XML

De Wikipedia, le encyclopedia libere

eXtensible Markup Language (XML) es un standard mantenite per le World Wide Web Consortium pro crear linguages de marcation pro propositos special. Illo es bastante general, de sorta que linguages basate super XML pote esser usate pro describer varie typos differente de datos, e texto tamben. Su proposito principal es facilitar le uso in commun de texto e information structurate trans le Internet. Ben que XML es derivate de SGML, illo es largemente simplificate, malgrado includer incrementos pro portabilitate. Linguages basate super XML (per exemplo, RDF, SMIL, MathML e SVG) es mesme describite de in maniera formal, permittente que programmas modifica e valida documentos in iste linguages sin cognoscentia previe.

[modificar] Regulas syntactic de un file XML

Uno debe notar que le files XML es simple files de texto. Le codification es specificate in le prime declaration. Le codification predefinite es UTF-8 que non differe del ASCII si solmente le characteres ASCII es usate.

A differentia de, per exemplo, HTML, le efficacia de XML es altemente dependente de structura, contento e integritate. A fin que un documento sia considerate "ben formate", isto es, totalmente conforme al specification XML, le file XML debe conformar se (al minus) al sequente requisitos:

Un documento XML valide debe haber un (e solo un) elemento radice.
Elementos que contine {entries} debe posseder un etiquetta de apertura <exemplo> e de clausura </exemplo>. (Un elemento vacue <exemplo></exemplo> pote assumer le forma optional <exemplo/>.)
Tote le valores de attributo debe esser delimitate per virgulettas.
Etiquettas pote esser annidate mais non pote imbricar.

Se debe notar que elementos in contexto de XML es sensibile al differentia inter majusculas e minusculas. Per exemplo, <Exemplo> e </Exemplo> es un par correspondente ben formate, durante que <Exemplo> e </exemplo> non lo es.

Additionalmente, de nove a differentia de HTML, le etiquettas de XML explica lo que significa le datos, in vice de explicar como exhibir lo.

[modificar] Document Type Definition

Ante le advento de linguages de description de datos generalisate como SGME e XML, le projectator de software debeva definir formatos de file special o micre linguages pro usar datos in commun inter programmas. Isto demandava scriber specificationes detaliate e analysatores syntactic e scriptores. Pro un linguage basate super XML, totevia, le projectator de software pote specificar le syntaxe basic scribente un DTD, o un description plus detaliate usante un Schema XML. Il ha utensiles facilemente disponibile (e, in alcun casos, gratuite) que comprende iste descriptiones – analysatores e scriptores de XML. Isto pote reducer significantemente le costo de disveloppamento in le cyclo de vita del software.

Quando un file XML es conforme al regulas de bon formation e illo es in concordantia con le DTD o Schema al qual illo se refere, alora le file XML es considerate un "documento valide".

[modificar] Exhibir files XML super le web

Le linguage de folios de stilo XSL es un adjuncto ulterior al XML, que permitte que le usatores describe proprietates visual e transformationes de datos XML sin incastrar iste instructiones in le datos mesme. Le file resultante es alora un file HTML que usa CSS pro presentation.

Un file XML pote tamben esser formatate directemente in alcun navigatores como per exemplo Internet Explorer 5 o Mozilla con le linguage de folios de stilo CSS. Iste processo ancora non esseva stabile in januario de 2003. Le files XML debe alora includer un referentia al folio de stilo:

<?xml-stylesheet type="text/css" href="miFolioDeStilo.css"?>

Durante que le formatation de XML in navigatores se disveloppa, le alternativa es converter lo in HTML, PDF o altere formatos in le servitor. Programmas como Cocoon processa un file XML contra un folio de stilo (e pote effectuar altere processamentos tamben) e invia le resultato al navigator del usator sin que le usator sia conscie del processo subjacente.

[modificar] XPath

Es possibile referer se a componentes individual de un documento XML per medio de XPath. Isto permitte que folios de stilo in XSL o XSLT selige partes specific de un documento in qualcunque sequentia necessari a fin de componer le exito requirite (le documentos non necessita esser processate sequentialmente).

[modificar] XML Query

XML Query es pro XML lo que SQL es pro bases de datos relational.

[modificar] Namespaces

Namespaces (etiquettas de contextualisation) permitte que le mesme documento contine elementos e attributos proveniente de vocabularios differente, sin le occurrentia del conflictos de nomenclatura.

Illo non es compatibile con DTDs (Schemas debe esser usate).

[modificar] Processamento de files XML

Le APIs largemente usate in le processamento de datos XML per linguages de programmation es SAX e DOM. SAX se usa pro processamento sequential durante que DOM se usa pro processamento de accesso aleatori.

Un processator de XSL pote esser usate pro formatar un file XML pro exhibition o impression. Le function intendite de XSL mesme es crear files PDF. XSLT es pro transformar lo in altere formatos, includente HTML, altere vocabularios de XML, e qualcunque altere formato de texto pur.

Le formato de file native de OpenOffice.org es XML. Alcun partes de Microsoft Office 11 tamben essera capace de editar files XML con un Schema (mais non un DTD) fornite per le usator. Existe dozenas de altere editores de XML disponibile.

[modificar] Versiones de XML

Le prime version de XML esseva XML 1.0.

Le ultime version official de XML es 1.1. XML 1.1 (tamben cognite como Blueberry) extende XML 1.0 con le addition de supporto a nove characteres in Unicode 3.0, e le reparation de un omission que faceva XML non supportar le conventiones de fin de linea de EBCDIC.

Existe tamben discussiones super un XML 2.0, ben que non es clar si un tal entitate jammais apparera. XML-SW (SW pro "skunk works"), publicate per un del disveloppatores original de XML, contine alcun propositiones de lo que XML 2.0 poterea presentar: elimination de DTDs del syntaxe, integration de Namespaces, XML Base e XML Information Set intra le standard basic.