Den Hulst
Van Wikipedie
Den Hulst, ok wal De Hulst (gebrukeleke uutspraok: Nulst) was een Oaveriesselse buurtschop an de Dedemsvaort, die töt 't noordeleke diel van 't dörp Ni'jlusen uutegreuid is. Boben Den Hulst lig de Punthorst in de gemiente Stappest; een endtien op 't oosten an lig De Balk in de gemiente Hardenbarg; en naor 't westen ligt de Ni'jluseger buurtschop De Meele en 't kruuspunt van de N377 en de A28, de Lichtmis.
In de eerste helfte van de neengtiende eeuw wördden veur 't vervoer van turf de Dedemsvaort egraoven tussen Asselt en de Oaveriesselse Vechte bi'j Grambarge. 't Kenaol had acht sluzen, en rond de sluzen en broggen ontstunden dörpen en buurtschoppen, daoras Den Hulst er ien van was. Dizze buurtschop ontstund bi'j sluus drei en d'Ommerdiekerbrogge. Ter hoogte van Den Hulst volgen de Dedemsvaort 't vervallen tracé van 't ofwateringskenaol de Beentjesgraven ("d'olde grachte").
Langes de vaort kwaamp d'r aordig wat verkeer. Zo volgen de op 't end van de neengtiende eeuw anelegde tramweg van de Dedemsvaartsche Stoomtramweg-Maatschappij 't kenaol tussen de Lichtmis en Lutten.
In 1904 openden an de vaort de breurs Van de Berg de fietsenfebriek Union, die belaangriek veur de warkveurziening wördden. In meert 2006, nao een lange tied van perblemen veur 't bedrief, was 't ofeleupen mit Union op Den Hulst: de fabricage wördden deur 't Sociale Warkveurzieningsschop Larcom verplaotst naor een leegstaonde hal van dit bedrief in Omm.
Nao de Tweide Wereldoorlog verleur de Dedemsvaort zien betekenis veur de scheepvaort. In de jaoren zestig bint grote dielen edempt en wördden daor wegen anelegd. Sinds 1969 is bi'j Den Hulst 't kenaol vört. Ter hoogte van Den Hulst löp de vierbaansweg de N377, of "de Den Hulst", diels op 't trejek van de olde vaorweg.
Den Hulst stund deur d'Ommerdiek (now de Burg. J.P. Backxlaan) in verbinding mit 't zudeleke Ni'jlusen. De buurtschop greuiden uut töt Ni'jlusen-Noord, terwijl ze 't olde Ni'jlusen Ni'jlusen-Zuud bint gaon nuumen. Tussen dizze kernen ligt spörtvelden. In Ni'jlusen-Noord bint de Olde en Ni'je Hulsterplas uutebaggerd daoras vrogger gröslaand lag. Ok 't Hulsterpad en 't bejaordenhuus de Hulstkampen erinnert an de name van de buurtschop.
