Pinangat

Halì sa Wikipedia

An pinangat sarong popular na lutò nin gulay na natong sa Rehiyon Bikol partikular sa Camalig, Albay. Sarong bersyon kaini an tilmok na popular sa tercer distrito kan Camarines Sur asin Albay.

Piglulutò sa gutâ na pigsalakan nin bawang, làya asin sili. An pangenot na kakaipuhanon sa paglutò kaini iyo an natong nin huli kaiyan mayaman ini sa Bitamina A. An natong mas mayaman pa sa potassium asin calcium kun ikukumpara sa batag.

An pinangat masabing duwang klaseng luto depende sa hinalean. An pinangat sa Camalig daing palaman na tinoktok na boyod o pasayan asin linuto sana sa sobrang guta na iyo an nataong siram alagad an sa Camarines igwa nin palaman na tinoktok na boyod/pasayan asin mga tinoktok na lukadon na niyog.

An sarong bersyon nin pinangat na medyo naiiba iyo an inaapod na tilmok. Uso ini sa Rinconada asin sa Albay.

An tilmok tinoktok na boyod o ogama saka ini rinamas sa tinoktok na lukadon. An ramas na ini sinasalakan nin rekadong bawang, sibulyas, laya saka sili kun gustong maharang-harang. Papatoson ini sa lombod na dahon nin niyog. Sa Rinconada pinapatos ini sa dahon nin lubi-lubi.

Lulutoon na ini sa guta na siring man may rekado giraray na bawang, sibulyas asin laya. Halaton na mag-ati na naglalana-lana.

[hirahón] Ginikanan

Dae nasusurat sa historya kan Bikol an minapahiling kan ginikanan kan pinangat alagad an abundanteng gulay na natong na minatubò sa rehiyon nasambitan sa bistong Bikolanong epiko na Ibalong.

Igwa nin tagpo sa epiko na sarong botas na orig an uminatake sa kalilinsahan kan karakter sa epiko na si Baltog. Ini an pinagtotobodan na pinaká-enot na nag-erok sa rona. An laman kan natong bihira na lutoon ta sinasabing matari (bakong masapog) asin maray sanang pansalak sa ibang lutoon arog kan kalabasa.