Marco Polo
De Uiquipedia
Marco Polo (1254 – 1324) foi un viaxeru y esplorador venecianu. Con so padre Nicolayo (Nicolò ) y so tíu Mateo (Maffeo o Maffio) foi ún de los primeros europeos en viaxar pela ruta de la seda hasta China ( qu'él llamaba Catai). Nesti país quedóse diecisiete años al serviciu de Cublai Can. El rellatu de los sos viaxes per Oriente tuvo enforma popularidá a finales de la edá media y foi per munchu tiempu una de les poques fontes d’información sobre Asia pal mundu occidental.
[editar] Biografía
Marco Polo nació’l 15 de setiembre de 1254 nuna familia de mercadores de Venecia.
Cuando Marco tenía un añu, en 1255, so padre Nicolayo y so tíu Mateo fixeron un primer viaxe per Asia. Marco Polo quedó en Venecia a cargu de so madre.
En 1266 Nicolayo y Mateo llegaron a la corte del Gran Can na ciudá de Cambaluc (anguaño Pequín). Ellí conocieron a Cublai Can, que –yos encomendó una carta pal Papa pidiendo que –y mandare “cien homes sabios” pa conocer meyor la relixón cristiana. Cuando llegaron a Venecia en 1269, Marco Polo tenía quince años y so madre yá morriera.
En 1271 Mateo y Nicolayo Polo entamaron un segundu viaxe cola respuesta del Papa. Esta vez diben acompañaos de Marco. Dempués de trés años d’un viaxe nel que pasaron per Armenia, Persia y Afganistán, llegaron a la ciudá de Kai-ping-fu (anguaño Shang-tu), residencia de branu de Cublai Can .
Los Polo quedaron doce años en China al serviciu de Cublai Can. Nesti tiempu, Marco Polo aprendió a falar chinu, tártaru y persa y desempeñó varies misiones oficiales per tierres del imperiu del Gran Can. Estes misiones permitieron-y conocer de primera mano la flora , la fauna y les costumes de los habitantes d’un inmensu territoriu.
En 1291 los venecianos entamaron un viaxe de trés años pelos mares del Sur, escoltando a la princesa Cocacin, que debía casase col rei de Persia. A la fin de la misión, volvieron a Venecia en 1295, dempués de pasar per Trebisonda y Constantinopla. En volviendo a Venecia, Marco Polo participó na guerra contra Xénova. Na batalla de Curzola (1298), na que taba al mandu d’una galera veneciana fixéronlu prisioneru los xenoveses.
Na cárcel conoció a Rustichello de Pisa. , que redactó en francés el Llibru de les maravíes del Mundu (o Llibru de los millones ) a partir del rellatu de los sos viaxes. [Esiste una traducción asturiana del llibru, fecha en 1996.]
En 1299 Marco Polo salió de la cárcel, Pocu dempués casóse, tuvo trés fíes y y foi nomáu miembru del Gran Conseyu de Venecia. Morrió nesta ciudá el 8 de xineru de 1324.
