Tapa
Mula sa Tagalog Wikipedia, ang malayang ensiklopedya.
- Para sa pagkaing pangmeryenda at pulutan, tingnan ang Tapas.
Ang tapa ay isang popular na ulam sa Pilipinas. Kadalasaang itong mga maninipis na hiwa ng baka ngunit maari ding itapa ang ibang karne o isda. Karaniwan ay pinapang-almusal o pang-agahan ito kasama ng sinangag na kanin. Madalas din itong kainin kasama ng itlog, na maaaring pinrito, pinaalat, o kung-ano pa, kamatis, o ng suka. Hinango ang salitang "tapa" mula sa salitang Kastila na tapas, mga pagkaing merienda na nagmula bilang panakip (tapa) ng mga inumin upang hindi langawin.
[baguhin] Tapsilog
Tinatawag na tapsilog ang magkakasamang tapa, sinangag, at itlog, at tapsihan ang tawag sa mga restauran na tapsilog ang pangunahing tinintinda. Ngunit sang-ayon sa CopongCopong's Pinoy Slang Dictionary, mga salitang balbal ang mga salitang "tapsilog" [1] at "tapsihan" [2]. Bagaman ginagamit ang mga salitang ito sa karamihan sa mga nagtitinda nito at madalas banggitin ng halos lahat ng uri ng mga Filipino, kung gayon, maaaring ituring ang mga salitang ito bilang kasama sa pamantayang wika at hindi salitang balbal.
At hinggil sa salitang "tapsilog", nilalagyan ng hulaping silog sa kanilang pangalan ang lahat ng ulam na may kasamang sinangag at itlog. Katulad ng mga sumusunod:
- Adosilog - adobo, sinangag at itlog
- Bangsilog - bangus, sinangag at itlog
- Bisteksilog - bistek, sinangag at itlog
- Dangsilog - danggit, sinangag at itlog
- Chosilog - chorizo, sinangag at itlog
- Chiksilog - chicken (manok), sinangag at itlog
- Cornsilog - corned beef, sinangang at itlog
- Hotsilog - hotdog, sinangag at itlog
- Longsilog - longganisa, sinangang at itlog
- Litsilog - lechon, sinangag at itlog
- Tosilog - tocino, sinangag at itlog
[baguhin] Mga nagtitinda ng tapsilog
Karaniwang makikita ang mga malilit na mga tapsihan sa bawat barangay ngunit may mga malalaking mga negosyo ang nagtitinda din ng tapsilog katulad ng Tapa King at Goto King. Nagtitinda din ng tapsilog kahit ang mga malalaking fast food katulad ng Jollibee at McDonald's sa kanilang mga almusal sa Pilipinas.
