Iesbarg
From Wikipedia
En Iesbarg (de, m, pl.: Iesbargen) is en grootet Stück Ies, wat in't Water swimmt. De Iesbargen kümmt vun de Gletschers, besünners in Gröönland un in de Antarktis.
Ies is en beten lichter as Water. Een vun teihn Delen Ies is baven över den Waterspegel. Man de övrigen negen Delen sünd ünner Water. Dat bedüüd, dat de Iesbarg ünner Water veel grötter is as över dat Water. Dor kümmt dat vun, dat so mennig Scheep mit en Iesbarg tosamenstött sünd un den ünnergahn. Dat beröhmtest Bispeel is de Titanic. Ok wenn en Schipp noch en poor hunnert Meter vun en groten Iesbarg weg is, langt dat Ies ünner Water mööglicherwies bet na dat Schipp un kann dat denn oprieten.
Iesbargen köönt bannig groot warrn. In Gröönland gifft dat to'n Bispeel den Ilulissat-Gletscher, ok Jakobshavn Isbree naamt. De is de gauste Gletscher op de Noordhälft vun de Eer. Dat Ies kümmt dor wat bi 60 Meter den Dag na den Fjord. De Iesbargen, de de Gletscher dor kalvt (kalven bedüüd, dat de Iesbarg afbreekt), sünd deelwies een Kilometer lang un breed. Se sünd wat üm 100 bit 150 Meter hooch över den Waterspegel. Un ünner Water hebbt se en Deepgang bet över 600 m.
Noch grötter warrt de Iesbargen vun de Antarktis. De köönt över 200 km lang un över 30 km breed warrn.
