Wikipedia:Mga panyayari sa ngonyan
Halì sa Wikipedia
[hirahón] Phoenix lander Nagharok nang Ati sa Planetang Mars
An pinahugpa na pansapwat ati sa kadagaan kan Mars kan Phoenix (satelyeteng pinadara kan Amerika sa orbit kan Mars) nakakaros na nin sampol na ati sa kapatagan kan planetang nasabi. An Phoenix pinagbunsad pasiring sa Mars kan Mayo 25. An mga sayantipiko sobra nang ukag huli ta may kadukot sa "dagang Mars" nin maputing bagay na pighuna ninda naalang na asin kan an yelo duman nagtunaw na.
An sampol na "dagang Mars" ipapaagi sa analisis ngani na matantya kun gurano kadakul kan tubig sa planeta asin kun anong mga mineral an madudukayan duman. [1]
[hirahón] Akusadong Kagboot Kan 9/11 Na Pag-atake Sa Amerika Oke Lang Daa Kun Ipagadan Siya
Si Khalid Sheikh Mohammed, sarong Pakistaning myembro kan Al Kaida, nagsabi na gusto siya magin martir asin kaogmahan lang niya kun ipagadan siya. Ini an ipinahayag niya kan Huwebes (Hunyo 5) sa atubangan kan Guantanamo war crimes court. Nagrorokyaw pa siya nin omaw ki Allah manta na pigtataboga niya an Amerika sa pagsakyada daa kaini sa Afghanistan asin iraq, asin sa pagtugot nin same-sex na aragoman. [2]
[hirahón] Israel Mapipiritan Runoton an Mga Sitio Nuklear Kan Iran
Kun dai mahurot nanggad an Iran na magpondo na sa paggibo nin bomba nuklear, an Israel mapipiritan na runoton kaini an mga sitio nuklear kan Iran, sabi kan Biyernes (Hunyo 6)kan sarong kabuhan ni Primer Ministro Ehud Olmert. An Israel igwang nakaabang na mga bomba nuklear na pangandam kontra sa saiyang mga kalaban. Iyo na ini an pinakahayag na tinaram kan sarong opisyal sa gobyerno kan Israel gibo kan nagluluya na an pagtubod kani na may magigibo an UN sa pag-alok sa Iran na pondohon na an paghaman nin bomba nuklear. [3]
[hirahón] Mga Linya Nin Eroplano Nagagabatan Na
Sa pagparalangkaw kan presyo nin asayti, na nagabot nang $130 an bareles, nagagabatan nang maray sa pagnenegosyo an mga linya kan eroplano. Inoosip na kun ano-ano na lang an ginibong remedyo dai sana malubog sa pagkalugi alagad sinasabi na kun dai pa mag-ontok an paglangkaw, dakul an mga masangat nin pagkabangkarote sa korte komo proteksyon.
Nagtaas nin pamasahe, nag-ina nin empleyado, dinikitan an mga serbisyo makalaban sana sa grabing gasto sa asayti alagad an mga lakdang na ini kulang pa ngani makaligtas sa pagkalugi. Pito na sa Estados Unidos an nagpaaram sa korte nin pagkabangkarote o pirang bulan nang dai nagooperar, y linalaoman na madakul pa ini kun dai pa humuros an presyo pag-abot kan autumn. [4]
[hirahón] An Dating Yugoslavia Sinangatan kasong Genocide
An Croatia (na naglitik na sa Serbia asin Montenegro na an kabiyoan kan tolo inaapod na Yugoslavia) nagsangat nin kasong genocide (tuyong pagpuho sa grupong kultural o pulitikal) kontra sa Serbia asin Montenegro ngonyan na Mayo huli ta rinibong Croats an ginaradan soboot kan duwang grupong nasambit. An kaso nakasangat sa The Hague, sarong korte internasyonal na binibisto kan United Nations. Alagad, sinabi kan Serbia na mayong legal na base ta an Croatia soboot bako pang sarong independienteng nasyon kan nangyari an mga bagay na sakop kan kasong sinangat. [5]
[hirahón] Sarong Babae Nabuhay Giraray Pakalihis 17 Oras na Pighuna Gadan Na
Sabi kan mga doctor niya, sarong milagro an nangyari ta si Val Thomas , 59, kan West Virginia, USA, pigdalagan kan Sabado (Mayo 18) sa ospital huli sa duwang grabing sunod-sunod na atake sa puso asin an monitor tinakod sa hutok niya nagpahiling na mayo nang nagrerehistrong kuritkurit na alon na iyo an tandaan kuta na may buhay pa siya.
Pighiribian na an pasyenteng si Thomas asin pigulayan na kun pano idodonar an saiyang mga organ alagad bigla sanang napamata asin nagtaram.[6]
[hirahón] Resulta kan Linog sa Tsina
An linog na nagrungkab sa probinsya kan Sichuan, Tsina, kan Mayo 12 (Lunes) nagbunga sa makuring pagtios. Pinaguusip na 5 milyon na edipisyo an nagkarorogba, 71,000 nang Tsino an kumpirmadong garadan, asin an linog nagdarang handal huli sa pagsangaw kan radiation sa iba-ibang parte kan probinsya ta ini an sitio kan saro sa facilidades kan Tsina kun saen an enerhiya nuclear pigagamit.
Tolong polo may apat na mga danaw an naporma igdi sa nasabing probinsya dara kan mga pagtupas kan daga asin pagkasulat kan dakul na salog resulta kan makusogon na linog. [7]
[hirahón] Dakulang Karaba Sa California Sige Pa An Panradas
Tolo nang aldaw poon pa kan Sabado (Abril 26) an mga bombero molo-molo nang nagsusumpit asin nagsisigbo sa dakulang karaba sa California, asin haros dai mapondo pagkanap sa palibot. Abot sangribo nang tawo an napiritan mag-ebakwet asin bayaan an saindang mga soro-sadiri huli sa kasulong ini sa may Kabukidan kan San Gabriel sa luwas sana kan California. Labi nang duwang gatos (200) na ektarya an naradas kan karaba. [8]
[hirahón] Sarong Austriyakong Ama Ginibong Parauso Aki Niyang Babae
Sarong Austriyakong ama, ngaran Josef Fritzl, 76 anyos, linangob an saiyang aking babae nin 24 taon asin inakian nin pito. Tolo kaini kasaro sa langoban an ina na dai lamang nakahiling liwanag nin saldang, asin an tolo pinaluwas na inataman kan ama asin kan saiyang agom. An saro nagadan omboy pa. Linangob kan ama sa sirong kan saiyang harong na sa lawig kan mga taon dai lamang napag-araman kan mga pulis asin mga kanatad. Ini an makagiram-giram na bareta na naguukag ngonyan sa Austria na kun pano ini nangyari na mayo lang nakaka-isi. Nabulgar sana kan an saro sa aking nakukulong napiritan na darahon sa ospital huli sa helang. [9]
[hirahón] NAGADAN NA SA DARFUR NAG-ABOT NANG 300,000
- An iriwal sa Darfur, sarong sultanato na parte kan Sudan, orog na nagrororo. Mayong kalinawan na igdi magkaigwa nin katoninongan ta mayong areglong pangpulitikal sagkod ngonyan poon kan an ribok igdi nagbungkaras limang taon na an nakaagi, sabi kan mga opisyal kan United Nations kan Martes (Abril 22). Dagdag pa ninda, an bagong pang-katoninongan na pwersa makakaabot pa igdi sa taon na 2009.
An ribok igdi nagpoon kan taon 2003 kan an mga etnikong Aprikanong rebelde nag-alsa laban sa gobyernong Sudan na dominado nin mga Arabo, huli sa diskriminasyon na namamate kan mga etnikong Aprikano. Kadaklan kan mga garadanan resulta kan guerra, na uminabot nang labing 300,000, isinasala sa mga nomadang Arabo na inaapod na mga janjaweed militia na nagkakampi sa gobyernong Sudan. [10]
[hirahón] AKING DUWANG TAON EDAD, IPINADPAD KAN DUROS
- Sarong aking duwang taon edad nakasuno' sa stroller pinadpad kan makusog na duros asin naka-talsik sa tubig kan Danaw Michigan. Ipigpapasyar kuta an aki sa gilid kan danaw kan lolo niya kan may makusog na duros nagsapwat sa aki saka naibuntog sa sampolong piyeng rarom kan danaw. Nagkinsng minuto sa irarom bago nai-ha'was kan mga bombero kan Fire Department kan Chicago. Buhay pa man an aki alagad yaon sa kritikal na kundisyon. Nangyari an makangalas na pangyari kan hapon na byernes duman (Abril 18). [11]
[hirahón] TSINA: IYO AN PINAKADAKUL NA PINAPAGADAN
- Sinabi kaini na 470 katawo an pinagadan kan Tsina kan nakaaging taon bilang sentensya sa nakometer na krimen. Anom na polong iba-ibang klaseng krimen an sinasapawan kagadanan sa Tsina, kaiba na igdi an pagbenta nin bawal na bulong asin pagsulmok nin pirak-banwaan.
Sarabi kan ibang grupo na siring man an pagmato, pwede ngani aboton 6,000 an nasentensyahan kagadanan alagad dai maisihan an totoo ta tagong-hilom na gayo an mga bagay na ini kan gobyernong Tsina.
An ikaduwa sa lista iyo an Iran, na 377 katawo pinagadan kan 2007 kabali na igdi an sarong lalaki na ginadan paagi nin paggagapo saiya huli sa adulterio, o "pakikidorog sa bakong agom".
Sa ngonyan tolong nasyon pa daa an nagsesentensya nin kagadanan sa mga menor de edad: an Iran,. Yemen asin Saudi Arabia. Pinakahuri nangyari kaining Abril na kun saen sarong aking edad trese anyos pinagadan kan Iran sa krimen na dai man nabuyagyag sa bareta kun ano. [12]
[hirahón] Primer Ministro Kan Haiti Sinipa Sa Pwesto Niya
- An Primer Ministro kan Haiti na si Jacques Edouard Alexis, sa boto na mayoria kan mga miembro kan parlamento (16 sa bilang na 27ng myembro) pinatalsik sa saiyang pwesto huli sa dai maresolveran na paglangkaw kan mga barakalon sa nasyon na ini na ikinabalde' na maray kan mga namamanwaan. Nangyare an pagsipa saiya kan Sabado (Abril 12 )ining semana, oras duman.
Grabi an mga pagbabalinghaw kan mga tawo mala ta nagresulta sa pagburulyada kan mga nagpropotesta laban sa mga soldados kan United Nations asin bunga kaini nagadan an sarong soldados duman sa Port-au-Prince, osip kan mission spookeswoman na si Sophie Boutaud de la Combe.
An presidente kan Haiti si Rene Preval nangako na suportahan niya an anoman na desisyon kan parlamento. Nangako man siyang pababaon an mga presyo orog na sa bagas sa pagkuang tabang internasyonal asin an mga paratindang bagas macooperar sa pagtapyas nin tres pesos sa lambang supot nin bagas. [13]
[hirahón] AUSTRALYANONG AMA NAKIKIPAG-SEX SA SAIYANG AKING BABAE: 2 IBINADOS
- Sarong ama na taga-Australia an nagbuyagyag sa TV show na "60 Minutes" kan nakaaging Domingo (Abril 6) na may pitong taon na siyang relasyon sa saiyang aking babae. An ama, si John Earnest Deaves asin an aki nya na si Jennifer Anne Deaves nagkagustohan nang magsaro komo "mag-agom" pakalihis sarong taon kan an babae nagbalik sa saiyang ama duwang polong taon an nakaagi kan nagsuruwayan an ama niya asin an ina niya.
An aking babae dati may agom na pigsasaroan alagad nagkaigwang problema sa agom asin saiyang binayaan. Nagsaro na siya sa ama niya duman sa Yongala, South Australia. Nagkamakotan, asin dawa ngani sabi kan ama "ilegal" an relasyon kundi dara kan emosyon pinadagos an relasyon na inaapod sa Ingles "incestuous", an pakikidorog sa kadugo'.
An pagbuyagyag nag-ukag nin dakulang eskandalo sa Australia.
Nagkasaro an mag-ama kan taon 2000. Paglaog kan taon 2001, uminaki an aking si Jennifer alagad nagadan an aki sa pagkani-aking helang sa puso. Sunod na aki namundag kan Mayo kan nakaaging taon na 2007. Nag'aatubang an mag-ama nin duwang bilang na kargo na "incest" sa pangyaring ining pagbados na duwang beses kan aking si Jennifer.
Isasapaw sainda an sentensya nin huli ta dai pwede na magpadagos an siring na relasyon ta an "incest" ipinapangalad sa mata nin layi bako lang, kundi sa rason na medikal na pwede magresulta sa mga aking may mga kakundian asin pwede man magdakul an kaso nin pag-aabuso sa mga aking mmenor de edad, sabi kan District Court Sentencing Judge na si Steven Millsteed.
[hirahón] HILLARY CLINTON SINASABIHAN NA NA MAGSUKO NA SA LABAN TA OLAGWAD NANG MARAY SI OBAMA SAIYA
- Si Senador Patrick Leahy nagpahayag na dapat daa mag-atras na si Hillary Clinton sa laban sa pagsikwit kan nominasyon kan partido Demokrata ta mayo na nin paglaom na maabot niya pa si Barack Obama sa bilang kan mga delegado na maboto saiya.
Si Leahy, chairman kan Senate Judiciary Comittee asin anom na termino nagkapot kan Vermont komo gobernador.
[hirahón] LALAKI, TAGA-OHIO, ARESTADO HULI SA PAKIKI-SEX SA LAMESA
- Sarong lalaki, si Art Price,Jr., 40 anyos, may tolong saradit na aki na taga-Belleveu, Ohio, , nadakop sa video kan kanatad nakiki-sex bako sa babae kundi sa lamesa. Apat na beses siya navideo, pirme sa pag'oltan nin alas-diyes y media asin alas dose nin odto. Enot na video nakikita sya na enterong huba asin nag-aakto nin paki-sex sa lamesa. Arestado siya kan pulis orog na ta an harong niya haranihon sana sa sarong eskwelahan na elementarya.
An lamesa may labot sa tahaw na iyo an sinusulokan kan togod nin dakulang payong. An osip na ini nakita sa Fox19.com ngonyan na semana. [14]
[hirahón] MANNY PACQUIAO, SA SARONG PUNTO SANA GINANA LABAN NYA KI MANUEL MARQUEZ
- Sa laban na gitgitan, ginana ni Manny "Pacman" Pacquiao an titulo sa boksing kontra ki Juan Manuel Marquez. Mayong hurnada na dai nagriribayan matatagas na suntok an duwa sagkod na pareho nasi'si' an kublit harani sa mata. Si Marquez napa'kit an itaas kan saiyang takobtakob, si Pacquiao man nagngirit an ibaba kan mata. Alagad, dai nag-ontok an duwa magbokbokan sagkod sa pinaka-ultimong hurnada.
Pagbagting kan tapos kan ika-kagduwang (12th) round, sinu'ngay kan mga alipores si Marquez, naghuhuna na malinaw na gana siya sa laban. Ogaring sala paghuna ninda. Sa sarong punto sana, napaduman ki Pacman Pacquaio an korona kan WBC, Superfeatherweight Division.
Haros dai matantya kan mga paradalan kun siisay nanggana. Pero sa iskoring kan tolong hwes, iyo ini an luminuwas: An huwes na si Duane Ford nag-iskor 115-112 pabor ki Pacquiao, si Jerry Roth nag-iskor 115-112 pabor ki Marquez asin si Tom Miller sa iskor niyang 114-113, pinaboran si Pacquiao. Sarong punto sana an olagwad niya ki Marquez.
Kan inenterbyu si Marquez, dai nya maako-ako na sya nadaog. Sinabi nya na lapa' an desisyon kan mga hwes mala ngani daa ta mga tawo nagrimongrimong kan sala daang desisyon. An sabi man ni Pacquiao huna nya daa kontrolado na nya an laban kan napalakma' nya si Marquez sa ikatolong hurnada. Alagad, kan napa'kitan sya sa gilid kan mata na dinugo' na sya asin masakit nang makahiling, dai na daa sya syerto kan laban.
An laban hinasi sa Mandalay Bay Events Center sa Las Vegas, kan Estados Unidos ngonyan na Domingo, Marso 16, oras igdi sa Pilipinas. [15]
[hirahón] SA TIBET, SANGGATOS KATRAWO NAGADAN KAN MAGBUNGKARAS SA PROTESTA MGA TIBETANO
- Mga sanggatos (100) daang katawo an nagkagaradan sa mga nagprotesta duman sa Tibet. Ini susog sa mga osip naghahale sa mga nagpapa-iling Tibetano sa India. Sabi man kan gobyerno Tibetano na pinaggunuan man kan Xinxua News Agency, parabareta opisyal kan Tsina, sampolo (10) mansana an nagadan duman sa Lhasa. Kan nakaaging Byernes pinaluwas an bareta.
An pagbungkaras kan protesta napoonan naman kan si anibersaryo kan 1959ng Pagtumang kan mga Tibetano laban sa pananakop sainda kan Tsina na resulta kaini duminulag an Dalai Lama asin nagpatago duman sa India.
An pangyayaring ini makasupog naman sa Tsina na iyo pati an maresibi nin rinibong delegadong atleta para sa 2008 Summer Olympic Games. An mga protesta nagpoon kan Lunes, aldaw kan ika-48ng anibersaryo nin Pagtumang laban sa Tsina na bunga ngani kaini nagdulag paluwas Tibet an Dalai Lama. An Tsina natutuyawan nang maray kan rekord nya sa pagbalga kan mga katanosan pantawo
Ginamitan kan mga pulis si mga nagproprotesta nin badil asin mga tear gass manta an mga nagaalborotong mga Tibetano sinulo' an sarong saodan, an Tromsikhang Market, na kun saen dakulon paratindang Insik. An mga Tibetasno haradit kan pagbulos kan mga Insik sa saindang teritoryo. [16]
[hirahón] BABAE, DAING HALE-HALE SA INODORO NA SAIYANG TINUKAWAN NIN DUWANG TAON
- Sarong babae, edad 35 anyos, kan Ness City, Wichika, Kansas, tuminakaw sa inodoro nin duwang taon na dai lamang nagbuhat; mala ta sabi ni Ness County Sheriff na si Bryan Whipple, durukot na an saiyang kublit sa palibot kan inodoro. Pag-alsaha siya kaiba na an binungkal na inodoro sa salog. Sa ospital nahimo na matukal an dukot nang maray na kublit sa inodoro.
Sarong kaso na makabale' ta dai masabotan kun napano' man na an kasaroan nyang 36-anyos na lalake dai tolos naghagad tabang sa mga pulis. Pig-iisip kan mga pulis kun anong kargo an isasa'ngat kontra sa lalake.
"Dai man siya ipinulot. Dai man siya iginakot, " sabi ni Whipple, "Basta siya piot nang maray na nakasoksok sa ngawngaw kan inodro."
Sabi man kan kasaroan nya, aro-aldaw sa laog nin duwang taon, na dinadarahan nya nin kakanon saka tubig an babae. Pero man ngani, sabi nya, pirmi nyang inaalok na magluwas na sa kasilyasan alagad habo man lumuwas.
Naabotan kan mga otoridad an babae na nakatukaw sa inodoro, an saiyang pantalon nakahuros sa tabay saka garo namomongnan. Sabi pa ninda garo an mga tabay kaini kuminupos huli ta dai na ginagamit.
Dakulang huringhuding sa Ness City an pangyayari asin si James Ellis, sarong kanatad, pinagbuyagyag na an babaeng ini nagdakula na magomon an buhay ta nagadan pati an ina nya kan sya akion pa asin pirmi lang yaon sa laog kan saindang harong.
Dagdag pa niya, "Dai ko mangalas kun naarog siya kaiyan. An makangalas ta ngonyan lang naghagad ayuda."
[hirahón] ASAYTI, PINAKAHALANGKAW NA AN PRESYO SA $110 AN BARELES, APESAR DAKUL AN SUPLAY
- Sa gabos na pagtaas kan presyo nin asayti, ngonyan na semana an pinakataas na, susog sa report pinaluwas kan U.S. Energey Information Administration kan Myerkoles na aga. Mala ta suminakat sa $110 an presyo kan bareles nin asayti na ngonyan lang daa nangyari sa tahaw kan paglangkaw kan suplay kaini.
An ahensyang nasambit, na iyo an nagmomonitor kan mga suplay kan krudo asin gasolina, natantya na an istak kan krudo suminakat 6.2 milyon na bareles kan nakaaging semana manta ngani an mga may-adal sa bagay na ini pighuhuna na mataas sana an saray kan krudo sa 1.6 milyon na bareles.
Kan Septyembre daa igwa ngani nin pagkukulang na 16 milyon na bareles pero ngonyan igwa nang surplus nin 22 na bareles. Ini huli sa kulang an parabakal asayti. Dapat magbulasok an presyo pero an makangalas ta an presyo kan krudo asin gasolina naglalangkaw logod.
Huli daa ini sa pagluluya kan dolyar, susog ki Phil Flynt, sarong senior analyst kan Alaron, asin an mga investor na-entra maski sa ano na sanang pwedeng pagkakwartahan. [18]
[hirahón] PRIMER MINISTRO ABDULLAH BADAWI NAGSUMPA SA IKA-2 TERMINO
- Si Abdullah Ahmad Badawi, pinasumpa' sa ikaduwang termino nya komo primer ministro kan Lunes (Marso 10) sa tahaw kan mga pangapodan saiya na magbutas na huli sa maluya asin teribleng laban kan saiyang partido, Barisan Nasional, sa nakaagi pa sanang eleksyon. An Barisan Nasional iyo an koalisyon na nagkakapot poder sa Malaysia asin kinukumpini nin kag-apat (14) na partido na base sa rasa, representado na dyan an mga Insik asin mga Indyano.
Kinastigo an saiyang gobyerno kan mga botante huli sa pagralangakawan kan mga presyo kan barakalon asin sa dai mahimukat na problema sa diringkilan kan mga maniba-ibang rasa sa nasyon siring kan mga Malayo laban sa mga tubong Insik.
Tumang sa mga apod saiya na magbutas sa pwesto, si Badawi nagpasiring sa palasyo royal sa Kuala Lumpur asin nagpasumpa ki Hadeng Mizan Zainal Abidin sa sarong solemneng seremonya. Saro sa nagtunga duman iyo an pigsasaboot na tagamana niya na iyo si Deputy Prime Minister Najib Razak. Pakatapos kan seremonya, nagpasiring sinda sa tiripon kan United Malays National Organisation (UMNO) na iyo an nangengenot na partido sa koalisyon.
Orawa, an mga partido oposisyon na pinangenotan kan oposisyonistang si Anwar Ibrahim, nakabangon asin ginana an apat na estado. An mga partidong oposisyon binibilog kan partido ni Ibrahim, an Keadilan, an partido kan mga Insik, Democratic Action Party (DAP), asin kan partido islam na PAS.
Sa paggana kan mga partido oposisyon natanyog an pulitika sa Malaysia ta mawawara na an duwa-katolohan (2/3) na mayoria kan Barisan Nasional sa parlamento. Asin pati an palakaya sa bourse kan Malaysia nasuspindi kan nagbulasok nin sampolong porsyento an halaga kan mga shares, epekto kan kadaogan kan mayor na partido koalisyon. [19]
[hirahón] MAGASTO AN AMERIKA $12 BILYON BULAN-BULAN SA IRAK
- Sa sarong libro, The Three Trillion Dollar War: The True Cost of the Iraq Conflict, nagsabi an ekonomistang si Joseph Stiglitz, sarong premyado kan Nobel Prize asin kan kahiras nya sa pagsurat na si Linda J. Bilmes, an Estados Unidos magasto daa nin $12 bilyon bulan-bulan ngonyan 2008 sa Irak resulta kan guerra.
Lampas 2008, sabi ninda mapabulos nin sa pag'oltan $1.7 trilyon abot $2.7 trilyon an Amerika sa pagmantener kan saindang okupasyon sa Irak asin Afghanistan. [20]
[hirahón] RINIBONG IKOS PINUPUHO SA BEIJING TA NAGDADANGADANG NA AN SUMMER OLYMPICS
- Pinag-osip kan Daily Mail, sarong peryodiko sa United Kingdom, na rinibong ikos an piggagaradan ta gusto kan mga taga-Beijing malinig an lugar ninda kan mga pesteng ikos pag-abot kan Olympic Games na mapoon sa Agosto, ngonyan na taon. Napili an Beijing na iyo an paghimohan kan Olympic Games kan bulan na Hulyo, taon 2001 kan International Olympic Committee.
Pinagoosip na rinibong ikos an tinitipon sa mga "kampong gadanan" kan gobyerno na kun saen pinupuho an mga pobreng ikos. Napo'nan an kampanya sa pagpuho kan pinabantog bareta kan gobyerno na an mga ikos may darang mga helang na nakaka-olakit arog kan SARS asin dakulon nagkatarakot. Kaya nagpoon nang mahihiling an dakul na ikos nagbabaraybasay sa mga tinampo ta pigtarapok kan mga kag-ataman.
Mala ta may mga maestro daa sa sarong eskwelahan nin kindergarten na pigparaparakol an anom na ikos (duwa bados daa) sagkod na nagadan ta tibaad magdarang helang sa mga aking eskwela.
Mga grupong nagmamakulog sa hayop arangggot ta makuring lakdang ini sa pagpalinig kan Beijing huli sana sa Olympics. Naromdoman ninda na arog man kaini an ginibo kan gobyerno na nagparapanggadan nin mga layas na ayam. [21]
[hirahón] Sarong Haponesang Model Nakalusot Huli Sa Sobrang Matibo'gong Na Suso
- Sarong Haponesang pin-up model napawaran saysay an sentensya saiya kan inargumento niya na an labot na sinabi kan lalaking nag-akusar saiya iyo an ginamit niya sa paglaog sa kwarto (kan lalaki), sadit na maray asin huli ta dakulaon an suso niya (44 an sukol), imposibleng makaagi siya duman .
An lalaki inakusar siya na rinapak niya an pintoan asin nalabot ini. Duman daa siya nag'agi sa pagdaluso' saiya asin iwalon siya manongod kan pakikirelasyon sa ibang babae.
An Haponesa, si Serena Kozakura, nakumbinsi kan Lunes (Marso 3) an Tokyo High Court na anas sana balubagi' an mga akusasyon kan lalaki ta dai man ngani daa siya maka'igo duman sa labot. Kumbinsido an Korte kan nahiling na dakulaon mananggad an saiyang suso. [22]
[hirahón] CLINTON GINANA AN OHIO ASIN TEXAS: KUMINUSOG NAMAN AN PAKIUMBASAN NIYA KI OBAMA
- Pakatapos na madaog sa bilang nin delegado sa doseng estado poon pa kan Pebrero 5, nabuhayan boot si Clinton kan masikwit niya an mas dakul na bilang kan delegado sa mga primary na hinasi kan Marso 4 sa Ohio,Texas asin Rhodes Island. 109 nakua ni Clinton, 79 ni Obama sa sumada sa tolong estado. Dakul na nagmamasid na palubog na sya sa paglapag kan nominasyon kan Partido Demokrata ta halawig na an binaya saiya ni Obama.
Si Clinton makusog sa mga puting botanteng babae asin lalake, sa mga medyo daing gayo edukado asin sa mga myembro kan mga unyon. Si Obama naman nakapurot nin solidong suporta hale sa mga itom, sa mga huben saka sa mga mayayaman.
Alagad an kapangganahan ni Clinton sa tolong estadong ini dai pa giraray makalapag sa baya saiya ni Obama na may 1,378 delegado kumpara sa 1,269 na kapot nya kan mapoon pa sana an primary sa tolong estadong ini.
Orawa, si John McCain iyo na an seguradong makakakua kan nominasyon sa Partido Republikano para presidente kan masikop nya an pinakadakul na bilang kan delegado sa mga primary kan partidong ini na hinasi sa maniba-ibang estado. [23] [24] [25]
[hirahón] SARONG BRITON NA INA EDAD 25 ANYOS PINADALAN SA YOU TUBE PIGLULUPIGAN
- Sarong ina, may aking lalaki babae edad 4 asin 2 taon, an pinadalan sa You Tube (sarong site kun saen dawa siisay pwedeng magkaag nin video libre sana) na piglulugosan kan 3 mga solterito edad 14 abot 16, manta siya paling-paling sa pinainom na drugang ikinaag sa arak. An video nag-ayaw nin tolong minuto asin nahihiling an ina na mayong malaytao, nagtatarotagilid an payo kan siya pirang beses piglupigan manta nadangog sa harayo an pagngoyngoy kan duwa niyang aki.
Dakul an nagprotesta sa marigsok na pasale asin tolos man tinangkas kan mga administrador kan You Tube an video pero mga 600 katawo na an nakadalan kani.
Sabi kan You Tube imposibleng danay na bantayan an pagsasa'ngat nin video sa site na ini ta mala katumbas 10 oras na video an sinasangat morominuto. Nangyari ini sa London asin pinu'nan nang imbestegaran kan mga otoridad an pangyayari asin tolong aki nang mga huben pa an sinikop asin pig-aagi na sa interogasyon. [26]
[hirahón] RUSO, TSINO BINAGAT AN RESOLUSYON NA NAGPAPADUSA SA IRAN
- An Rusya asin Tsina binangga' an bagong Resolusyon na isasapaw sa Iran kan Martes na nakaagi (Marso 5). An Resolusyon nagsasapaw naman kuta nin dagdag na padusa sa Iran ta pirit na gayo ini na habong magkuyog sa kahurotan na pondohon na an pagpayaman kan mineral na uranium. Ini saro sa proseso kun saen pwede na maghaman nin armas nuklear.
An Presidenteng Irani nagpapahimutik sa sahot sainda. Mala ta an sabi niya an programa nuklear ninda mayong militar na obhetibo kundi makaproducir sana nin enerhiya nuklear para sa ikakarahay kan saindang banwaan. [27]
[hirahón] HEXAPUS AN KUGITA NA MAY ANOM NA KALAMIAS SANA
- An KUGITA inaapod sa Ingles na "octupos" ta an "octo-" boot sabihon walo asin gabos na kugita normalmente may walong kalamias, alagad si Henry may anom sanang kalamias kaya siya binansagan na hexapus. Sya sarong ngangalasan na kugita sa mundo ta mayo siya nin kaarog.
An kugita kun maputulan nin saro o duwang kalamias, tinutuboan man giraray. Pero siya dai na tutuboan ta mayo nin espacio kun saen matuhaw an kalamias. Sabi resulta ini huli sa kadi'nan nin pagkamundag. An mga oktupos may tolong puso, asul na dugo asin padalian sanang maghira an kolor kun kinakaipo..
Makukua an kugita sa Blackpool Sea Life Centre duman sa amihanan-solnopasn kan Inglatierra.
[hirahón] AN IRANING PRESIDENTE NA SI MAHMOUD AHMADINEJAD NAGSONGKO SA IRAK
- An presidente kan Iran si Mahmoud Ahmadinejad nagpoon kan duwang aldaw na pagbisita sa Irak ngonyan (Marso 3) ta boot magrahay an relasyon diplomatiko kan duwang nasyon. An mayoria kan mga Irani mga Moslem (98%)na kun saen 89% Shia Moslem asin an 9% mga Sunni Moslem. An Irak naman 97% Moslem na kun saen an 60%-65% mga Shiite asin an 32%-37% mga Sunni Moslem. [28]
An nagsabat saiya sa aeropuerto iyo si Jalal Talabani, an presidente kan Irak. Sinabi nya na an pagbisita nya sa Irak makacontribuir sa katoninongan asin seguridad kan Tangang-Subangan.
Pigsusuponeran kan Estados Unidos na an Iran daa iyo an nagsosobol nin mga gerilyang miltante sa Irak na nagpaparapangadan sa mga soldados na Amerikano asin dagdag pa na an Iran nagsasawong-sawong sa internal na aktibidad politika kan nasyon na ini. [29]
Pig-acusar man kan Estados Unidos na an Iran hilom na naggigibo nin mga armas nuklear manta ngani pinagpapahimutikan kan Irani na naggigibo sinda kani. [30]
[hirahón] TURKEYA NAGSAKYADA SA AMIHANAN IRAK, LAPAG MGA KURDONG MILITANTE
- An militar kan Turkeya nagsakyada sa bandang amihanan kan Irak kun saen nakamugtak an Kurdistan Workers' Party (PKK), an katiriponan kan mga Kurdong miitante. An pananakyada nagpoon kan alas syeteng banggi nin Huwebes (Peb. 21) asin susog sa pagbuyagyag kan Turkeya, 24 militanteng Kurdo an nagkagaradan asin 5 sa lado kan mga Turko.
An deklarasyon kan Turkeyang militar malikay an saindang operasyon ngani mayo na madamay na mga sibilyan o maraot man na mga Kurdong infraestructura. An puntariya lamang daa ninda an mga Kurdong militante. An mga Kurdo duwang dekada nang naglalaban sa Turkeya sa pagpirit na makatogdas nin talingkas na teritoryo para sa mga Kurdo sa Habagatan-Subangan kan Turkeya.
An Estados Unidos naman asin an Irak mismo kinakampihan an Turkeya ta an paghiling kan duwang ini an mga Kurdo, na may ibang kultura asin sadiring tataramon, pwedeng ikabaak kan teritoryo mismo kan Irak huli ta an mga ini nagmamawot magpatindog nin sadiring nasyon.
An mga Kurdo , na nagbibilang ngonyan mga 20 milyon, mayong sadiring nasyon alagad warak sinda sa kahiwasan kan Iran, Turkeya, Irak, asin Syria.
[hirahón] LALAKE, NASENTENSYAHAN HULI SA SURAT WINALAT KAN AGOM NYANG GINADAN
- Sa kasong naghinog na gayong 10 taon, si Mark Jensen, 48, nasentensyahan nin pagkakulong nin lawig-buhay huli sa surat na winalat kan agom niyang si Julie Jensen.
Sa surat ibinuyagyag niya an mga ebidensya asin mga sahot nya na an agom nya may planong gadanon sya sa paghilo. Kaya an surat winalat nya sa sarong kanatad asin sinabi nya na kun sya magadan an enot na dapat pagsahotan iyo an agom nya asin an surat "itao sa pulis."
Sa surat sinabi nya kun magadan man siya bako ta naghugot sya ta dai daa nya nanggad gibohon iyan huli ta padangat niyang maray an duwa nyang aki.
Sabi nya pighomotan syang hilohon ta aram niya an saiyang agom na si Mark dai lamang siya pinatawad sa sarong pagkakasala nya. Kadto pang pitong taon na nakaagi, sabi nya sa surat, nagkaigwa siyang relasyon sa sarong lalaki.
Ibinaba an sentensya duman sa Winconsin kan nakaaging Huwebes (Peb. 21) asin nagin kontrobersyal an sentensya ta haloy na pigpara-ulang an surat kan defensa ta ini daa sakop kan inaapod na hearsay rules na kun saen may derecho an akusado na hampangon asin kwestyonon an testigo.
