Katt

Frå Wikipedia – det frie oppslagsverket

Katt er eit kjæledyr og rovdyr frå kattefamilien. Tamkatten (Felis silvestris catus) stammar frå villkatten, og er òg kjend som huskatt, pusekatt, kattepus og berre katt eller pus. Tamkatten har stundom gått under det latinske namnet Felis silvestris domesticus.

[endre] Avstamming

Tamkatten skil seg frå villkatten, Felis silvestris, i temperament, pels, storleik og tannplassering, og er ikkje like resistent mot visse blodkreftsjukdomar som vert spreidde gjennom virus. Ofte vert forvilla tamkattar ukorrekt kalla for "villkattar".

Katten har truleg oppstått av den nordafrikanska villkattrasen Felis silvestris ssp. lybica, som er ganska lett å temje, eventuelt para med europeisk villkatt. Kor lenge katten har levd nær menneske, er uklårt, det vert tala om mellom 9000 og 15000 år. Egyptarane er blant dei som i lengst tid har hatt katt som tamdyr.

[endre] Kattar vs. større katteartar

Bortsett frå storleiken er det ikkje så mykje som skil ein villkatt frå t.d. ein tiger. Tigeren er likevel meir aggressiv og har meir musklar i høve til storleiken. Katten er dessutan ein meir opportunistisk jeger på den måten at han kan drepe og ete langt fleire artar. For store kattedyr som tigeren vil det vere sløsing av energi å jakte på mus, sett i høve til den vesle næringa ein får tilbake på det. Unntaket er leoparden som òg jagar mindre dyr.

Ein annan skilnad er at kattar ikkje kan brøle, og at dei kan male både når dei pustar inn og ut.

[endre] Vanar

Den vanlegaste måten ein katt kommuniserer med menneske på, er ved å mjaue. Det varierer frå katt til katt kor mykje han mjauar. Ein katt kan mjaue på ulike måtar, og dermed formidle ulike bodskapar. Ein vanleg grunn til at katten mjauar, er at han ber om noko, t.d. å få mat eller få gå ut. Han kan også mjaue når han vil helse på nokon eller vil leike.

Katten nyttar halen til å halde balansen. Halen kan òg formidle sinnsstemninga til katten; ein hale som peikar rett opp, inneber at katten kjenner seg tilfreds, medan ein hale som piskar fram og tilbake, indikerer at katten er sint eller spent framføre eit åtak mot eit bytte.

Ein huskatt søv om lag 16 timar per dag.

Katten kan kome opp i ein fart på 50 kilometer i timen, men berre som kort spurt. Ein katt kan ofte gjere vertikale hopp, frå stillesitjande, på opp til to meter.

[endre] Genetikk

Spontant muterte katter med blå auge og kvit pels har ein høgare genetisk risiko for å verte fødde døve. Kvite rasar vert derimot ikkje omfatta av denne defekten, det har å gjere med den dominante W-genen.