Sèrbocroat
Un article de Wikipèdia, l'enciclopèdia liura.
Lo sèrbocroat (o rarament croatosèrbe) (nom autoctòn: srpskohrvatski = cрпскохрватски, hrvatskosrpski) es un ensems de tres lengas eslavas: lo croat, lo bosnian e lo sèrbe. Totas tres son fòrça similaras e mutualament intelligiblas. Lo sèrbocroat es doncas un diasistèma e las tres lengas que lo compausan, croat, bosnian e sèrbe, son de lengas per elaboracion.
Abans l'esclatament de Iogoslavia en 1991-1992, se considerava que i aviá una lenga sèrbocroata unida: teniá una nòrma oficiala unenca, e mai se s'admetiá qualques amainatjaments regionals. Un d'eles èra la libertat d'utilizar l'alfabet latin o l'alfabet cirillic. Lo cirillic l'utilizavan sustot los sèrbes e montenegrins (mas tanben aqueles utilizavan l'alfabet latin).
Dempuèi l'independéncia de Croàcia en 1991 e de Bòsnia e Ercegovina en 1992, lo sèrbocroat es pas pus reconegut coma lenga oficiala. Se reconeis sonque tres lengas distintas, que caduna ten una nòrma distinta, e mai se rèstan fòrça semblantas:
- Lo croat es la lenga oficiala de Croàcia e de la comunitat croata de Bòsnia e Ercegovina. S'escriu sonque en alfabet latin.
- Lo bosnian (o mens oficialament bosniac) es la lenga oficiala de la comunitat "musulmana" (dicha "bosniaca") de Bòsnia e Ercegovina. S'escriu sonque en alfabet latin e mai se, teoricament, se poiriá escriure tanben en alfabet cirillic.
- Lo sèrbe es la lenga oficiala de Montenegro, de Serbia e de la comunitat sèrba de Bòsnia e Ercegovina. S'escriu indeferentament en alfabet cirillic o en alfabet latin.
- Certans sectors culturals de Montenegro demandan la reconeissença d'una "lenga montenegrina", que la vòlon destacar del sèrbe. Lor revendicacion es minoritària e recep pas gaire de supòrt oficial en Montenegro. E mai se Montenegro es vengut un estat independent de Serbia en 2006, se reconeis en general que los dos estats partejan encara la meteissa lenga: lo sèrbe.
