Kuba
vanuit Wikipedia, die vrye ensiklopedie.
Kuba, formeel Republiek Kuba, is 'n land in die Karibiese Gebied, bestaande uit die eilande Kuba en Isla de Juventud, plus 'n hele aantal kleiner eilandjies daaromheen. Kuba word in die noorde begrens deur die Golf van Meksiko en die Atlantiese Oseaan, in die ooste deur Windward Passage, in die suide aan die Karibiese See en in die weste deur die Straat van Yucatán.
Die land is amptelik 'n sosialistiese staat en word sedert 1959 deur Fidel Castro geregeer. Die hoofstad is Havana en die amptelike taal is Spaans.
[wysig] Geskiedenis
In 1492 is die eiland ontdek deur Christophorus Columbus. Diego Velázquez de Cuellar het Kuba in 1511 verower en dit het 'n Spaanse kolonie geword. Binne 'n honderd jaar was die inheemse bevolking basies uitgewis en het die Spanjaarde slawe vanuit Afrika na Kuba laat kom. In teenstelling met die res van Spaans-Suid-Amerika, wou Spanje Kuba in die 19de eeu as 'n kolonie behou, maar in 1898 word dit na die Spaans-Amerikaanse Oorlog deur die Verenigde State verower. In 1902 verleen die Verenigde State onafhanklikheid aan die eiland, maar dit bly tot en met 1934 'n protektoraat. Nadat Fulgencio Batista in 1952 vir die tweede keer die diktator van die land word, begin die revolusionêr, Fidel Castro, 'n opstand. Dit misluk egter en Castro moes vlug. In 1956 keer hy met 'n getroue groepie volgelinge terug en hierdie keer is sy opstand meer suksesvol: op 1 Januarie 1959 het Castro die mag in Kuba oorgeneem. Hy ontbloot hom as 'n kommunis en tree sodoende vanselfsprekend in 'n vyandige posisie met die Verenigde State. In 1961 vind die mislukte Inval van Varkensbaai plaas, waardeur teenstanders van Castro, met behulp van die CIA, die regering probeer omverwerp. Vervolgens klop Kuba by die Sowjetunie vir hulp aan en dit gee aanleiding tot die Kubakrisis van 1962. Dit was 'n naelbyt situasie waar die VSA en die Sowjetunie tot byna op die grens van volskaalse oorlog gekom het. Na die val van die Sowjetunie, Kuba se grootste handelsvennoot, het die ekonomie van Kuba in duie gestort. In die laaste paar jaar het Kuba noodgedwonge uit isolasie gekom en bande gesmee met die meer linkse regerings van Latyns-Amerika, veral Venezuela.
[wysig] Bronnelys
(Nederlandse Wikipedia)
