Yudhistira
Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Bébas mawi basa Jawi
| Pandhawa |
| Yudhistira |
| Bima |
| Arjuna |
| Nakula |
| Sadewa |
Jeneng Yudhistira, ing crita Jawa, asline dienggo dening raja jin ing alas Mretani. Ing lakon Babad Alas Mretani, Pandhawa kasil ngalahke jin-jin ing alas kuwi. Yudhistira manjing ana ing ragane Puntadewa, pembarepe Pandhawa. Jeneng Yudhistira luwih kondhang dienggo dening Puntadewa kang banjur dadi raja ing Amarta utawa Indraprasta, tilas alas Mretani.
Ing Mahabharata, Yudhistira (utawa tinulis Yudisthira) iku ya Puntadewa dhewe. Dheweke lair seka bun-bunan Dewi Kunti, mula saka iku dijenengi Puntadewa kang maknane punjering kaluhuran. Yudhistira dhewe maknane raja prajurit. Ing Mahabharata, Pandhawa nduwe bojo kang padha, yaiku Dewi Drupadhi (poliandri). Nanging ing wayang, Drupadhi iku bojone Puntadewa. Seka jejodhoan iki nuwuhake Pancawala.
Puntadewa tinitisan Bathara Darma, dewane keadilan. Mula saka iku, Puntadewa uga sinebut Darmakusuma. Raja iki kondhang pinter dolanan catur (sekak). Nanging merga seneng dolanan dhadhu, Pandhawa kudu dibuwang seka Astina.
Ing versi Mahabharata India, Yudhistira pinter olah kaprajuritan lan gagah nalika perang. Yudhistira iku artine raja prajurit. Nanging ing crita Jawa, Yudhistira dadi priyayi kang alus lan welas asih. Ana ngendi wae, Yudhistira asring dikancani Sadewa lan Nakula.
Pusakane kang asring dadi kembang lambe dhalang yaiku Jimat Kalimasada. Ana uga Payung Kyai Tunggulnaga lan tombak Kyai karawelang. Puntadewa iku jujur lan ora nate gelem ngapusi. Dheweke nduwe getih putih kaya baladewa, kang artine ora gelem ngapusi.
Ing pungkasaning crita, Puntadewa munggah swarga bareng karo Pandhawa liyane. Puntadewa bareng karo asune moksa sing pungkasan. Tinimbang Pandhawa liyane, raja iki luwih resik atine. Ora kumalungkung, ora sok kuwasa, jujur, lan ngugemi agama kanthi ngati-ati.
Ing surga, Puntadewa ora trima amarga sedulur-sedulure padha mlebu neraka. Dheweke njaluk supaya melu mlebu neraka. Kamangka, para Kurawa malah enak-enak ana surga. Jebul kuwi mung sawetara. Pandhawa kudu nglebur dosa dhisik sawetara banjur mlebu surga. Dene Kurawa bisa ngrasaake endahing surga amarga ana sawetara kabecikan, nanging ora akeh. Sawise Kurawa ngrasaake surga banjur dileboake ana ing neraka.
