Aortaklaff

Frå Wikipedia – det frie oppslagsverket

Tverrsnitt av hjartet, mellom forkammera og hjartekammera. Aortaklaffen ligg midt i hjartet med pulmonalklaffen foran til venstre. Ein kan sjå høgre og venstre kransarterie.(Frå Gray's Anatomy)

Eit lengdesnitt frå venstre hjartekammer, gjennon aortaklaffen og ut i aorta. Klaffen er bretta open og biletet viser dei tre lommene i klaffen. (Frå Gray's Anatomy)

Aortaklaffen er ein hjarteklaff og sit i utløpet frå venstre hjartekammer og i starten av livpulsåra (aorta). Han slepp blodet frå hjarte og ut systemkretsløpet når hjarte trekk seg saman (systolen). Når hjarte på nytt blir fyllt (diastolen) hindrar klaffen blodet i å renne attende.

Aortaklaffen har ein sirkelforma grunnflate. Han har tre kuspar (frå latin cuspis, brodd) eller lommer, som opnar når trykket i venstre hjartekammer stig. Når trykket synk, snur blodstraumen og lommene blir fylt med blod og klaffen lukkar. Han liknar derfor på veneklaffane.

Nederst på livpulsåra, bak kuspane, er det ei utviding kalla sinus Valsalva kor ein finn avgangen av kranspulsårene. Sinus Valsalva gjer at kuspane ikkje legg seg heilt inn mot åreveggen og at blodstraumen ut i kranspulsårene ikkje blir avbroten.