Dave Cousins

Frå Wikipedia – det frie oppslagsverket

Dave (David) Cousins (fødd 7. januar 1945) har vore leiar, songar og den fremste låtskrivaren i den engelske gruppa Strawbs, som vart danna i 1967. Frå først av var bandet ein bluegrass-trio kalla Strawberry Hill Boys, eit namn dei tok frå plassen dei kom frå i Twickenham, London. Namnet vart etter kort tid forkorta til «Strawbs». Banjo var lenge hovudinstrumentet for Cousins, men då dei i løpet av kort tid endra stil fleire gongar og var innom folk, folkrock og progressiv rock, vart det oftast akustisk gitar han trakterte. Bandet var mest aktiv i åra frå 1969 til 1979, då dei tok ein pause etter å ha laga 15 album. Bandet vart samla på ny i 1984, og har gjeve ut fleire nye album.

Cousins har i periodar utgjort ein akustisk duo med Brian Willoughby, og har turnert som trio under namnet Acoustic Strawbs med Willoughby (til august 2004), Dave Lambert og Chas Cronk (frå september 2004). På slutten av 1960-talet turnerte Cousins i Europa som gitarist for Joni Mitchell og Leonard Cohen, og han var ein periode rundt 1970 mykje brukt som studiomusikar.

Cousins har utdanning i statistikk og rein matematikk frå Universitetet i Leicester, og etablerte sitt eige firma innan statistisk analyse sist på 1960-talet. I tillegg til karrierane i musikk og som statistikar har han har vore svært aktiv innan kommersiell radio. Han arbeidde som produsent for Danmarks Radio frå 1969 til 1979. I 1979 vart han tilsett som programdirektør for Radio Tees i Middlesborough, og i 1984 vart han administrerande direktør for Devon Air Double Radio i Essex.

I 1991 etablerte Cousins medieanalyseselskapet St. David's Research, og spesialiserte seg på radiokonsesjonar. I løpet av åra 1991-1999 erobra han 11 konsesjonar i England. Han driv óg plate- og medieselskapet Witchwood Records.

Dave Cousins er framleis aktiv som musikar, og turnerer Nord-Amerika og Europa med Acoustic Strawbs og Strawbs fleire månader kvart år.

Cousins er rekna som ein av rockens dyktigaste og giftigaste låtskrivarar. Mange av tekstane hans har sterkt politisk innhald, t.d. The Battle, The Hangman and the Papist, New World og Beside the Rio Grande. I 1974 vart låtskrivinga hans teken opp i det britiske parlamentet, der dei konservative ville ha sett forbod mot fleire av songane til Strawbs, som dei rekna som «samfunnsnedbrytande». Framlegget fekk ikkje fleirtal, men ein sterkt forarga Cousins valde då å gå i «eksil» for fleire år.

Cousins har gjeve ut diktsamlinga «The Bruising of Hearts» 1993, og han er omsett til nynorsk av Arnt Birkedal i «To veker sist sommar» 1999.