 4. Juli 1944 iwwer der Belsch mat engem Fallschierm ofgesat. Hie war bei der Liberatioun vu Lëtzebuerg derbäi an ass an d'Lëtzebuerger Arméi agetratt.
Den 2. August 1946, um fënnef Auer moies, sinn den Emile Krieps, de Leitnant Robert Winter, de Majouer Rudy Ensch an de Leitnant Jean Juttel, alle véier Resistenzler, vun der Sûreté verhaft ginn. Si krute vigeworf, de sougenannte Putsch vun den Offizéier géint d'Regierung vun der Nationaler Unioun ënnert dem Pierre Dupong geplangt ze hunn. Et huet sech awer erausgestallt datt et sech ëmm e montéierte Coup gehandelt hat, bei deem de Minister Joseph Bech als Drotzéier gegollt huet.
1967 ass hie Leitnant-Colonel vun der Lëtzebuerger Arméi ginn. Wéi den obligatoreschen Militärdéngscht Ënn 1967 ofgeschaft ginn ass, huet hien d'Arméi verlooss fir an d'Politik ze goen. Am Januar 1968 ass hie Member an der DP ginn. Am Mäerz 1969 ass hien als Députéierten an d'Chamber komm, nodeems de Camille Polfer Sportskommissär gouf.
Vum Januar 1970 bis Februar 1971 war hie Conseiller am Gemengerot vun der Stad Lëtzebuerg.
Den 9. Juli 1971 ass hien an der Regierung Werner-Schaus II Staatssekretär am Inneministär ginn. Minister fir Gesondheet an Ëmwelt, Minister fir Ëffentlech Verwaltung an Arméiminister gouf hien de 15. Juni 1974 an der Regierung Thorn-Vouel-Berg. De 16. September 1977 gouf hien zousätzlech Sportsminister.
Vum 16. Juli 1979 bis den 20. Juli 1984 war e Gesondheetsminister, Sportminister, an Arméiminister an der Regierung Werner-Thorn-Flesch.
Tëscht 1984 a 1994 war e nees Députéierten um Krautmaart an der Oppositioun. 1994 huet den Emile Krieps sech aus der aktiver Politik zréckgezunn.
Hie war awer och mam Dëschtennis verbonnen. A senger Jugend hat hien an der éischter Equipe vum Cercle Ping-Pong Differdange gespillt. Tëschent 1964 an 1972 war hie President vun der Fédération luxembourgeoise de tennis de table.
Am Nomëtteg vum 30. September 1998, ass den Emile Krieps, no enger Operatioun an der Clinque Ste-Elisabeth an der Stad Lëtzebuerg, am Alter vun 78 Joer onerwart gestuerwen.
Bis zu séngem Doud wor den Emile Krieps Präsident vun der "Association des anciens combattants de la guerre 1939-1945 et des forces des nations unies". Des Organisatioun heescht elo "Association des anciens combattants de la guerre 1939-1940, des forces des nations unies et des soldats de la paix luxembourgeois". Den aktuellen Präsident as de Colonel Honoraire Rudy Lutty.
[Änneren] Gielercher
- Croix de Guerre vu Lëtzebuerg
- Grand Officier de l'Ordre de Nassau
- Croix de Guerre vu der Belsch
- Croix de Guerre vu Frankräich
- Chevalier de la Légion d'Honneur à titre militaire
- King's Medal for Courage
- Citoyen d'Honneur de la Ville de Differdange
[Änneren] Literatur
- Hoffmann, Serge: Le mouvement de résistance LVL au Luxembourg, Archives nationales, 2004, 158 S.
- Hilbert, Roger: Resistenzbilder in: De Mierscher Gemengebuet. - Mersch. - Nr. 70(Mäerz 2005), p. 39-44, ill.
- Petite histoire de l'activité des résistants luxembourgeois engagés dans les réseaux et les maquis de la France combattante / [réd.:] Jules Stoffels. - [Luxembourg] : Association des anciens combattants volontaires luxembourgeois de la Résistance française, 2006 (Luxembourg : Impr. Centrale). - 141 Säiten : ill. ; 26 cm, ISBN 2-87996-760-0
