Gemeng
Vu Wikipedia, der fräier Enzyklopedie.
D'Gemeng (de: Gemeinde, fr: commune) ass déi klengst administrativ Ënnerdeelung, déi vun engem exakt définéierten Territoire gebilt gëtt an déi normalerweis eng oder méi Uertschafte gegräift. D'Gemeng gëtt gefouert vun demokratesch gewielte Volleksvertrieder.
Lëtzebuerg ass momentan an 116 Gemengen opgedeelt.
Inhaltsverzeechnes |
[Änneren] Kommunal Autonomie
D'Gemengeresponsabel sollen d'lokal Interessen eegestänneg verwalte kënnen. Dëse Grondsaz ass am Artikel 107 vun der Lëtzebuerger Constitutioun festgeschriwwen:
"Les communes forment des collectivités autonomes, à base territoriale, possédant la personnalité juridique et gérant leur patrimoine et leurs intérêts propres".
D'Gemenge stinn allerdéngs ënner staatlecher Kontroll.
[Änneren] De Gemengerot
De Gemengerot ass souzesoen d'Parlament vun der Gemeng a gëtt all sechs Joer nei gewielt. D'Zuel vun de Conseillieren hänkt vun der Awunnerzuel vun der Gemeng of an ass ëmmer ongeruet. De Gemengerot kënnt wéinegstens all dräi Méint zesummen a gëtt vum Schäfferot oder, wann et presséiert, vum Buergermeeschter ageruff. De Gemengerot ass beschlossfäeg wann d'Majoritéit vu senge Memberen do sinn. D'Séancë sinn an der Regel ëffentlech. De "Conseil" ass fir all kommunal Ugeleeënheeten zoustänneg a kann Reglementer, déi natierlech de Gesetzer vum Land entsprieche mussen, erloossen. De Gemengerot këmmert sech ëm d'Verwaltung a stëmmt de Budget, dee vum Schäfferot presentéiert gëtt. D'lokal Schoulorganisatioun, d'Astelle vu Personal (Beamten, Employéen, Léierpersonal), d'kommunal Verkéiersregelungen, d'Ausschaffe vun engem allgemenge Bebauungsplang mat engem Bautereglement falen ënner d'Kompetenz vum Gemengerot.
[Änneren] De Schäfferot
De Schäfferot ass d'Regierung um lokale Plang. Normalerweis besteet de Schäfferot aus dem Buergermeeschter an zwee Schäffen, déi alleguer Member vum Gemengerot musse sinn. Grouss Gemenge kënnen awer och méi Schäffen hunn. De Buergermeeschter gët vum Groussherzog genannt, d'Schäffen aus de Stied vum Groussherzog, an déi aus deenen anere Gemenge vum Innenminister, ëmmer op Virschlag vun der Majoritéit vun de Conseillieren.
Niewent de kommunale Chargen handelt de Schäfferot a bestëmmte Fäll och als Organ vum Staat. Hien ass zoustänneg fir d'Ausféierung vun de Gesetzer a Reglementer op lokalem Plang.
De Schäfferot préparéiert d'Sëtzunge vum Gemengerot a suergt fir d'Publizéieren an Ausféieren vun den Décisiounen. Hie géréiert déi kommunal Aarbechten a iwwerwaacht d'Servicer vun der Gemeng.
[Änneren] De Buergermeeschter
De Buergermeeschter (de: Bürgermeister, fr: bourgmestre) gëtt vum Groussherzog ënnert de lëtzebuerger Memberen vum Gemengerot fir e Mandat vu sechs Joer ernannt, op Propose vun der majoritéit vun de Membre vum Gemengerot. Dat Mandat ass erneierbar. De Buergermeeschter gëtt zu Lëtzebuerg also nie vun de Leit gewielt, weder direkt nach indirekt.
De Buergermeeschter spillt am Schäfferot an am Gemengerot vun der Gemeng eng primär Roll. E suergt vir d'Ausféiere vun de Policegesetzer a -reglementer. Dozou zielt och d'Bautereglement. De Buergermeeschter erdeelt (oder refuséiert) am Prinzip d'Baugenehmigungen. En iwwerwaacht d'ëffentlech Sécherheet, den ëffentleche Regëster an en ass officier de l'état civil (Standesbeamten). Déi zivil Hochzäit gëtt virum Buergermeeschter oder sengem Remplaçant gefeiert.
[Änneren] Iewescht Opsiicht
Déi sougenannten tutelle administrative ass d'iewescht Opsiicht, déi vum Inneministerium iwwert d'Gemenge waacht. D'Distriktskommissären kontrolléieren d'Gestioun vun de Gemengen. Eng ganz Partie Decisioune gi vum Staat aprouvéiert oder, wa se géint d'allgemeng Intresse oder géint déi bestehend Legislatioun verstoussen, verworf. D'Gemeng kann awer géint d'Decisoune vum Staat virum Verwaltungsgeriicht kloen.
[Änneren] D'Gemengesyndikater
Aus techneschen oder finanzielle Grënn kann eng Gemeng bestëmmte Servicer an Aufgaben net eleng droen. D'Gemenge schléisse sech dofir a Syndikater zesummen. Zu Lëtzebuerg gëtt et momentan 64 sou Syndikater, vu Waasserversuergung a Müllentsuergung iwwer Sportinfrastrukture bis Schoulgebaier.
Kuckt och den Artikel Interkommunal Syndikater zu Lëtzebuergd'Artikelen [[{{{2}}}]] an [[{{{3}}}]]d'Artikelen [[{{{4}}}]], [[{{{5}}}]] an [[{{{6}}}]]d'Artikelen [[{{{7}}}]], [[{{{8}}}]], [[{{{9}}}]] an [[{{{10}}}]]. 
