Koffergrouf vu Stolzebuerg
Vu Wikipedia, der fräier Enzyklopedie.
D' Koffergrouf vu Stolzebuerg war eng Minière, an deer bis 1944 Koffer ofgebaut gouf. Si läit annerhalwe km nordwestlech vu Stolzebuerg, am Dall vun der Klangbaach, ënner em Goldbierg, a kann zënter 2000 nees deelweis besicht ginn.
Si geet, op 12 Stäck, bis zu 169 m ënnert de Buedem. Déi längste Galerie, um 9. Stack, ass 400 m laang.
Inhaltsverzeechnes |
[Änneren] Geschicht
Wahrscheinlech hate schon zu der Zäit vun de Kelten a vun de Réimer d'Leit Koffervirkommen hei entdeckt an ofgebaut. Déi éischt schrëftlech Mentioun vun der Grouf ass vu 1717 a geet ëm d'Konzessioun vun Ofbaurechter. Bis zum Enn vum 18. Joerhonnert huet d'Grouf e puermol hire Proprietär gewiesselt.
Am 19. Joerhonnert, ënert hollännescher Regierung, gouf den Ofbau verstäerkt nees opgeholl (1820-25).
Vun 1853 un huet de Joseph Francotte drëm beméit, den Ofau nees opzehuelen. Hien huet an der Ëmgéigend no weidere Kofferäerz-Odere gesicht, mat aneren eng Gesellschaft, d' Société des Mines de Stolzembourg, gegënnt an d'Gruefrechter op engem Areal vun iwwer 2000 Hektar kritt, dat d'Nopeschgemenge mat emfaasst huet.
Bis 1864 goung d'Grouf 58 m déif, an eng 800 m Galerie waren am ganze gegruewe ginn. An deem Joer huet d'Gesellschaft hire Betrib agestallt, well d'Onkäschten de Verkafspräis vun 20 Tonnen am Joer iwertraff hunn.
Vun 1882 bis 1886 gung déi éischt Phase vun industrieller Exploitatioun un: Dampmaschinne koumen zum Asaz, déi et erméiglecht hunn, d'Galerië bis zu 550 m laang ze gruewen a bis op eng Déift vun 210 m iwwert dem Mier ze gruewen. Tëschent 1901 an 1913 hunn alt nees nei Besëtzer de Stollen a Stand gesat a bis op eng Déift vun 161 m i. d. M. (dh bis op den 9. Stack) ausgeweit.
1938 bis 1943 ass den Zougangswee esou breet gemaach ginn, dass een huet kinne mat Camionen dohinner fueren (virdru sinn d'Äerzer fir d'éischt mat flaache Schëffer, dono mat Karen an Teimeren an d'Dall transportéiert ginn).
Elektresch Pompele sinn zum Asaz komm, déi et erméiglecht hunn, bis op 127 m i.d.M déif kënnen ze gruewen.
Opwuel alt bis zu 5000 Tonne Kofferäerz am Joer ofgebaut goufen, war d'Grouf ni richteg rentabel: Den Haaptgrond war, dass d'Äerzer hu misse bis an d'Ruhr oder bis an Groussbritannien transportéiert ginn, wou Schmelze waren. Sou ass et net verwonnerlech, dass s'ëmmer nees hire Proprietär gewiesselt hunn, wann dësen d'Hoffnung op räich Virkommnisser opginn hat.
Während der däitscher Besatzung am Zweete Weltkrich gouf de Koffer fir déi däitsch Rüstungsindustrie ofgebaut, mee d'Ardennenoffensiv huet deem 1944 endgülteg en Enn gesat.
Fofzeg Joer laang war d'Grouf verlooss an huet sech, well keng Pompele méi fonctionnéiert hunn, mat Waasser gefëllt.
Ëm d'Joer 2000 goufen déi iewescht 3 Stäck eidel gepompelt a fir Visiten aménagéiert.
