UNESCO
vanuit Wikipedia, die vrye ensiklopedie.
UNESCO is die Engelse afkorting vir United Nations Educational, Scientific and Cultural Organization (Opvoedkundige, Wetenskaplike en Kulturele Organisasie van die Verenigde Nasies), 'n spesiale organisasie van die Verenigde Nasies wat in 1945 gestig is en sy hoofkwartier in die Franse hoofstad Parys het. Tans het 191 lande as lede by die UNESCO aangesluit, waaronder ook Suid-Afrika, een van die twintig stigterslede.
Die UNESCO is onderverdeel in 'n Algemene Konferensie en 'n Uitvoerende Raad, terwyl die Sekretariaat-Generaal die UNESCO se bedrywighede bestuur.
Die UNESCO is veral werksaam op die gebied van die onderwys, sosiale wetenskappe, natuurwetenskappe, die internasionale kulturele samewerking en die inligtingsbedryf (wat onder meer die pers, uitsaaidienste, televisie en filmkuns insluit). Die UNESCO bevorder ook geletterheid in ontwikkelende lande en bewaar die wêreldkultuurerfenis. Die lys van wêrelderfenisgebiede word deur die UNESCO saamgestel.
[wysig] Doelstellings
Die UNESCO beywer hom veral vir die reg op 'n basiese opleiding vir almal en loods gesondheids- en higiëneprogramme. Die bestryding van VIGS en dwelmsug en die heropbou van die onderwysstelsel in gebiede, wat deur natuurrampe getref of deur burgeroorloë verwoes is, vorm tans 'n belangrike bestanddeel van die UNESCO se internasionale bedrywighede.
Aktiwiteite op wetenskaplike gebied sluit die bevordering van die internasionale samewerking ten opsigte van die oseanografie, hidrologie, geologie en omgewingswetenskappe in. Die bewaring van biologiese spesies en die beskerming van waterhulpbronne staan bo-op die lys van die UNESCO se doelstellings in hierdie verband.
Die UNESCO doen ook navorsing oor die toepassing van moderne wetenskappe en die gevare wat dit inhou. Die afdeling Kommunikasie en inligting ondersoek probleme in verband met die opkoms van 'n wêreldwye inligtings- en kennismaatskappy. Persvryheid en toegang tot belangrike inligting geniet besondere aandag, en die UNESCO verskaf 'n verskeidenheid dienste aan ontwikkelende lande soos die opleiding van joernaliste en die opbou van nuusdienste en radiostasies.
Die bewaring van die kulturele erfenis van die mensdom word deur 'n onderafdeling van die UNESCO bevorder, die World Heritage Committee (die "Komitee van die Wêrelderfenis").
Die UNESCO is tans besig om 'n ooreenkoms vir die bewaring van die kulturele diversiteit uit te werk en koördineer ook aktiwiteite in verband met die Verenige Nasies se Wêrelddekade van Onderwys vir Volhoubare Ontwikkeling (2005-2014).
[wysig] Die twintig stigterslede
Verenigde Koninkryk
Nieu-Seeland
Saoedi-Arabië
Suid-Afrika
Australië
Indië
Meksiko
Frankryk
Dominikaanse Republiek
Turkye
Egipte
Noorweë
Kanada
Volksrepubliek van Sjina
Denemarke
Verenigde State
Tsjeggië
Brasilië
Libanon
Griekeland
| Verenigde Nasies: Gespesialiseerde Organisasies |  |
|---|---|
| IAEA | ICAO | IFAD | ILO | IMO | ITU | FAO | UNESCO | UNICEF | UNIDO | Wêreldposunie | Wêreldbank | WHO | WIPO | WMO | |
