荔園動物園
出自維基百科，自由嘅百科全書
荔園動物園係喺荔園遊樂場隔離，面積約10萬呎嘅動物園，係當時香港第一間私營動物園，係喺1951年開業嘅。佢同香港動植物公園﹑香港海洋公園成為當時香港3個主要嘅動物園。
曾養過好多唔同種類嘅野生動物，分別有熊狸(Binturong，當年荔園錯譯為「大熊貓」，係一隻灰黑色嘅靈貓科動物，仲係已經盲咗)﹑獼猴﹑山羊(介紹牌寫係德國羊)﹑梅花鹿﹑老虎(為印度虎，1990年代初病逝)﹑熊﹑揚子鱷(叫「亞細」，1952年來港))﹑水鳥﹑獅子(分別叫「力奇」同「美美」，1975年1月來港)﹑黑豹(園內有2隻，其中一隻叫「亞威」，1976年6月來港，直到1993年3月病逝)﹑禿鷲﹑綠孔雀(禿鷲死晒後先至被引入)﹑美洲獅(其中一隻為獅乸「咪咪」，同埋另一隻雄獅於1981年從日本運港)﹑後期運來嘅雙峰駱駝(1980年代未)同埋長頸鹿(1992年嚟港，當時仲足足花咗30幾萬銀買返嚟)。
最令人難忘嘅，莫過於鎮園之寶「天奴」：一隻雄性嘅緬甸大象，佢喺1952年隨沈常福馬戲團來港，之後再運到荔園長住，一直生活喺面積只有幾百呎嘅獸籠之內，過著跪地討食嘅辛酸生活。於1989年2月3日因染急性肺炎而被人道毀滅，後嚟被運去將軍澳垃圾堆填區埋葬。呢點已成為1950年代至1970年代香港人嘅重要嘅集體回憶之一。據資料顯示，大象「天奴」每天吃2餐，分量約有200斤，包括草，生果，飯等。每天大約花100元飼養牠。而全盛時期，賣生果嘅小販，每月可賺2,3千蚊。
另外，動物園過往亦有多個大型展覽，包括最大嘅灣鱷(叫「好叻」，1989年6月從泰國引入)、西伯利亞虎(分別叫「阿堅」同「瑪利亞」，1990年12月從東德經荷蘭抵達香港)同埋來自泰國嘅兩頭大象(分別喺「蓮寶」同「奧安」，兩次喺泰國過嚟港展出：1990年同1991年2月)。荔園動物園亦曾發生過動物逃脫事件，先後有走甩老虎(1974年12月)同埋美洲獅(1989年11月)。(動物園資料：由 karming 提供，2006年)
由於喺1976年起受到海洋公園競爭，令入場人數下跌。荔園動物園首先喺1993年7月31日閂門大吉，其後超過100隻動物送咗去深圳市野生動物園，一些較老嘅動物就被人道毀滅。至此香港市民再無機會喺香港見到老虎獅子大象啦！
